Elob di ǀkhaeb Israels ǂama
1 “Satsa khoenôa ǀgôatse, Israeli ǃhomga kēboba îts mî: ‘Israeli ǃhomgo ǁnâu re ǃKhūb di mîsa. 2 Nētib ge ǃKhūb Eloba ra mî. Sadu khākhoeb ge sadu ǂama âi tsî ra mî, ǁnā ǃhomgu ǀnaisa xu mâgu ge ge sida di kai.’
3 “ǁNā-amaga kēbo, î mî: Nētib ge ǃKhūb Eloba ra mî: Sago ge hoa ǀkhāga xu hîkākāhe tsî ge ǂkhūǂkhūhe, tsî du ge ge ǃgau hâ ǁaedi di ūhâxū kai. Sago ge ǀhoehe tsî ge ǃhōhe. 4 ǁNā-amaga sago Israeli ǃhomgo ǁnâu re tare-e ǃKhūb Eloba ra mî ǃkhaisa. Nētib ge ǃKhūb Eloba ǃhomgu, ǃnâugu, ǃāgu, ǃgoaǃnāgu tsî hîkākāsa ǃkhaidi tsî ǃū-aisa ǃādi, ǂnamipe hâ ǁaedi di ǁkhâuǁnâxū tsî ǃhōxū kai gen ǃoa ra mî.
5 “Nētib ge ǃKhūb Eloba ra mî: Amase ta ge tita khau ra ǁaib ǃnâ ǃgau hâ ǁaedi ǂama tsî Edommi din ti ǃhūba ge aitsama ūbasenn hoan ǂama ra mî. ǁÎn ge ti ǃhūb tsî ǃû-aidi tsîna kai dâb tsî ǃharaxūb ǀkha ge ǁkhâuǁnâ.
6 “ǁNā-amaga Israela kēboba, î ǃhomgu, ǃnâugu, ǃāgu tsî ǃgoaǃnāga ǃoa mî. Nētib ge ǃKhūb Eloba ra mî: Tita ge ti ǁaib tsî ǀarab ǃnâ nau ǁaedi ge sado ǃhō tsî ǃharaxū ǃkhais xa ra ǃhoa. 7 Nētib ge ǃKhūb Eloba ra mî. Ti ǃomma ta ge ra ūkhâi. Amase di ge sadu ǂnamipe hâ ǁaede ǁîdi taosiba nî tani. 8 Xawe sago Israeli di ǃhomgo ai gu ge ǁnâuga nî hâ tsî nî ǂûtani, ti ǁaes Israels ǃaroma, ǁîn di hās a ǀgū amaga. 9 Tsî mû, tita ge sago ǀkha hâ tsî sago nî kōǃgâ tsîb ge sago ǃhūba ǃhūǃgaohe tsî ǃkhomma ǁnāpa nî tsorohe. 10 Tsî ta ge sago ǁaesa nî ǂguiǂgui, hoaraga Israelǁaesa. ǃĀdi ge nî ǁanǃnâhe tsî hîkākāsa ǃkhaidi ge ǁkhawa nî ǂnubikhâihe. 11 Tita ge khoen tsî ûitsama xūn tsîna ǁnāpa nî ǂguiǂgui, tsîn ge ǂgui tsî nî ǂûtanixa. Aiǃâs khamin ge khoena ǁnāpa nî ǁan tsî ta ge ǁîna ǂguros ǃgâ-ai ǃnāsase nî ǃgâiǃgâxa kai. O du ge tita a ǃKhū ǃkhaisa nî ǂan. 12 Tsî ta ge khoena ǁkhawa sago ai nî ǃgûma kai, ti ǁaes Israelsa. ǁÎn ge sago nî ūbasen tsî sago ge ǁîna ūhâxūse nî iba tsî ǁîna ǁkhawa ǀgôan âna ǂoaǃnâ kai tide.
13 “Nētib ge ǃKhūb Eloba ra mî: ‘Sago ǃoan ge ra mî: Sago ge khoena ra hapu tsî ǁaesa ǀgôan âna ra ǂoaǃnâ kai. 14 Xawe go ge ǃaruǀî khoena hapu tide tsî ǃaruǀî ǁaesa ǀgôan âna ǂoaǃnâ kai tide,’ ”
tib ge ǃKhūb Eloba ra mî.15 “Tsî ta ge ǃaruǀî ǁaedi xats ǁkhawa nî ǃhōhesa mā-am tide tsîts ge ǁaedi ǃharaxūba ǃaruǀî tani tide, tsî ǁaesa ǁkhāti ǃnôa kai tide,”
tib ge ǃKhūb Eloba ra mî.Israels ǀasa ûib
16 ǃKhūb di mîs ge tita ǃoa ge hā: 17 “Khoenôa ǀgôatse, Israelǁîn ge ǁîn di ǃhūb ǃnân ge ǁan hâ i ǁaeb ai ǁîba ge ǃanuoǃnâ kai, ǁîn di tanisens tsî dīgu ǀkha. ǁÎn di tanisens ge ti mûǁae ǁkhâǀaesen hâ taras di ǃanuoǃnâsib ǁkhāb khami ge ī i. 18 ǁNā-amaga ta ge ti ǁaiba ǁîn ai ge ǁhōǂui, ǁîn ǃhūb ǃnân gere ǀaoǂnâxū tsî ǁgôa-elogu ǀkhan ge ǃhūba ǃanuoǃnâ kai ǃkhais ǃaroma. 19 Tita ge ǁîna nau ǁaedi ǃnâ ge ǀgaruǀgaru tsî nau ǃhūga ǃoa ge doeǁgabē. Tita ge ǁîna ǁîn tanisens tsî dīga ǃoa ǁkhara. 20 Xawen ge nau ǁaedi ǃnân ge sī, o ti ǃanu ǀonsa ge ǀuriǀuri, khoen ge ǁîn xa ‘Nēs ge ǃKhūb di ǁaesa, xawen ge ǁîb di ǃhūba xu ge ǂoa’ ti mî amaga. 21 Ti ǃanu ǀons, Israelǁîn ge ǁnā ǁaedi, ǁîdi ǃnân ge sīdi tawa ǀuriǀuris xa ta ge ge ǂâiǂhansen.
