Esekieli ǀgamǁî ais Eloba xu hâs
Jerusalems ǃnâ hâ ǁgôa-elo ǃoabadi
1 ǃNaniǁî kurib ǃnâ, ǃnaniǁî ǁkhâb di koroǁî tsēs ai ta ti oms tawa ǂnôa tsî gu Judab di kaiga ti aiǃâ ǂnôa, hîab ge ǃKhūb Elob di ǃomma tita ai ge hā. 2 Kō ta ge, o ta ge khoe-i khami ī xū-e ge mû, ǁî-i kamanab ǃnakabǀkhāb ge ǀaes khami ge ī i tsî kamanab di ǀgapikab ge ǀgaisase ra ǂkhai, ǂkhaiǂkhaisa brons-i khami ge ī i. 3 ǃOmmi khami ī xū-e ǀhōǂui tsîb ge ti danaǀûn ai ge ǃkhō te, tsîb ge Gagaba ǃhūbaib tsî ǀhommi tsîkha ǁaegu ge ūǃapa te tsî Elob ai-i ǃnâ Jerusalems tawa ge ūsī te. ǁÎb ge dao-ams ǂganagab ai-ommi ǁga garus, ǀapasǀkhāb ǃoagu hâs tawa ge sī-ū te. ǁNāpas ge tauxasib īb di ǂnûǃkhais, tauba ra ǃaromasa ge hâ i.
4 Tsî Israeli Elob di ǂkhaisib ge ǁnāpa ge hâ i, ǃgoaǃnāb ǃnâ ta ge mû īb khami ība. 5 Ob ge ǃKhūba tita ǃoa ge mî: “Khoenôa ǀgôatse, ǀapasǀkhāb ǃoa kōkhâi.” ǀApasǀkhāb ǃoa ta ge ge kōkhâi, tsî ǀapasǀkhāb altars di dao-ams tawab ge tauxasib ība ge hâ i.
6 Ob ge ǁîba tita ǃoa ge mî: “Khoenôa ǀgôatse, tare-en ra dī ǃkhaisa mûts ra, kai ui-uisasib Israeli ommi din ra dība, titan ti ǃanusib ǃkhaiba xu nî dībēse? Xawets ge nēb xa kai ui-uisasiba nî mû.”
7 Ob ge tita ai-ommi dao-ams tawa ge ǀkhī-ū, tsî kō ta ge, o ta ge ā-e ǂnubiǂgoab ǃnâ ge mû. 8 Ob ge ǁîba tita ǃoa ge mî: “Khoenôa ǀgôatse, ǂnubiǂgoaba khôaǃkhopa” tsî ǂnubiǂgoaba ta ge khôaǃkhopa, os ge ǁnāpa dao-amsa ge hâ i. 9 Ob ge ǁîba tita ǃoa ge mî: “ǂGâ, îts ǁgaisi ui-uisasib ǁîn ra dība sī mû.” 10 O ta ge ǂgâ tsî ǁnāpa ǂnubiǂgoab ai xoamâihe hâse ǃkharagaǃnâgu ǂhanaben, ui-uisa ǀgurun tsî Israeli ommi ǁgôa-elogu di īgu tsîna ge mû. 11 ǁÎn aiǃâ gu ge hûdisi kaikhoegu Israeli ommi diga ge mâ i, ǁîgu ǃnâb ge Safanni ôab Jasanjab tsîna ge hâ i. Mâb hoab ge ǀanǀanxūn xapasa ge ūhâ i tsîs ge ǃgâihamxūn ǀanni ǃâusa ǀgapigab ǃoa ge khâi. 12 Ob ge ǁîba tita ǃoa ge mî: “Khoenôa ǀgôatse, Israeli di kaikhoegu ǃkhaeb ǃnâ ra dīna mûts go, mâb hoaba īgu di ǃnā-oms âb ǃnâ? ǁÎgu ra mî xui-ao: ‘ǃKhūb ge mû ge tama hâ! ǃKhūb ge ǃhūba ge ǀuru!’ ”
13 ǁÎb ge ǁkhawa tita ǃoa ge mî: “Noxopats ge ǁnās ǃgâ-ai a kai ui-uisasib, ǁîn ra dība nî mû.” 14 Ob ge ǁîba ǀapasǀkhāb di dao-ams ǃKhūbommi dis tawa ge sī-ū te, tsî mû, ǁnāpa di ge taradi Tamusi ǃaroma gere āde ge ǂnôa i.
15 Ob ge ǁîba tita ǃoa ge mî: “Khoenôa ǀgôatse, nēsa mûts go? Nēs xa a kai ui-uisasibats ge ǁkhawa nî mû.” 16 ǁÎb ge ǂganagab ǃKhūb ai-ommi dib tawa ge sī-ū te. ǃKhūb Tempeli di dao-ams tawa, ai-ommi tsî altars tsîra ǁaegu gu ge ǁaubexa ǀgamdisikoroǀa khoega ge hâ i; ǁîgu ǁâgu ǀkha gu ge ǃKhūb Tempela ge ǃoa, tsî ǁîgu aide aiǂoasǀkhāb ǁga, tsî gu ge soresa aiǂoasǀkhāb ai gere ǃoaba.
17 Ob ge ǃKhūba tita ǃoa ge mî: “Khoenôa ǀgôatse, nēsa mûts go? ǂÂu tama i kha hâ Judab ommi din ge ui-uisasiba ǁkhawa dī ǃkhaisa? ǃHūba ǂkhabab ǀkha ǀoaǀoa tsîn kha tita ǁaib ǃoa nî ǁgoaǂui? Mû, ǁîn ge ǁnâuba ǁîn ǂguidi tawa ra sī-ū. 18 ǁNā-amaga ta ge ti ǁaib ǃnâ nî sîsen, ti mûs ge sâu tide tamas ka io ta ge ǁîna ǀkhom tide. Ti ǂgaera ǃnân ga ǃauǂgai, xawe ta ge ǁîna ǁnâu tide.”
© Khoekhoegowab Elobmîs © Bible Society in Namibia, 2020.
