1 ǀGapiǃgôahesa Teofilutse:
ǂGuigu ge ǁîgu ǁkhāsib ǃoa sage ǁaegu ge ī xūna ǁgaeǂhôas ǃnâ ǃamǁaresa ge dītsâ. 2 ǁÎgu ge mûǃgâ-aon xa ge tsoatsoasa xu a mûhe tsî Mîs ǃoaba-aogu xa da ge mîbahe khami ge xoamâi. 3 ǁNā-amaga, ta ge ǁkhāti go ǂâi ǀGapiǃgôahesatse, hoana ta nî ǂōrisase saogubes ǃnâ ôaǃnâ tsî ǂhanu ǀgaub ai satsa xoamâibasa. 4 Tita ge ǁnāsa ra dī, îts ǂan, ǁkhāǁkhāhets gere xūn hoaragase a ama ǃkhaisa.
Johaneb ǁĀǁnâ-aob di ǃnaes ra ǂhôahe
5 Herodeb ge Judeab di gao-ao i ǁaeb ǃnâb ge Saxariab ti ǀon hâ pristeri, Abiab di pristerǃnansa xu ge hâ iba ge hâ i. ǁÎb taras ge Elisabet ti ge ǀon hâ i tsîs ge Aronni suriba xu ge hâ i. 6 ǁÎra ge Elob mûǁae ǂhanu-aise gere ûi tsî ǃKhūb di ǂhanugu tsî mîmāde ǀoasase gere ǁnâuǀnam. 7 ǁÎra ge ge ǀgôao i, Elisabets ge ǀgôa-e hō ǁoa i tsî hoara ge ǁkhāti ǀnai kaira hâ i amaga.
8 ǀGuitsēb Saxariaba ǁîb pristersis di ǁguiǂamde Tempeli ǃnâ, Elob aiǃâ ra dī, 9 hîab ge pristergu ǁnaetib ǃoa, ǂnōgus ǃnâ-u ge ǁhûihe, altars aib ǃgâihamxūna nî ǀanǀanse. Ob ge ǃKhūb di Tempeli ǃnâ ge ǂgâ. 10 ǁÎb ǃgâihamxūna ǀanǀans ǀkha ǀhabe hîan ge ǂnubis khoena ǃauga mâ tsî gere ǀgore. 11 Ob ge ǃKhūb ǀhomǃgāba ǀanǀanaltars di amǀkhāb ai ǁîba ge ǂhai. 12 Saxariab ge ǁîbab ge mû, o burugâ tsî kaise ǃhuri tsî ge ǃao. 13 Xaweb ge ǀhomǃgāba ǁîb ǃoa ge mî: “Tā ǃao, Saxariatse! Elob go sa ǀgoresa ǁnâu-am xuige. Sa taras Elisabets ge ǀgôaroba nî ǁoraba tsi tsîts ge ǁîba Johaneb ti nî ǀonǂgai. 14 Sats ge ǃgâiaǂgao tsî nî dâ tsî ǂguin ge ǁîb ǃnaes ǂama nî ǃgâiaǂgao! 15 Johaneb ge ǃKhūb mûǁae kaise nî ī. ǁÎb ge tātse ǂauxûi-i tamas ka io ǀgaisa āxū-i tsîna ā tide. ǁGûs ǃnāb ǃnâb hâ ǁaeba xub ge ǃAnu Gagab xa nî ǀoa, 16 tsîb ge ǂgui Israelǁîna ǃKhūb, ǁîn di Elob ǃoa nî oahā-ū. 17 ǁÎb ge ǁkhā gagab tsî ǀgaib, kēbo-aob Eliab dib khami īb ǀkha ǃKhūba nî aiǃgûba tsîb ge ǂguin, ǁnâuǀnamoǃnân di ǂgaoga ǂhanu-aisib ǁga ǀkharaǀkhara tsî ǃKhūba khoena nî aiǂhomiba.”
