Gao-aob ge Jesajab tawa ra ǀape-ôa
(2 Gao-aogu 19:1-7)1 Gao-aob Hiskiab ge ǁnāsa ǁnâu, ob ge saran âba ǀkhau, ǃoasarana ana tsî ǃKhūb ommi ǃnâ ge ǂgâ. 2 ǁÎb ge gao-ommi ǂammâisab, Eliakimmi, xoa-aob Sebnab tsî kai pristergu, ǃoasarana ana hâgu tsîga Amob ôab, kēbo-aob Jesajab ǃoa ge sî. 3 ǁÎgu ge ǁîb ǃoa ge mî: “Nētib ge Hiskiaba ra mî: ‘Nēs ge ǂōǂōsib tsēsa, ǂgōǀaus tsî taosib tsîn disa; ǀgôaron ǃnaes ge go mâtoa, xawe ǁîna ǁoras ǀgaib ge a ǀkhai. 4 ǀNîsib ge ǃKhūb sago Eloba Rabsakeb mîde ge ǁnâu, ǁîb ǀhonkhoeb, Asiriab gao-aob ge ûitsama Elobab nî ǃhōse sîde, tsî ǃKhūb sago Elob ge ǁnâu mîde ǂgōǀause. ǁNā-amaga ûiǃgau go khoena ǀgoreba.’ ”
5 Gao-aob Hiskiab ǃgāgu ge Jesajab tawa sī, 6 ob ge Jesajaba ǁîgu ǃoa ge mî: “Sago ǀhonkhoeba sī mîba: ‘Nētib ge ǃKhūba ra mî: Tā ǁnâu go go mîdi, Asiriab gao-aob ǃgāgu gere tita mîǁgaiǁgai-ūdi xa ǃaoǃaohe. 7 Tita ǃKhūta ge ǁîb ǃnâ gaga-e nî ǂgā, îb ǂhôa-e ǁnâu tsî ǁîb ǃhūb ǁga ǁaru. Tita ge ǁîb ǂhunuma ǃhūb ǃnâ gôab ǀkha nî hîkākā bi.’ ”
Asiriaǁîn ge ǁkhawa ǀnî ǁgoaǂuisa ra sî
(2 Gao-aogu 19:8-19)8 Rabsakeb ge oahā tsî Asiriab gao-aob Libnab ǃoagu ra ǃkham ǃkhaisa ge ǁnâu; gao-aob ge Lakisa xu ǃgû ǃkhaisab ge ǁnâu xui-ao. 9 Gao-aob ge Etiopiab gao-aob Tirhakab xa ge ǁnâu: “ǁÎb ge ǁîb ǃoagu sī nî ǃkhamse ge ǃgûǂoa.” Nēsab ge ǁîba ǁnâu, ob ge sîsabega Hiskiab ǃoa ge sî, mî rase: 10 “Nētits ge Judab gao-aob Hiskiab ǃoa nî mî: ‘Tāb sa Elob hîats ra ǂgomǃgâba ǂgaeǂhapu tsi, Jerusalems Asiriab gao-aoba māǁnâhe tide ti hâ mîmâis ǀkha. 11 Mû, Asiriab gao-aob ge hoaraga ǃhanagu ǀkha dī ǀgausa du ge ge ǁnâu, ǁîga hoaragase hîkākās ǀkha. Amase du kha nî ǃnoraǃnorahe? 12 ǁAedi ǁgôa-eloga ǁîna ǃnoraǃnora gu ge, ǁaedi ti aiǃgû-aogu ge hîkākāde: Gosans, Harans, Resefs, tsî Edens khoen Telasars ǃnâ ge hâ ina? 13 Hamats gao-aoba mâpab hâ, Arpads gao-aoba, ǃās Sefarvaims gao-aob, Henas gao-aob tamas ka io Ivas gao-aoba mâpa hâ?’ ”
14 Hiskiab ge sîsabega xu ǂkhanisa ǃkhōǃoa tsî ge khomai; ob ge ǃKhūb ommi ǃnâ ǂgâ tsî ǃKhūb aiǃâ ǁîsa ge ǁkhowa-amǃā. 15 Hiskiab ge ǃKhūb ǃoa ge ǀgore: 16 “ǃKhū, Hoaǀgaixats, Israeli Elots, xerugu ǂamai trons ai ǂnôatse, sats ge ǀguri a Elo, ǃhūbaib gaosigu hoagu ǂama; sats ge ǀhommi tsî ǃhūbaib tsîkha ge kurutsa. 17 ǃKhūtse, sa ǂgaesa ǂō re, îts ǃgâ re; ǃKhūtse, sa mûra ǁkhowa-am re, î mû re; Sanherib mîdi hoade ǃgâ re, ûitsama Elobab gere ǃhō-ūde! 18 Amase, ǃKhūtse, Asiriab gao-aogu ge hoaraga ǁaedi tsî ǁîdi ǃhanagu tsîna hîkākā, 19 tsî ǁîn ǁgôa-eloga ǀaes ǃnâ ge ǂhubiǂui, elo tamagu amaga. ǁÎgu ge khoen xa hain tsî ǀuin tsîn ǀkha kuruhe hâ tsî ǁnā-amaga gere hîkākāhe. 20 ǁNā-amaga, ǃKhū sida Elotse, Asiriaǁîna xu ǃnoraǃnora da re, î gu ǃhūbaib gaosigu hoaga sats ǀguits a ǃKhū ǃkhaisa ǂan re.”
