Israeli khākhoena dans ǃaroma hâ ǀgores
ǁNaetsanas
Asafi Psalms
1 Elotse, tā ǃnō re;
tā ǃnō, î tā ǃnōǃari re Elotse.
2 Mû re! Sa khākhoen ge ra khâikhâisen
ǁnān satsa ǁkhan hân ge danadi âna ra ǃhâkhâi.
3 ǀHôagao ǀapeǀhaoden ge sa khoen ǃoagu ra dī,
ǀguipan ge ǁnān ǁînats ra ǃûin ǃoagu ra ǀapeǀhao.
4 “Hā, î da ǁaes âna hîkākā,
îs Israeli ǀonsa tā ǁkhawas tsîna ǂâihōhe” tin ge ra mî.
5 ǀGuiǂâixasen ge ǀapeǀhao
tsî sa ǃoagu ǃgaeǀhaosa ge dī:
6 Edommi tentomdi tsî Ismaelǁîn,
Moabǁîn tsî Hagarǁîn;
7 Gebalǁîn, Amonǁîn, Amalekǁîn,
tsî Filistiab tsî Tirus di ǁanǂgāsaben hoana.
8 ǁKhātin ge Asiriaǁîn tsîna ǁîn ǀkha ge ǁaeǁaesen
tsîn ge ǁôab ase Loti ôana ge ība.
9 Midianni ǀkhas khami ǁîna dī-ū re,
Siserab ǀkha tsî Jabinni ǀkhats ge Kisonni ǃārob tawa dī khami.
10 ǁÎn ge Endors tawa ge hîkākāhe
tsîn ge ǃhūba ǀaruse ge ība.
11 ǁÎn di ǀgapiǃgôasan ǀkha Oreb tsî Seeb tsîkha ǀkhas khami dī re
Sebab ǀkha, Salmunab ǀkha tsî hoaraga gaosagu ǁîn digu
12 hîa “A ge ūbasen,
Elob di ǃûǃhūba” ti ge mîgu ǀkhas khami.
13 Ti Elotse ǁîna sares khami dī re,
ǀhōb, ǂoab xa ra ǃgomheb khami.
14 ǀAes haiǀgomsa ra khauǃkhūs khami
ǀaeǁhabub ǃhomga ra ǂhubib khami.
15 ǁNātits ge ǁîna ǁgaoǂoas khami nî ǃgôaǃgon
tsîts ge sares âts ǀkha ǁîna nî ǃaoǃao.
16 Ais âna taob ǀkha ǀoaǀoa re
on ge sa ǀonsa nî ǂgaiǀî ǃKhūtse.
17 An tao tsî ǃhuri ǀamosib kōse;
an taotaohe în kāǁō.
18 În ǂan sats ǀons âts a ǃKhūts,
ǀguits a Hoan xa ǀGapi hoaraga ǃhūbaib ai ǃkhaisa.
© Khoekhoegowab Elobmîs © Bible Society in Namibia, 2020.