22 “ǁNā-amaga Israelǁîna mîba: ‘Nētib ge ǃKhūb Eloba ra mî: Tita ge nē ǃkhaisa sadu ǃaroma dī tama hâ, xawe ti ǃanu ǀons sadu ge ǁîdi tawa du ge sī ǁaedi ǃnâ ǀuriǀuris ǃaroma ra dī. 23 Tita ge ti kai ǀons, ǁaedi ǃnâ du ge ǀuriǀurisa nî khai, o di ge ǁaede tita a ǃKhū ǃkhaisa nî ǂan,’ tib ge ǃKhūb Eloba ra mî. Tita ge sadu ǃnâ-u ǁaedi mûǁae ti ǀons ǃanusiba nî ǁgau. 24 Tita ge sado ǁaede xu nî ū tsî ǃhūgu hoaga xu ǀhaoǀhao tsî sadu ǃhūb ǃoa nî oahā-ū. 25 Tita ge ǃanu ǁgam-i ǀkha nî ǀgapi du, î du sadu ǃanuoǃnâsigu hoaga xu ǃanu. Tsî ta ge sadu ǁgôa-elogu hoaga xu nî ǃanuǃanu du. 26 Tita ge sado ǀasa ǂgaob tsî ǂâisa nî mā. Tsî ta ge ǀuiǂgaoba sado xu ūǂui tsî ǁganǂgaoba nî mā du. 27 Tsî ta ge ti Gagaba sadu ǃnâ nî ǂgā, î du ti ǂhanuga sao tsî ti mîmāde ǁnâuǀnam tsî dī.
28 “Tsî du ge sadu aboxaga ta ge mā ǃhūb ǃnâ nî ǁan, tsî du ge nî ti ǁae tsî ta ge tita nî sadu Elo. 29 Tita ge sado ra ǀuriǀuri xūn hoana xu nî ǃnoraǃnora du. Tita ge ǃhoroba nî mîmā, îb ǂguiǂguisen tsî i ge ǃâtsūǀkhā-i xare-e ǁkhawa sadu ǂama hā tide. 30 Tita ge haidi di ǂûn tsî ǃhanagu di ūǀkhīn tsîna nî ǂguiǂgui, ǃâtsūǀkhāb ǃaroma du nau ǁaedi xa ǃharaxūhe tidese. 31 O du ge sadu ǂkhawa tanisens tsî tsūdīgu xa nî ǂâiǂâisen tsî sadu ǂhunudu xa nî uixa, sadu ǁoreb tsî tsūdīgu ǂama. 32 As nēsa sadu tawa ǂansa. Tita ge nē ǃkhaisa sadu ǃaroma dī tama hâ, tib ge ǃKhūb Eloba ra mî. Sadu dīgu ǂama du ge tao tsî nî ǃharaxūhesa, sadu Israelǁaes dido.”
33 Nētib ge ǃKhūb Eloba ra mî: “Sadu ǂhanuoǃnâsiga xu ta ga ǃanuǃanu du tsēs ai ta ge nî dī, sadu ǃādi nî ǁanǃnâhe tsî di ge khôaǂkhūsa ǃkhaide ǁkhawa nî ǂnubikhâihesa. 34 Tsî hîkākāsa ǃhūb ge nî sîsenhe, ǁnāpa-u ra ǃkharun mûǁaeb ge ǃū-aisa ǃkhaise ī is ǃās ǃnâ. 35 ǁÎn ge nî mî, ‘Hîkākāsa ge i ǃhūb ge Edenǃhanab khami go ī, tsî di ge hîkākāhe tsî ǃū-aisa tsî khôaǂkhūsase ge ǁgoe i ǃāde, ǁanǃnâhe tsî omǂnamihe hâ.’ 36 O di ge sadu ǂnamipe ǃgau hâ ǁaede nî ǂan tita ǃKhūta khôaǂkhūsa ǃāde ǂnubikhâi tsî ǃū-aisa ge i ǃkhaib ai ra ǃhanasa. Tita ǃKhūta ge ǁî ǃkhaisa go mî tsî nî dī.
37 “Nētib ge ǃKhūb Eloba ra mî: Nēsa ta ge Israelǁaes dina nî mā-am ǂgan ten nîsa, î ta ǁîna dība. Tita ge ǁîna gūn khami nî ǂguiǂgui. 38 ǁGuibas di gūn, ǁâudīgu ǁaeb ai Jerusalemsa ra ǀoaǀoas ǁkhās khami di ge khôaǂkhūhe hâ ǃāde, khoen ǂnubidi xa nî ǀoa, tsîn ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
