ǀGuikaidisi tsî hakadisihakaǀaǀoadisi khoen Israeli din
1 Nēn hoan khaoǃgâ ta ge haka ǀhomǃgāgu hîa haka ǁhôadi ǃhūbaib didi ai mâga ge mû. ǁÎgu ge haka ǂoagu ǃhūbaib diga gere ǁkhae, ǂoa-i xare-i ǃgom tidese, ǃhūbaib ais kao, hurib ais kao tamas ka io mâ hai-i hoa-i ais kao. 2 Tsî ta ge ǀnî ǀhomǃgāba aiǂoas ǀkhāba xu ǃgoaxase ge mû, ûitsama Elob di ǂganamxūsa ǃomǁae ūhâse. Tsîb ge ǃgari dommi ǀkha haka ǀhomǃgāgu hîa ǃhūbaib tsî hurib tsîna ǂkhôas di ǀgaiba māhe hâgu ǃoa ge mî: 3 “Tā ǃhūbaib, hurib tamas ka io haide ǂkhôa, Elob di ǃgāna da ǃūdi ân ai sao tama hîa.” 4 Tsî ta ge ǁnān hîa ǃūdi ân ai saosan a ǀguikaidisi tsî hakadisihakaǀaǀoadisi ti ge ǁnâu. ǁÎn ge disiǀgamǀa ǃhaodi Israeli dide xu hâ:
5 Disiǀgamǀaǀoadisina Judab ǃhaosa xu,
disiǀgamǀaǀoadisina Rubenni ǃhaosa xu,
disiǀgamǀaǀoadisina Gadi ǃhaosa xu,
6 disiǀgamǀaǀoadisina Aseri ǃhaosa xu,
disiǀgamǀaǀoadisina Naftalib ǃhaosa xu,
disiǀgamǀaǀoadisina Manaseb ǃhaosa xu,
7 disiǀgamǀaǀoadisina Simeonni ǃhaosa xu,
disiǀgamǀaǀoadisina Levib ǃhaosa xu,
disiǀgamǀaǀoadisina Isaskari ǃhaosa xu,
8 disiǀgamǀaǀoadisina Sebulonni ǃhaosa xu,
disiǀgamǀaǀoadisina Josefi ǃhaosa xu
tsî disiǀgamǀaǀoadisina Benjaminni ǃhaosa xu.
Kai ǂnubis
9 Tsî nēn khaoǃgâ ta ge kō, o ta ge khoe-i xare-i a ǃgôa ǁoas kōse kai ǂnubis, hoaraga ǁaedi, ǃhaodi, khoen tsî gowaga xu hâsa trons tsî ǁKhaob aiǃâ ge mûmâ, ǃuri sarana ǂgaeǂgā tsî palmǂgonaga ǃomǁae ūhâse. 10 ǁÎn ge ǃgari dommi ǀkha nēti gere ǂgaiǂui: “ǃGâiǃōsib ge sida Elob, trons ai ǂnôab tsî ǁKhaob tsîkha xu ra hā.” 11 Hoaraga ǀhomǃgāgu ge trons tsî ǂnomdomgu* tsî haka ûitsama kurusabegu* tsîna ge mâǂnamipe. Tsî gu ge aidi ǂama trons aiǃâ ǁnāǁgoe tsî Eloba ǀgoreǀî 12 tsî ge mî:
“Amen!* Koas, ǂkhaisib, gā-aisib,
gangans, ǃgôasib, ǁkhāsib tsî ǀgaib
ge a sida Elob di, ǀamosib kōse! Amen!”
13 Ob ge ǂnomdomgu di ǀguiba ge dî te: “Tarina kha nē ǃuri sarana ǂgaeǂgā hâna tsî mâpa xūn go hā?”
14 O ta ge “ǀŪ ta ge a ǃKhūtse, sats ge a ǂan” ti ge ǃeream bi.
Ob ge ǁîba tita ǃoa ge mî: “Nēn ge ǁnān, kai ǁgâiǀāba xu go ǀkhīn tsî saran âna ǁKhaob di ǀaob ǃnâ ǁā tsî ǃuriǃuri hâna. 15 ǁNā-amagan ge Elob trons aiǃâ hâ,
tsî tsēb tsî tsuxuba ǁîba ǁîb di Tempeli ǃnâ ra ǃoaba;
tsî ǁNāb hîa trons ai ǂnôab
ge ǁîna ǁîb di ǀgūhâsib ǀkha nî ǃnamiǂgā. 16 ǁÎn ge tātsēs tsîna ǁkhawa ǃâ tamas ka io ǁgâ tide; sores tamas ka io ǀgammi ge ǁîna ǂkhôa tide.
17 ǁKhaob hîa trons di ǁaegu hâb nî ǁîn di ǃûi-ao
tsî ǁîna ûitsama ǁgamǀaudi ǃoa ǂgaeǂgui xui-ao.
Tsîb ge Eloba ǁîn di mûde xu ǁgamron hoana nî ǀomǁnâ.”
© Khoekhoegowab Elobmîs © Bible Society in Namibia, 2020.
