2 Kroniks 22 - Khoekhoegowab New Translation 2020 (KKG20)

Judab di gao-aob Ahasiab

1 Arabiaǁîn ge ǃhūba ǁnāǂam tsî gao-aob Jorammi ôagu hoaga ǃgam tsî hoagu xa ǂkham ǀgôab, Ahasiab ǀguiba ge ǁnāxū, on ge Jerusalems ǁanǂgāsabena Ahasiaba, ǁîb îb soas ǃnâ gao-aose ge mâi. 2-3 Ahasiab ge ǀgamdisiǀgamǀa kurixab a hîa ge gao-ao kai, tsîb ge ǀgui kuriba Jerusalems ǃnâ ge ǂgaeǂgui. ǁÎb tsîn ge gao-aob Axab surib di aiǁgausa ge sao, ǁîb îs Atalias, gao-aob Axab ôa tsî Israeli gao-aob Omrib ǁnuris gere ǀapemā tsî ǂgaeǂhapu bi xui-ao. 4 ǁÎb ge ǃKhūb ǃoagu ge ǁore, ǁîb îb di ǁōb khaoǃgân ge nau khoen, gao-aob Axab surib dina ǁîb di ǀapemā-ao kai tsî ǁîb di ǁnāsa ǃaroma xui-ao. 5 ǁÎn di ǀapemāsa sao tsîb ge Israeli gao-aob Axab ôab Jorammi ǀkha, Siriab gao-aob Hasaeli ǃoagu ge torodī. Ramots Gileadi dis tawab ge Joramma torob ǃnâ ge tsuihe. 6 ǁÎb ge Jesreels ǁga Ramas ǃnâb ge Siriab gao-aob Hasaeli ǀkhab ge ūhâ i ǃkhammi ǃnâ hō ǀhapidi âba xub nî ǂgause ge oa. Tsîb ge Judab gao-aob Jorammi di ôab Ahasiaba ǁnāpa Axab ôab Joramma nî sarise ge sī, ǁîb ge ǀaesen hâ i xui-ao.

7 Jorammi ge Ahasiaba sari, saris ǃnâ-ub ge Eloba Ahasiab di ǁnāsa ge ī kai. Jorammi ge ǁnāpa sīs khaoǃgâ kha ge ǁîkha Nimsib ôab Jehub, ǃKhūb xa ge Axab gaosisab nî hîkākāse ǁhûiǂuiheb ǃoagu ge torodī. 8 Elob di ǁkharabab Jehuba Axab gaosis ǂama ra dīǀoaǀoa, hîab ge ǁîba Judab di ǂamkhoegu tsî Ahasiab ǃgâsagu di ôagu, Ahasiab ǀkha ge ǁnāpa sīga ǀhao-ū tsî ǁîgu hoaga ge ǃgam. 9 ǁNās khaoǃgâ gu ge Ahasiaba ôa tsî Samarias ǃnâb gau hâ hîa hō, tsî Jehub tawa sī-ū tsî ge ǃgam bi. Xawen ge ǁîb ǁnaosab gao-aob Josafati, ǃKhūba ge ǁîb di ǂgaob hoab ǀkha gere ǃoabab di ǃgôasib ǃaroma, Ahasiaba ǃgôasib ǀkha ge ǁkhō.

Ahasiab di suriba xu i ge ǂgaeǂguisa ū ǁkhā khoe-i xare-e ǃgau tama ge i.

Judab gao-aos Atalias

(2 Gao-aogu 11:1-3)

10 Ahasiab îs Atalias ge ǀgôab âs go ǃgamhe ǃkhaisas ge mûo, hoaraga khoen Judab gao-aob surib din nî ǃgamǂuihe ǃkhaisa ge mîmā. 11 Ahasiab ôab Joasi ǀguib ge ge ûiǂoa. ǁÎb ge nau gaoǀgôagu ǀkhab nî ǃgamhes aiǃâ, Ahasiab di ǃgâs tsî ǁkhāti gao-aob Jorammi ôas, prister Jojadab ǀkha ge ǃgame hâ is, Jehosebas xa ge huiǂuihe. ǁÎs ge ǁîb tsî ǀgôaǃûi-aos âb tsîra, ǃgamheb tidega Tempeli tawa, ǁomǃnâ-oms ǃnâ ge gaugau. 12 ǁÎb ge ǁnāpa ǃnani kurigu kōse sâusase ge hâ, Atalias gao-aose ǂnôas kōse.