ǃNâb ge Israelǁaes ai ra ǃnâ
1 Sa ǃanu khoen aib ge ǃgāsa ǃnâba gere ǃnâ. ǁÎn di khākhoen ge domgu ânan gere ǁnâu, xawe ǁîna ge mû ǁoa i. ǁÎn ge sa khoen, ǃgom-e ge tsâ tama hâ in di ǃgâiǃgâba gere suri. 2 ǁNā khākhoen ge ǀoro domma ǁîn ǃoagun gere tsūdī khoen nēsi ǁîna ǀkhao tama ǃkhaisa gangan tsî ǁîna ge ǀkhoma, în ǃgû.
3 ǁNās khaoǃgâts ge sa khoena ǀūn a ǃhūb ǃnâ-ūn ge doe, o gere ǂgaeǂgui. Sats ge ǁîna khau ra ǀaeǂkhâǃnâb di ǃnâb ǀkha gere ǂgaeǂgui. ǁÎb ge sore-i hîa ǁîna ǂkhaisa ǃgûdaob ai ǂkhôa-e dī tide-i khami ge ī i. 4 Xawe ǁîn di khākhoen hîa ge ǃnâban nî mû ǃkhaisa mā-amhe tama hâ in ge ǁîn ge sa khoena ǃkhōsabese ūhâ i xui-ao, ǃkhaenab ǃnâ ǃkhōsabese hâsa anu hâ. Tsî sa khoen ǃnâ-ūs ge ǀamo ǃnâb ǂhanub dib ge ǃhūbaiba māhesa.
Egipteǁîn di ǂguroǃnaesagu di ǁōb
5 Sa khākhoen ge ǂâibasenn ge hâ i khami ǀgôaron sa ǃanu ǁaes dina ǃgam, xawe i ge ǁnāpa ǀgui ǀgôa-e ge hâ i, aoxūhe-i ge xawe ge ega huiǂuihe-e. ǁNās khaoǃgâts ge ǂgui ǀgôan sa khākhoen dinats ge ǃgam ǃkhais ǀkha ǁîna ge ǁkhara. ǀGui ǃnās amats ge ǁîn di hoaraga toroǂnubisa gon ra ǁgammi ǃnâ ge āǁō kai. 6 Sada aboxagu ge ǁnā tsuxuba nî ī xūna ǀnai ge mîbahe hâ i, sa mîmâidi ǃnâ gu ūhâ ǂgomǃgâs xa gu nî dâ tsî ǁkhoaǂgaoxa kaihese. 7 Sa khoen ge sats nî ǂhanu-ai ǁaesa huiǂui tsî ǁîn di khākhoena hîkākā ǃkhaisa ge ǂan i. 8 ǁKhā ǀgaub aits ge sida khākhoena ge ǁkhara tsî sa khoesets ge dī da ǃkhais ǀkha sida kai ǃgôasiba ge mā.
9 Nē ǁaeb ǃnân ge eloǃaoǃgâxa khoen nē ǂhanu-ai ǁaes dina ǂganǃgâsib ǃnâ ǁguibade gere ǁguiba tsî ǀguiǂâixase Elob ǂhanuba nî ǁnâuǀnam tsî nē-e, nau-i di ǀkhaegu tsî ǃgomsigu ǃnâ ǁhao ti ge mî. ǀNain ge ǁnā aibekam ǁaeb di karetsanade gere ǁnae. 10 Xawe ǁîn khākhoen di ǀkhomǀkhomsa āb ǃoab dib, ǁîn di ǁō hâ ǀgôan ǃaroman gere āb ge ǃnūseb kōse gere ǁnâusen. 11 ǀHonkhoegu ge khobogu âgu ge tsâ ǁkharab ǁkhāba ge tsâ tsî gao-aob ge ǁkhā ǂoaǃnâsa nau khoen khami ge tsâ. 12 ǁNāpa di ge ǃgôahe di nîs xa kaise ǂgui ǁō hâ sorode ge hâ i, tsîn ge ǁîde ǁkhōs ǃaroma kaise ǀoro khoen ǀguina ge ǃgau hâ i. ǀGui mûǀapirob ǃnân ge ǁîn di ǀnamǀnamsa ǀgôaron hoana ǁkhā ǀgaub ai ge ǁō. 13 Nē khoen ge ǀguis khami ī ǃkhâikhom-i ais tsîna ǂâisa ge ǂnûi tama hâ i, xawe ǁnās ǃās ǃnâ ǁîn di ǃgaidīb ai ge ǂgomaiǂnûi hâ i. Xawe ǁîn di ǂguroǃnaesagu ge ǃgamhe, on ge Israelǁaes a Elob ôa ǃkhaisa ge mûǂan.