18 Ob ge Saxariaba ǀhomǃgāb ǃoa ge mî: “Mâti ta nēsa nî ǂan? Tita ge kaira khoeta tsî ti taras tsîn kom kaira hâo.”
19 Ob ge ǀhomǃgāba ge ǃeream bi: “Tita ge Gabrielta. Tita ge hoaǁae Elob aiǃâ hâ ta, sats ǀkha ǃhoa tsî ta nē ǃgâi ǂhôasa nî hā-ūba tsise sîhe hâ ta. 20 Xawets kom tita xats ra mîbahena ǂgom tamao, ǁnā-amagats ge nî ǃgome tsîts ge ǃhoa tide, ti mîdi mîmâihe hâ ǁaeb ai nî amas kōse.”
21 Nē ǁaeb ǃnân ge ǂnubis khoena Saxariaba ge ǃâu hâ i, tsî ge burutsoatsoa tare-i ǃaromab go ǁnātikō gaxu ǁaeba Tempeli ǃnâ a ǀhabesa. 22 Tsî ǂoaxab ge ob ge ǁîn ǀkha ge ǃhoa ǁoa i, on ge ge ǂan ai-eb go Tempeli ǃnâ mû ǃkhaisa. ǃGomeb ge xui-aob ge ǁîna ǃomkha ǀkha ǀgui gere ǁgau.
23 Tsî ǁîb di Tempelǃoabas ǁaeb ge toa, ob ge Saxariaba ge ǁaru. 24 Tsî ǁnā tsēdi khaoǃgâs ge ǁîb taras, Elisabetsa ǀgamǀkhā tsî koro ǁkhâgu ǁaeba omsa xu ǂoa tamase ge hâ i. 25 “Nēs ǀkhab ge ǃKhūba ǀunis ai go hui te, ǁîb go ti ǃharaxūba khoen ǃnâ ūbēba te amaga” tis ge ge mî.
Jesub di ǃnaes ra ǂhôahe
26 ǃNaniǁî ǁkhâb Elisabets ǀgamǀkhās dib ǃnâb ge Eloba ǀhomǃgāb Gabriela Galileab ǃnâ ǂnôa ǃās, Nasaret ti ra ǀonǂgaihes ǃnâ hâ oaxaes ǁga ge sî. 27 ǀHomǃgāb ge haisi-am-i, oaxaes hîa Josef ti ǀon hâ khoeb, Davidi omarisa xu hâb xa ge ǃgameba mîmâibahe hâ isab nî mā-e ge ūhâ i. Nē oaxaes ge Maria ti ge ǀon hâ i. 28 ǀHomǃgāb ge ǁîs tawab ge ǂhaio ge mî: “Tawede si ta ra sas ǀkhomma go hōsa! ǃKhūb ge hâǀkhā si, sas taradi ǃnâ ǀkhaehe hâsa!”
29 Marias ge ǀhomǃgāb di ǂhôas xa ge burugâ tsîs ge kaise ge ǂâiǂhansen, nē ǂhôas tare-e ra ǂâibasen ǃkhais xa. 30 Ob ge ǀhomǃgāba ǁîs ǃoa ge mî: “Tā ǃao, Mariase, ǀkhommas go Elob tawa hō xuige. 31 Tsî mû, sas ge ǀgamǀkhā tsî ǀgôaba nî ǁora tsîs ge ǁîba Jesub ti nî ǀonǂgai. 32 ǁÎb ge nî kai tsî Hoan xa ǀGapib di Ôab ti nî ǂgaihe. ǃKhūb Elob ge ǁîb îb Davidi di gaosisa nî mā bi, 33 ob ge ǀamos kōse Jakob surib ǂama nî gao; tsî ǁîb gaosib ge tātsē ǀuni tide!”
