Kēbosis tsî gowagu di mādi
1 ǀNamma ǂgurose saoǃgon, î du gagasi māde ǁkhore re, ǃnāǂamsase kēbosis di māsa. 2 Khoe-i hîa gagasi gowagu di māsa ūhâ-i ge khoena ǃoa ǃhoa tama hâ, xawe Elob ǃoa ra ǃhoa. Khoe-i xare-i ge ǁnâuǃā tama hâ, xawe i ge Gagab ǃnâ-u ǂganǃgâsiga ra ǃhoa. 3 Tsî kēbo ra-i ge khoena ǂnubikhâis, ǂgaoǂgaoǃnâs tsî ǁkhaeǂgaos tsîn ǃaroma ra ǃhoa. 4 Gowagu māsa ūhâ khoe-i ge ǁî-aitsama ra ǂnubikhâisen, xawe kēbo ra-i ge kerkheba ra ǂnubikhâi. 5 Sadu hoadu ǃhao gowagu ǃnâ nî ǃhoa ǃkhaisa ta ge ra ǁkhore, xawe ǁnās ǃgâ-ai kēbo du nîsa. Kēbo ra-i ge ǃkharaga gowagu māsa ūhâ-i ǂamai a kai, ǁnā tamas ka io i ga ǁguiǃā ǁkhāo, îb hoaraga kerkheba ǁnās ǃnâ-u ǂnubikhâihe. 6 Xawe nēsi, ǃgâsado, sadu tawa ta ga ǃhao gowagu ǃnâ ra ǃhoase sīo, tarebe harebe-e i nî sado ūhâba, sadu ǃoa ta ga ǂhaiǂhais, ǂans, kēbosis tamas ka io ǁkhāǁkhās ǃnâ ǃhoa tama io?
7 Ûio xūn hîa ǀō-e ra mān, ǂnunib kas, harps kas hoasa i kom ǁnās ǁkhās xase īo. ǃGāsa ǀōban ga dī tama io, ots ge ǁnâuǃā tide tare-i ra ǀkhōhe ǃkhaisa? 8 Tsî xâiǁnâs di ǀōb ga ǃgāsa tama io, tari-e torob ǃoa nî ǂhomisen? 9 ǁNās ǁkhās xase sadu tsîna; khoen ra ǁnâuǃā gowab ǃnâ du ga ǃhoa tama io, mâtin kha ǃhoahe rana nî ǁnâuǃāhe? O du kom ǂoab ǃnâ ra ǃhoao. 10 Nētikō ǂgui gowagu ge ǃhūbaib ai hâ, xawe ǁîgu di ǀgui-i tsîn ge ǂâibasenoǃnâ tama hâ. 11 Xawe gowaba ǁnâuǃās ǁkhāsiba ta ga ūhâ tama io, o ta ge gowab ǃhoa-ao-i ǃoagu nî ǃhaokhoe tsî ǁî-e ti ǃoagu nî ǃhaokhoe. 12 Sadu tsîn ǀkha i ge ǁnāti ī. Gagasi māde du a ǀaexabas ǁkhās khami kerkheba ǂnubikhâis ǃaroma hâ mādi ǃnâ ǀaexa re.
13 ǁNā-amaga a i ǁnā-i ǃhao gowagu di māsa ūhâ-e ǀgore, mî-i ra xūna ǂnûiǃkhunis di mās ǃaroma. 14 ǃHao gowa-i ǃnâ ta ga ǀgoreo, os ge ti gagasa ra ǀgore, xawes ge ti ǂâisa ǁnāpa hâ tama. 15 Mâti ta ǁnâi nî dī? Gagas ǀkha ǀgore tsî ta ge ǁkhāti ǂâis ǀkhas tsîna nî ǀgore; gagas ǀkha ǁnae tsî ta ge ǁkhāti ǂâis ǀkhas tsîna nî ǁnae. 16 Sats ga gagas ǃnâ koasa māo, mâtin kha ǁnān hîa ǁnâuǃā tsi tamana, gagas ǀkhats ga gangano sa gangans ai “Amen” ti nî mî ǁkhā, tare-ets ra mî ǃkhaisan a ǀū hîa?
17 Sats ge amase ǃgâise a gangan ǁkhā, xawe-i ge nau-e ǂnubikhâihe tama hâ. 18 Tita ge Eloba ra gangan, sadu hoadu xa ta ǃnāsase ǃhao gowagu ǃnâ ǃhoas di māsa ūhâ ǃkhaisa. 19 Xawe ta kerkheb ǀhaos ǃnâ koro mîdi tita ra ǁnâuǃāde mî ra ǂgao, nauna ta ǁkhāti nî ǁkhāǁkhāse, disiǀoadisi mîde ta nî khoen ǁnâuǃā tama ǃhao gowa-i ǃnâ ǃhoas xa.