14 ǃNubu tsuxub ge ǃkharese ge ǃkharu hâ i tsîn ge hoana ǃnōsa tsî ge ǂkhîsa i, 15 sa ǁgari-aidi ge ǃnapetamase sîsenǂuihe ǃnubai. Danheǁoasa mîs ǀgoraǃgâs dis ge gaosi trons ǀhommi ǃnâ hâsa xu ǀgoraǃgâhesa ǃhūbaib ǃoa, toro-ao-i hîa ǁnāǂams ǃoa ra ǂhomisen-i khami ǃhaese ge ǁgôaxa, 16 sa ǁaposa mîmāsa ra ǃaoǃaosa ǁâtani-i ǀkha sîsenǂuise, ǂaidi ǀkha ǃhūb ai mâ, danas ǀkha ǀhomma tsâǀkhā tsî ǃhūbaiba ǁōb ǀkha ra ǀoaǀoase. 17 ǁNā ǁaeb ǃnân ge ǁō ǁga ra khoena ǃhuriǃhurisa ǁhapode ge ūhâ i tsî ǃâubasen taman hâse ǃaob xa ge ǃkhōhe. 18 Hoaraga ǃhūb ǃnân ǁō ǁga rase ǁgoe, hîan ge tare-i ǃaroman ra ǁō ǃkhaisa khoena gere ǂanǂan. 19 ǁÎn ge ǁîn di ui-uisa ǁhapodi xan ge mîbahe xui-ao, tare-i ǃaroman ra ǁō ǃkhaisa ge ǂan i.
Aronni di ǀgores ge Israelǁîna ǁōba xu ra sâu
20 ǁŌb ge ǁkhāti ǂhanu-ai ǁaes ǃoas tsîna ge hā, ǂguin ân ge ǃgaroǃhūb ǃnân hâ hîa ǂhīǁō-i xa ge hāǂamhe, xaweb ge sa ǁaiba gaxuse hâ tama ge i. 21 ǁNāpab ge ǂanǂansa ǀhapio khoeb ǁîna ge ǃhaese ǁkhaubaba ge hâ i. Aronni ge ǁîna pristerse mâǂgâba tsî ǀgore tsî ǃgâihamxūna ǁoreǀûbas ǃaroma ge ǁguiba. ǀGoredi tsî ǃgâihamxūn tsîna ǁâtanin ase sîsenū tsîb ge sa ǁaiba mâǃoa tsî tsūǀkhāba ge ǀamǀam. Nēsa dīs ǀkhab ge ǁîb a sa ǃgā ǃkhaisa ge ǁgau. 22 ǁÎb ge Elob di ǁaiba, ǁîb di ǀgaib ǂûb tamas ka io toroǂnubis ǀkhas ose ge dan. ǁNās ǃās ǃnâb ge sida aboxagu ǀkhats ge nūs ǃnâ-ū dī hâ i mîmāde ǃoa ra ǃgapaǀîse ǁkharabats nî ǀamǀamse ge ǀgore. 23 ǁŌ hâ sorodi ge ǀnai ǁgoeǂamaigu hâse ge ǁgoe i, xaweb ge sa ǁaibats nî ǃkhōdawa tsî ûitsamase ǃgau hâna ǃaruǀî ǂkhôadī tide ǃkhaisa ge ǁkhauba. 24 ǁÎb ge gaxu anaǂamsarab, ǀhommi tsî ǃhūbaib tsîkha di ǁgauǁgaudi ǀkha ge anihe hâ iba ge ana hâ i. Sida aboxagu di ǃgôasib ǃoab ge haka raigu di xoaǂgāǃnâhe hâ ǀuide ǁkhaib âb ai ge ūhâ i tsî sa ǃgôasib ge anu-anusen xū-i xase ǃkhaiǀgapas âb ai ge ǁgauǂuihe hâ i. 25 ǁŌb di ǀHomǃgāb ge nē xūna ǃao tsî ge māǁnâsen. Nē-i ge ǁaib di ǂkhari hōǃâs ǀguisa ge ī-i, xawe i ge ge ǂâu hâ i.
© Khoekhoegowab Elobmîs © Bible Society in Namibia, 2020.