Jesajab ǂhôas gao-aob ǃoa
(2 Gao-aogu 19:20-37)21 Ob ge Amob ôab Jesajaba nē ǂhôasa Hiskiab ǃoa sî, î mî: “Nētib ge ǃKhūb, Israeli Eloba ra mî: ‘Asiriab gao-aob Sanherib ǃaroma du ge tita ǃoa ge ǀgore. 22 Nēs ge ǃKhūb ge ǁîb xa ǃhoa mîsa: “Oaxae ǀgôas Sions dis ge ra sora tsi, ǁîs ge ra ǃhō tsi. ǀGôas Jerusalems dis ge sa ǃgâb ai ra ǃnabindana. 23 Tari-e ǃhō tsîs ra mîǁgaiǁgai? Tari-i ǃoagus sa domma ǃgariǃgari tsî mûra âsa ra ǃaiǃai? Israeli di ǃAnub ǃoagusa?” 24 Sa ǃgāgu ǃnâ-u ǃKhūba ǃhō tsîs ge ge mî: “Ti ǂgui torokunidi ǀkha ta ge ǃhommi ǀgapib kōse gere ǂoa, ǁîs a ǀgapi ǃkhais Libanonni dis kōse; ǁîs gaxu sederhaidi tsî ǃam hain tsîna ta ge ge ǁhāǁnâ. ǁÎs di îbe ǃū-ai ǀkhariga ta ge ge sīǃnâ, ǁîs haiǀgoms tsîna. 25 Tita ge tsaude khao tsî ǁgam-e gere ā, ti ǂaira ǀkha ta ge Egipteb ǁgamǃāga ge ǂnâ kai.”
26 “ ‘ǀNai ta ge nēsa dī ǃkhaisats ge ǁnâu tama hâ i? ǀOro ǁaega xu ta ge nēna ge ǀape, xawe ta ge ǁîna ra ǃkharu kai. Omǂnamisa ǃādi ge hîkākāhe tsî nî ǀapo kai. 27 ǁÎdi ǁanǂgāsaben ge ge ǀgaioǃnâ; ǃao tsîn ge ge taotaohe. ǁÎn ge ǃaub ǁharen khami, tsî ǃam ǀgân, omdi ǂamǃnâ hâ ǀgân, aiǂoas ǂoab xa ra ǃgomǁnâhen khami ge hā.
28 “ ‘Sa khâis tsî ǂnûsa ta ge ǂan, sa ǃgûs tsî oahās tsîna tsî ti ǃoaguts ra khâikhâisen ǀgaus tsîna. 29 Sats ge ti ǃoagu ge khâimâ tsîb ge sa ǀgapiǂâixasiba ti ǂgaera kōse hā xui-ao, ǂguiǀurisa ta ge sa ǂguis ǃnâ-u nî ǃkhāǃkharu tsî ti tomsa sa amǁgaukha ǃnâ-u. Hāxū du go ǀkhāb ǁga ta ge nî dawa-oa du.
30 “ ‘Tsî nēs ge sats ǃaroma saose nî ī: Nē kuri ǁî-aitsama ra ǀomkhâina ǂû, tsî ǀgamǁî kurib ǃnâ ǁî-e xu ra ǃīǂoaxa-e. ǃNonaǁî kurib ǃnâ, ǂgā, ǃgao, draibena ǃhana, î ǁîn ǂûna ǂû. 31 Ûiǃgau ra khoen Judab omaris din ge ǁkhawa nî ǃnomaǃkhō tsî ǀgapise ǂûna nî tani. 32 Jerusalemsa xun ûiǃgau hâna nî ǂoaxa xui-ao tsî Sionǃhomma xu ûiǃgau hân ǂnubisa. ǃKhūb Hoaǀgaixab di tauxasib nî nēsa dī xui-ao.
33 “ ‘ǁNā-amagab ge ǃKhūba nēsa Asiriab gao-aob xa ra mî: ǁÎb ge nē ǃās ǃnâ ǂgâxa tide tamas ka iob ge ǂā-e ǁîs ǃnâ ǁkhâu tide. ǁKhaukhōdi ǀkha ǁîb aiǃâ hā tamas ka io omǂnamiga ǁîs ǂnamipe om tide. 34 Hā-ūb ra daob ǁkhāb ǀkhab ge nî oa; nē ǃās ǃnâb ge ǂgâxa tide, tib ge ǃKhūba ra mî. 35 Nē ǃāsa ta ǁkhauba tsî nî ore xui-aosa, tita ǃaroma tsî ti ǃgāb Davidi ǃaroma.’ ”
36 Ob ge ǃKhūb ǀhomǃgāba ǃgûǂoa tsî ǀguikaidisi tsî ǁkhaisadisikoroǀaǀoadisin Asiriaǁîn tentomdi ǃnâ hâna ge ǃgam; ǃnauǁgoaga di ge ǁō hâ sorodi ǀguide ge ǁgoe i. 37 Ob ge Asiriab gao-aob Sanheriba ge ǃgû, ǁîb ge ǁaru tsî Nineves ǃnâ sī ge hâ. 38 ǁÎb ǁgôa-elob, Nisroki ommi ǃnâb ra ǀgoreǀî hîa kha ge ǁîb ôakha Adrameleki tsî Sareseri tsîkha gôab ǀkha ge ǃgam bi, tsî kha ge Araratǃhūb ǃoa ge ǃkhoeni. ǁÎb ôab Esarhadonni ge ǁîba gao-aose saoǃgon.
© Khoekhoegowab Elobmîs © Bible Society in Namibia, 2020.
