Kairasib di ǀgores
1 Sats tawa ta ge ra gau ǃKhūtse,
tā toxopa taotao te re!
2 Ore î hui te re sa ǂhanu-aisiba xu,
sa ǂgaesa tiǀî ǂō, î ore te re.
3 ǃGareǀuise ība te re, ǁnāǀî ta hugaǀgui nî ǁhaiǁhâse.
ǁÎbats ge satsa go mîmā tita oresa;
sats ge a ti ǃgareǀui tsî a ti ǁaposa hâǃkhai.
4 Elotse eloxoresan di ǃomma xu ore te re,
ǁnān ǂhanuoǃnâsiba sîsen tsî ra ǂkhabadīn di ǃomǁaeba xu.
5 Sats ge a ti ǃâubasen ti ǃKhū Elotse,
ti ǂkhamsisa xu ta ge sats ai ra ǂgomaiǂnûi.
6 Sats ai ta ge ti ǃnaesa xu ra ǃgâsen.
ǁGûs ǃnāba xu ta ge ǂoaxa tsēs aits ge satsa ge ǃgaoǀnae te.
Satsa ta ge ra karehâhâ.
7 ǂGuina ta ge aiǁgause ti ûib ǃnâ ge ība,
xawets ge satsa a ti ǀgaisa ǁhaiǁhâǃkhai.
8 Ti ams ge sa koas xa ǀoa hâ;
hoa tsēsa sa ǂkhaisib xa.
9 Tā kairasis ǁaeb ǃnâ aoxū te re;
ti ǀgaib ga toaxū te, o tā ǁnāxū te re.
10 Ti khākhoen ge tita xa ra ǃhoa,
tsîn ge ǁnān tita ra ǃkhēna tita ǃoagu ra ǀapeǀhao.
11 Tsîn ge ra mî: “Elob ge ǁî-e ǁnāxū hâ!
Sao î ǁî-e ǃgam, ǁî-e nî ore khoe-i a ǀkhai xuige.”
12 Elotse tā tita xu ǃnūse hâ re;
ti Elotse ǃhaese ǃnâǃkhoe te re.
13 An ti khākhoena taob xa ǁō re;
an ǁnān tita ra tsūdī ǂgaona taob tsî ǃharaxūb xa ǃgū-aihe.
14 Satsa ta ge hugaǀgui ǃâubasen
tsî ti koasa hugaǀgui satsa nî ǁnaeba.
15 Ti ams ge hoaraga tsēsa sa ǂhanu-aisiba nî ǃhoa;
sa ǃgâiǃōsiba, ǃgôa ǁoa ta a xawe.
16 ǃKhūb Elob di buruxa dīga ta nî koase ta ge ra hā;
sas ǀguisa i ǂhanu-aisiba ta ge nî ǂhôa.
17 Elotse sats ge ti ǂkhamsisa xu ge ǁkhāǁkhā te
tsî ta ge nēsis kōse sa buruxa dīna ra ǂhôa.
18 Tsî ǁkhāti kairasis tsî ǀhaiadanasis kōse Elotse tā ǁnāxū te re;
sa ǀgaiba ta nē suriba mîba tama hîa,
sa ǁkhāsiba, ǁnā surib hîa nî hāba.
19 Elotse sa ǂhanu-aisib ge ǀgapiseb kōse ra sī.
Sats hîa hoan xa kai sîsenga ge dītsa.
Tari-e sats khami ī Elotse?
20 Sats hîa tita ǂgui ǂōǂōsigu tsî tsūǃōga ge mû kaits
ge oahā tsî tita ǁkhawa ûi-ûi,
tsî ǃhūbaib di ǃgamsiba xu nî ūǃapa.
21 Sats ge ti kaisiba ǃnāǃnā
tsî ǁkhawa nî ǁkhaeǂgao te.
22 ǁKhāti ta ge harps ǀkha sa ǂgomǂgomsasiba nî kare ti Elotse,
ǂnunis ǀkha ta ge nî ǁnaeba tsi Israels di ǃAnutse.
23 Ti amǁgaukha ge satsa nî dâǁnaeba
ǁkhāti ti ǀoms ǁîsats ge ores ona.
24 ǁKhātis ge ti namsa hoaraga tsēsa sa ǂhanu-aisib xa nî ǃhoa
tsîn ge ǁnān tita ra ǂkhôadī ǂgaona nî taotaohe.
© Khoekhoegowab Elobmîs © Bible Society in Namibia, 2020.