20 ǃGâsado, tā ǂâiǀgaub âdu ǃnâ ǀgôa, xawe ǂkhabab ǃnâ ǀgôaro-i ase ī, î du ǁnâuǃāb ǃnâ kaikhoe kai. 21 Xoas ǃnâ i ge xoamâihe hâ:
“ǃHao gowagu
tsî ǃhaokhoen di mîdi ǀkha
ta ge nē ǁaes ǀkha nî ǃhoa,
xawes tsînan ge ǁkhāti ǃgâ te tide,
tib ge ǃKhūba ra mî.”
22 Os ge ǃhao gowagu di māsa sao-i ase ǂgomoǃnâna ība, xawe ǂgom ran ose tsîs ge kēbosis di māsa a ǂgom ran di tsî ǂgomoǃnân di tama hâ.
23 Hoaraga kerkheb ga ǀguipa ǀhao tsîn ga hoatsama ǃhao gowagu ǃnâ ǃhoa, tsî-i ga ǁnâuǃā tama-i tamas ka io ǂgomoǃnâ-e ǂgâxa, o i kha ǃkhau du hâ ti mî tide? 24 Hoan ra kēbo hîa i ga ǂgomoǃnâ-i tamas ka io ǁnâuǃā tama-e ǂgâxa, on ge ǁî-i mâpa tsū ǃkhaisa ǁgau tsî ǁore-ao-i a ǃkhaisa ra gowadan. 25 O gu ge ǂganǃgâsigu ǁî-i ǂgaob diga nî ǂhai tsî-i ge ǃhonǁgoa, Eloba ǀgoreǀî tsî Elob amase sadu ǁaegu hâ ǃkhaisa nî ǁguiǁnâ.
ǀHaohâb ǃnâ nî hâse i ǃamkusib
26 Mâtisa kha ǁnâi, ǃgâsado? ǀHao du ka, o-i ge ǀgui-e ǁnaetsanadi, ǀnî-e ǁkhāǁkhādi, nau-e ǂhaiǂhais, ǀnî-e ǃhao gowagu ǃnâ ǃhoas di mās tsî nau-e ǁîga ǂnûiǃkhunis di māsa nî ūhâ, tsîn ge nēn hoana kerkheba ǂnubikhâis ǃoa nî sîsenūhe. 27 Tsî khoe-i ga ǃhao gowagu ǃnâ ǃhoao, an ǀgam tamas ka io ǃnonase saogubes ai ǃhoa, î-i ǀgui-e ǁguiǃā. 28 Xawe ǁguiǃā-ao-i ga ǀkhaio, a i kerkheb ǃnâ ǃnō, a i ǁî-aitsama ǃhoabasen tsî Elob ǃoa. 29 A gu ǀgam tamas ka io ǃnona kēbo-aoga ǃhoa, în nauna tare-i ra mîhe ǃkhaisa ǀgoraǃgâ, 30 xawe ǀnîb ǁnāpa ǂnôab ga ǂhaiǂhaisa ǃkhōǃoao, a i ǂguro ǃhoa-ao-e ǃnō. 31 Hoadu ge ǀguiǀguibes ai a kēbo ǁkhā, hoan nî ǁkhāǁkhāhe tsî ǂgaoǂgaoǃnâhese. 32 Tsî kēbo-aogu ge ǁîgu di gagadi ai a ǀhonkhoe, 33 Elob ǀhomaxasib di Elo tama amaga, xaweb ge a ǂkhîb di Elo.
Hoa kerkhegu Elob khoen digu ǃnâ i īs ǁkhās ase 34 adi tarekhoede kerkheb ǃnâ ǃnō. ǁÎdi ge ǃhoasa mā-amhe tama tsî di ge ǃgamǃgamsen hâse di nî hâ ǃkhaisa mîmāhe hâ, ǂhanub tsîn ra mî khami. 35 Tsî-i kom xū-i ǁîdi ra ǁkhāǁkhāsen ǂgao-e ga hâo, a di oms tawa ǁîdi ǂhunuma aoga dî. Tarekhoede i kerkheb ǃnâ ǃhoasa taotaosaba amaga.
36 Elob di mîsa kha sado xus ge ǃhui tamas ka io sadu ǀguidu ǃoas ge sī? 37 Khoe-i ga kēbo-ao tamas ka io, i a gagasi khoe ti ǂâio, a i mûǂan sado ta ra xoaban a ǃKhūb di mîmā ǃkhaisa, 38 xawe ga ǁîsa ǂanǃgâ tama ī-i, ge ǁî-i tsîna ǂanǃgâhe tide. 39 ǁNā-amaga, ǃgâsado, kēbo du nîsa ǀaexase tura, î du ǃhao gowagu ǃnâ ǃhoasa tā ǂkhā. 40 Xawen xūn hoana ǃamkuse tsî saogub ǃnâ dīhe.
© Khoekhoegowab Elobmîs © Bible Society in Namibia, 2020.