34 Os ge Mariasa ǀhomǃgāb ǃoa ge mî: “Tita kom ao-e ūhâ tamao, mâtis nēsa a īǁkhā?”
35 Ob ge ǀhomǃgāba ge ǃeream si: “ǃAnu Gagab ge nî hāǂam si tsî Hoan xa ǀGapib di ǀgaib ge sas ai nî hā. ǁNā-amagab ge sasa xu nî ǃnae ǀgôaba ǃanub, Elob Ôab* ti nî ǂgaihe. 36 Mû, sa khoexakhoes Elisabets ǀgôana hō tidese īs ge nē kairasis tsēdi âs ǃnâ a ǀgamǀkhā tsî nēb ge ǁîs di ǃnaniǁî ǁkhâba. 37 Xū-i xare-i ge Elob tawa īǁoasa tama hâ.”
38 “Tita ge ǃKhūb di ǃgāta, mîts go khami a-i īǀkhā te re” tis ge Mariasa ge mî, ob ge ǀhomǃgāba ǁîsa xu ge bē.
Marias ge Elisabetsa ra sari
39 ǁNā tsēdi ǃnâs ge Mariasa ǂhomisen tsî ǃnoesase Judab di ǃhomxa ǀkharib ǃnâ ǂnôa ǃās ǁga ge ǃgû. 40 Saxariab oms ǃnâ sī ǂgâ tsîs ge Elisabetsa ge tawede. 41 Tsî Elisabets ge Marias di tawedesa ǁnâu, ob ge ǀgôaroba ǃnāb âs ǃnâ ge uri tsîs ge Elisabetsa ǃAnu Gagab xa ǀoa, 42 tsî ǀgaisa dommi ǀkha ge ǂgaiǂui: “Sas ge taradi hoadi xa ǃnāsase ǀkhaehe hâ tsî ǀkhaeheb ge hâ ǀgôarob hîas nî hōba! 43 Mâ ǃgâi xū-e ta dī hâ, os kha ti ǃKhūb îsa tita hā ra sari? 44 Sa tawedesa ta ra ǁnâu hîab ge ti ǀgôaroba ti ǃnāb ǃnâ ǃgâiaǂgaob xa go uri. 45 Tsî ama ǀkhaehes ge hâ sas ǂgom rasa, ǃKhūb xas go mîbahen nî dīǀoaǀoahe ǃkhaisa.”
Marias di koatsanas
46 Os ge Mariasa ge mî:
“Ti ǀoms ge ǃKhūba ra kaikai;
47 tsî ti gagas ge ra dâ,
Elob ti ǃGâiǃōdī-aob ǃnâ.
48 ǁÎb ǃgās di ǃgamǃgamsensab go ǃgapaǀî amaga;
tsî mû, nēsisa xu di ge hoa ǃhaode
ǃgâiǃōse nî kare te,
49 kai xūnab go ǀGaisaba dī te amaga,
tsî ǀons âb ge a ǃanu.
50 ǁÎb di ǀkhomxaǂgaosib ge ra hâhâ
nē ǃhaosa xu nau ǃhaos kōse,
ǁîba ra ǃaoǃgân ǂama.
51 ǀGaisa dī-eb ge ǁîb di ǁôab ǀkha dī
tsî ǁîn ǂgaogu ǃnâ
ǀgapiǂâixana go ǀgaruǀgaru.
52 Gao-aoga tronde xu ūǁnâ
tsîb ge ǃgamǃgamsensana go ǀgapiǀgapi.
53 ǃÂ hâna ǃgâin ǀkha ǁâǁâ,
tsîb ge ǃkhū hâna ǀkhaiǃomse go sîbē.
54 Israeli ǁîb di ǃgābab ge go hui,
ǀkhomxasib âb xa ǂâi tsî.
55 Sada îgab ge mîba khami, Abrahammi
tsî ǁîb di suriba, ǀamos kōse.”
56 Tsîs ge Mariasa ǁaubexa ǃnona ǁkhâga Elisabets tawa hâ tsî ǁnās khaoǃgâ ge ǁaru.
Johaneb di ǃnaes
57 ǁAeb âs ge ǀoa, os ge Elisabetsa ǀgôaroba ge ǁora. 58 ǁÎs ǁanǁare-aon tsî ǀaokhoen tsîn ge ǃKhūb ge kai ǀkhomxaǂgaosiba ǁgau si ǃkhaisa ǁnâu, on ge hoatsama ǁîs ǀkha ge ǃgâiaǂgaoǀhao.
