ǀAib ǃoagu hâ ǃkhâikhoms
1 Ti ôatse ti gā-aisib ai ǃgaoǃgâ;
ti gā-aisib di ǀapemāsa ǃgâ,
2 ots ge mâtits nî tanisensa nî ǂan,
tsî mîdi âts ge ǂansats ūhâsa nî ǁgauǂui.
3 ǁGoeǃnâ khoes di amǁgaukha xub ge daniba ra ǂnâ,
ǁîs mîdi ge ǀkhera-oli-i ǃgâ-ai a ǂkhanu.
4 ǀAms ain ge hoana aukoreb khami au,
tsî hoaǀkhāǀāgôab khami a ǀā.
5 ǂAira âs ge ǁōb ǃoa ra ǂgaeǂgui;
dāǃharodi âs ge ǁōb ǃoa garu daoba ra sao.
6 ǁÎs ge ûib daoba saos ǀkha ǁae tama hâ;
ǀūǂamses ge ǁîsa ǂgaeǂhapus daob ai garu.
7 ǁNā-amaga ti ôago, nēsi ǃgâ te,
î tātsēs tsîna tā mî ta gena ǀuru.
8 ǃNūse ǁîsa xū hâ,
î tā ǁîs oms di daos tawa ǀgū.
9 Tā sa ǃgôasiba māxū
tsî ǃgâi kurigu âtsa ǀkhomoǃnân ǃomǁae māǁnâ.
10 ǃHaokhoen ge sa ǃomkha di xūreba nî ǀama,
sa ǃoaǂuis ge ǀkhara khoen omdi ǁga nî ǃgû.
11 Sa ûib di ǀams ga hā
tsîs ga sorosa hapuǁnâǀkhāhe hâ khami ī,
ots ge ǃgaes ǀguisa ǁgoe nî hî.
12 Ots ge nî mî:
“Mâtikōse ta kha tita ǂgōǀauhesa ge ǃhuisa i,
tsîb ti ǂgaoba ǃkhâikhomhesa gere ǃharaxū?
13 Ti ǁgauǃnâ-aon di domma ǁnâuǀnamoǃnâ
tsî ta ge tita ra ǁkhāǁkhāna ǃgâ ǂgao tama ge i.
14 “Nēsi ta ge hoaraga ǀhûhâsib aiǃâ kai ǂōǂōsib ǃnâ hâ.”
15 Sa ǂhunuma xorasa xu ǁgam-e ā,
sa ǂhunuma tsausa xu ra dâu ǁgam-e.
16 Sa ǀaude kha ǃhūbaib hoaba nî ǃgûǂkhū
tsî ǁgamǃāga hoa ǃkhaiga nî dâuǂkhū?
17 ǁÎdi ge sas ǀguisa i,
tsî ǀūhesa khoen ǀkha ǀgoraguhe tide.
18 As sa ǀausa ǀkhaehe,
î sa ǂkhamsis di taras ǀkha ǃgâiaǂgao.
19 ǀNammi xa ǀoa hâs, tarexais khami a îsasa.
A ra ǁîs di samra hoaǁae ǃgâise tsâ kai tsi;
ab ǁîs ǀnamma hoaǁae ǀhoro kai tsi.
20 Ti ôatse, tare-i ǃaromats kha,
ǀkhara khoes di ǃkhōsis ǃnâ nî hâ?
Tare-ets ǀkhara taras di ǁôakha ǃnâ sī nî ǁgoe?
21 ǃKhūb ge khoeb di ǃgûdaogu hoaga ra mû
tsî ǁîb ǃgangu hoaga a ǂan.
22 ǂKhabadī-aob ge ǁîb ǂûb di dīsādi xa nî ǂhaohe
tsî ǁîb ǂûb di ǁoren tsurigu xa nî ǃkhōhe.
23 ǁNâuǀnamoǃnâsib ge ǁîb ǁōba ra ǃaroma
tsî ǁîb gâsib ge ra kāǁhapu kai bi.
© Khoekhoegowab Elobmîs © Bible Society in Namibia, 2020.
