Elob ge ǀgaisa tsî a ǃgâi
ǁNaeǃnans ǂgaeǂgui-aob ǃoa
Davidi Psalms, Jedutunni ǃoa
1 Elob tawa ǀguis ge ti ǀomsa ǃnōsasiba ra hō;
ǁîba xus ge ti oresa hâ.
2 ǁÎb ǀguib ge a ti ǃgareǀui,
ti ǃgâiǃō tsî ǁhaiǁhâǃkhai
tsî ta kaise ǁnobeǁnobehe tide.
3 Mâǁaeb kōse du khoe-e ǁnāǂam tsî nî ǃgam?
Hoadu ge ǂnubiǂgoab ǁnāǁgôa ǂgao rab,
ǂhāǁguihe ra ǀuiǂnubiǂgoab khami ī.
4 Mâtin ǀgapib âba xu nî ǂhāǁnâ bisan ra ǀape
ǂhumib xan ǃgâibahe
tsîn ams ân ǀkha ǀkhae
tsî ǂgaob ân ǃnâ ra ǀâxare.
5 Elob aiǃâ ǃnō re ti ǀomse,
ǁîb ai ǀgui ta ra ǂgomaiǂnûi xuige.
6 ǁÎb ǀguib ge a ti ǃgareǀgui tsî ore-ao,
ti ǁhaiǁhâǃkhaib, ǁîb tawa ta ǁnobe tideba.
7 Elob tawas ge ti ores tsî ǃgôasiba hâ
Ti ǀgaib di ǃgareǀuib
ti ǁhaiǁhâǃkhaib ge Eloba.
8 Hoaǁae ǁîba ǂgomǃgâ re ti khoedo
ǁÎb ai ǃâ sa sau ǂgaoba ǁhōǂui re
Elob ge a sada ǁhaiǁhâǃkhai.
9 Khoe-i ge ǀoms ǀguisa i,
khoesib ge a ǂgomǃgâhe ǁoa;
ǀnō-ūdas ain ra ǃapa
xawen ǀhaob ais tsîna ǀommi ǃgâ-ai supu.
10 Tā ǂkhabadīb ai ǂgomaiǂnûi
tsî sadu ǂgomǃgâsa ǀgaiǀhanas ǃnâ mâi.
ǃKhūsib ga ǀarosen
xawe sadu ǂgaoga tā ǁnās ai mâi.
11 Elob ge ǀgui ǃkhaisa ge mî;
ǀgam xūna ta ge ge ǁnâu:
ǀGaib ge a Elob di;
12 sats ti ǃKhūts tawab ge hâhâ ra ǀnamma hâ;
mâ khoe-i hoa-ets ǁî-i sîsengu ǃoa ra mādawa-am xui-ao.
© Khoekhoegowab Elobmîs © Bible Society in Namibia, 2020.