59 ǀGôarob ge a wekhexa on ge ǀgôarob nî ǃgaohese* ge hā tsîn ge ǁîba ǁgûb di ǀons ǃoa Saxaria ti gere ǀonǂgai ǂgao. 60 Xawes ge ǁgûsa “Hî-î, ǁîb ge Johane ti nî ǀonǂgaihe” ti ge mî.
61 On ge ǁîs ǃoa ge mî: “Xawe i kom sa ǀaokhoen ǃnâ ǁnāti ǀon hâ khoe-e a ǀkhaio.” 62 ǁGau rasen ge ǁgûba mâtib ǀgôaroba ra ǂgai ǂgao ǃkhaisa ge dî.
63 Ob ge Saxariaba xoa-aixūro-e ǂgan tsî “ǀOns âb ge a Johane” ti ge xoa. On ge hoana ge buru. 64 ǁNātimîsib ge Saxariaba ǁkhawa ǃhoa ǁkhā tsî Eloba ge koatsoatsoa. 65 Tsî ǁîra ǁanǁare-aon ge ǃaob xa ge ǀoa tsîs ge nē ǂhôasa ǁnā ǃnâuxa ǀkharib Judeab dib ǃnâ kaise gere ǃhoahe. 66 Tsî nēsa gere ǁnâun hoan ge nēs xa ǂgaob ǃnâ ǂâiǂâisen tsî gere dî: “Nē ǀgôaroba ǀguitsē nî tare kai?” ǃKhūb di ǀgaib ge ǁîb ǀkha hâ i amaga.
Saxariab di kēbos
67 Johaneb îb, Saxariab ge ǃAnu Gagab xa ǀoa tsî kēbo tsî ge mî:
68 “Ab karehe Israelǁîn ǃKhūb Eloba!
Sarihā tsîb go ǁaes âba oresa dība amaga.
69 Tsîb ge ǃgâiǃōsib di ǁnâba go ūkhâiba da
Davidi, ǃgāb âb di ommi ǃnâ.
70 ǀNaib ge ǁîb di ǃanu kēbo-aogu ǃnâ-u
mîmâi hâ i khami.
71 Sadab nî orese sada khākhoen,
tsî ǁkhan da ran hoan di ǃomǁaeba xu.
72 Sada îga ǀkhomxa
tsîb nî ǁîb di ǃanu ǃgaeǀhaos xa ǂâise.
73 Abrahammi, sada îb tawab
74 ge nūs ǀkha ge mîmâi,
khākhoen ǃomga xu huiǂui dasa,
ǃaob ose da ǁîba nî ǃoaba ǁkhāse,
75 î da ǁîb aiǃâ ǃanu tsî ǂhanu-ai ǁkhā
sada ûitsēdi hoade.
76 “Sats, ti ôats ge Hoan xa ǀGapib
di kēbo-aots ti nî ǂgaihe.
Sats ge ǃKhūba nî aiǃgûba
ǁîb daobats nî ǂhomiba bise,
77 ǁîb di ǁaesats nî ǃgâiǃōsiba ǂhôase,
ǁîn ǁoren ǀûbas ǃaroma.
78 Sada Elob di ǀkhomxaǂgaosib tsî tsauraǂgaosiba xub
ge ǁîb ǃgâiǃōsib di ǃnâba ǀgapiseba xu, sada ai nî ǃnâ,
79 ǃnâbab nî hā-ūse,
ǃkhaenab tsî ǁōb sommi ǃnâ ûi hân tawa,
sada dāǃharode ǂkhîb daob ai nî ǃammâise.”
80 ǀGôarob ge ǀomkhâi tsî gagas ǃnâ ge ǀgai. Tsîb ge Israelǁîn aiǃâb nî ǁgausen tsēs kōse ǃgaroǃhūb ǃnâ ge hâ i.
© Khoekhoegowab Elobmîs © Bible Society in Namibia, 2020.
