ǃKhūb di ǂâis Jeremiab ûib ǃaroma
1 ǁKhawab ge ǃKhūba tita ǀkha ge ǃhoa: 2 “Tā ǃgame tamas ka io ǀgôana nē ǃās ǃnâ ūhâ. 3 Nētib ǃKhūba nēpa ge ǃnae ǀgôan, tsî ǁîn îdi, ǁîna ge ǁoradi tsî ǁgûgu xa ra mî xuige. 4 ǁÎn ge tsûsa ǁōga nî ǁō. Khoe-i xare-i ge ǁîn ǃaroma ǃoa tamas ka io ǁîna ǁkhō tide; ǁîn ge ǃhūb ai ǁgoe ǀarub khami nî ī. ǁÎn ge torob ǃnâ tamas io, ǃâtsūǀkhāb xa nî ǁō, tsî di ge ǁîn di sorode ǀhomanin tsî ǀgurun xa nî hapuhe.
5 “Tā ǃoab hâǃnâ om-i ǃnâ ǂgâ tamas ka io ǃgae nî sīse ǃgû, tamas ka io ǁîna nî ǀkhomse, ti ǂkhîba ta nē khoena xu ge ūbē xuige, tib ge ǃKhūb, ti hâhâ ra ǀnam tsî ǀkhomma ra mî. 6 Hoan, kain tsî ǂkharin ge nē ǃhūb ǃnâ nî ǁō. ǁÎn ge ǁkhōhe tide tsî khoe-i xare-i ge ǁîn ǃaroma ā tamas ka io ǃgaosen tamas ka io danadi âna ǂkhom tide, ǃoab âna ǁgaus ǃaroma. 7 Khoe-i xare-i ge ǃoa hân ǀkha ǂû tamas ka io ā tide, ǁî-i ǀgūkhoe-i ga ǁō, o ǁî-e ǁkhaeǂgaos ase, ǁgûn ga ǁî-e ǁōxū xawes tsîna.
8 “Tā ǁkhāti ǂûǁaes hâpa ǂgâ tsî ǁîn ǀkha nî ǂû tsî āse ǂnû. 9 Nētib ge ǃKhūb Hoaǀgaixab, Israeli Eloba ra mî. Tita ge dâb tsî ǃgâiaǂgaob di ǀōgu tsî ǃgameǁâus di ǃgâiaǂgaoga sadu mûǁae nî ǃnōǃnō.
10 “Tsîts ga nē khoena nē mîdi hoade mîba tsîn ga ǁîna ‘Tare-i ǃaromab ǃKhūba nē ǂkhabab hoaba sida ǃoagu ge gowaǂui? Mâsa sida ǃûǂamsa? Mâba ǁoreb hîa da ǃKhūb sida Elob ǃoagu ge dība?’ ti dî tsio, 11 o ǁîna nēti ǃeream re: ‘Sadu îgu ge tita ǁnāxū tsî ǀnî eloga sao tsî ǁîga ǃoaba tsî ge ǀgoreǀî, tsî du ge ti ǂhanuba ǃkhōǀgaipe tama ge i. 12 Tsî sadu aboxagu ǃgâ-ai du ǁîsa ra dī. Sadu hoadu ge ǃnâudanaxa tsî a ǂkhabaxa tsî du ge ǁnâuǀnam te tama hâ. 13 ǁNā-amaga ta ge nē ǃhūba xu nî ǀnamiǂui du, sadu tamas ka io sadu aboxan tsîn ge ǀū ib ǃoa, tsî du ge ǁnāpa ǀkhara elona tsēb tsî tsuxuba nî ǃoaba, ǀkhom-i xare-e ta ǁgau du tide amaga.’ ”
ǃHūsisa xu oahās
14 “Tsēdi ge nî hā ǁîdi ain khoena ǃaruǀî ti ǀons ǃnâ ‘ǃKhūb, Israelǁaesa Egipteba xu ge ǂgaeǂguiǂuib ûitsamao’ ti nū tidede, 15 xawen ‘ǃKhūb Israeli ôana ǀapas ǃhūb tsî hoaraga ǃhūgu ǁîgu ǃoab ge ǁîna doeǁgabēga xu ge ǂgaeǂguiǂuib a ûitsamao’ ti nî nūde. Tita ge ǁîna ǁîn ǂhunuma ǃhūb, ǁîn aboxaga ta ge māb ǁga nî oahā-ū”
tib ge ǃKhūba ra mî.ǃGoaxa a ǁkharab
16 “ǂGui ǁauǃkhō-aoga ta ge ra sî, nē khoena nî ǃkhōse,”
tib ge ǃKhūba ra mî.“ǁNās khaoǃgâ ta ge ǂgui ǃau-aoga nî sî tsî gu ge ǁîga ǁîna mâ ǃhommi tsî mâ ǃnâub tsî mâ ǁhoaǁkhereb hoaba xu nî ǃau. 17 Ti mûra ge ǁîn ra dī xū-i hoa-e ra mû. Xū-i xare-i ge ti aiǃâ gaugausa tama hâ, ǂhanuoǃnâsib ân ge ti aiǃâ ǂganǃgâsa tama hâ. 18 Tita ge ǁîna ǃhonarisase ǁoren tsî ǂhanuoǃnâsigu ǃaroma nî mādawa-am, ti ǃhūban ge ǁîn di ui-uisa ǁgôa-elogu ǀkha ǀuriǀuri tsî ti ǀumisa ǁîn di ǁgaiǁgaisan ǀkha ǀoaǀoa amaga.”
Jeremiab ǀgores
19 ǃKhūtse sats ge ti ǀgai tsî a ǁhaiǁhâǃkhai, ǃgommi tsēs ai. ǃHūbaib ǀamsa xu di ge ǃhaode sats ǃoa hā tsî nî mî: “Sida aboxan ge ǂhumi elogu ǀguigu ose, xū-i xare-e ūhâ tama hâ, harebeoǃnâ ǁgôa-elogu ǀguiga. 20 Khoeba kha elo-e dībasenni nî? ǁNāti īgu kom elo tamao!” 21 Ob ge ǃKhūba ra mî: “Tita ge ǁîna nî ǂan kai, ti ǀgaib tsî ti ǁkhāsiba ta ge ǁaede nî ǂanǂan, ǁîn ge tita a ǃKhū ǃkhaisa nî ǂan.”
© Khoekhoegowab Elobmîs © Bible Society in Namibia, 2020.
