ǁKhaisaǁî ais: Haka hākunidi
1 ǁKhawa ta ge oahā tsî kōkhâi o ta ge haka torokunidi ǃhomkha ǁaeguba xu ra ǂoaxade ge mû, brons ǃhomkha. 2 ǂGuro kunis ge ǀapa hāga ge ūhâ i tsî ǀgamǁîsa ǂgamaga. 3 ǃNonaǁîs ge ǃuri hāga ge ūhâ i tsî hakaǁîsa ǁgani hāga. 4 O ta ge ǀhomǃgāba ge dî: “ǃGôasatse, nēna tare-e ra ǂâibasen?”
5 Ob ge ǁîba “Nēgu ge haka ǂoagu ǀhommi digu, ǃhūbaib dib aiǃâ ge mâ igu, ǂoa raga,” ti ge ǃeream te.
6 “ǂNū hāgu di kunis ge ǀapasǀkhāb ǃhūb ǁga ra ǂoa tsîs ge ǃuri hāgu disa ǁîs khaoǃgâ ge ǂoa. ǁGani hāgu dis ge ǃkhawagasǀkhāb di ǃhūb ǁga ge ǂoa.”
7 ǀGaisa hāgu ge ǂoaxa o gu ge aiǃâb ǃoa ǃgûsa ge ôa-am, ǃhūbaiba nî ǃgûǃnâǃganuse. ǀHomǃgāb ge ǁîgu ǃoa “ǃGû, î ǃhūbaiba ǃgûǃnâǃganu” ti mî xui-ao. Tsî gu ge ǃhūbaiba ge ǃgûǃnâǃganu. 8 Tsîb ge ǂgai te tsî ge mî: “Mû ǁnāgu ǀapasǀkhāb ǁga ra ǃgûǂoagu ge ti Gagaba ǀapas di ǃhūb ǃnâ sâ kai hâ.”
Josuab krons
9 ǃKhūb di mîs ge tita ǃoa ge hā: 10 “Heldiab din, ǃkhōsabese ge ūhena xu, tsî Tobiab din xa tsî Jedajab din xa ū, îts ǁkhā tsēs ai Sefanjab ôab Josiab oms, ǁîs tawan Babilonsa xu ge hās ǁgā ǃgû. 11 ǃHuniǀurib tsî ǀhaiǀuriba ū, îts kronsa kuru tsî ǀgapipristeri Josuab, Josadaki ôab di danas ai ǂnûi. 12 Mîba bi re ǃKhūb Hoaǀgaixab ra mî ǀgausa: ‘Nēb ge khoeb, ǁNâub di ǀon hâb, ǃKhūb Hoaǀgaixaba Tempela xu nî ǀomǂoaxaba. 13 ǁÎb ge ǁnāb ǃKhūb Tempela nî ǂnubikhâiba. ǁÎb ge ǂkhaisiba ǂgaeǂgāhe tsî trons âb ai ǂnû tsî nî gaosîsen. ǁÎb ge pristerse trons âb ai nî ǂnû, tsî ǀapes ǂkhîb dis ge ǁîkha ǁaegu nî hâ.’ 14 Krons ge ǃKhūb di Tempeli ǃnâ ǂâiǂâisenxūs ase Helemmi, Tobiab, Jedajab tsî Sefanjab ôab Henni tsîga nî ība.”
15 ǁNān ǃnūse hân ge Tempeli ǃKhūb diba nî hā ǂnubise nî hā, tsîts ge ǃKhūb Hoaǀgaixab go sî te ǃkhaisa nî ǂan. Nēs ge ǂōrisasets ga ǃKhūb, sa Elob domma ǁnâuǀnam, o nî īǁkhā.
© Khoekhoegowab Elobmîs © Bible Society in Namibia, 2020.
