Gao-aob ge Mordekaiba ǃgôasiba ra mā
1 ǁNā tsuxubab ge gao-aoba ge ǁom ǁoa i tsîb ge ǁîb xoa-aob nî gaosis di xoaǁguiga ǂgâxa-ū tsî khomaiba bi ǃkhaisa ge mîmā. 2 ǁÎb ge mâtib ge Mordekaiba, gao-aob Ahasverosa ǃnariǃgams di ǀapesa ǂhaiǂhai ǃkhais ǃnuriba ge khomaiba bi; ǀapes hîa ge ǀgam ǂamkhoekha, Bigtanni tsî Teresi tsîkha gao-ommi ǃûi-aose gere ǃoabakha xa dīhe hâ isa. 3 Ob ge gao-aoba ge dî: “Mâ ǃgôasib tsî mādawa-amsab Mordekaiba nēsab ge dī amaga ge māhe?”
O gu ge ǃgāgu âba “ǁÎb ge xū-i xare-e dībahe tama hâ” ti ge ǃeream.
4 “Tari-e ai-ommi ǃnâ hâ?” tib gao-aoba ra dî hîab ge Hamanna ai-ommi ǃnâ ge ǂgâxa. ǁÎb ge Mordekaib nî ǁîbab go kuruba ǂgāhaib ai ǂgāmâihe ǃkhaisab nî gao-aoba ǂganse ge ǂgâxa.
“Tari-e ǁnāpa omǂnammib ǃnâ ra ǃgûma-e?” tib ge gao-aoba ge dî.
5 O gu ge sîsenaoga “Hamanni ge sats ǀkhab nî ǀhaose ǃâu tsi hâ” ti ge ǃeream.
“ǂGâxa kai bi” tib ge gao-aoba ge mî.
6 Hamanni ge ǂgâxa, ob ge gao-aoba ǁîba ge dî: “Nēpab ge ǃgôasiba ta ra mā ǂgao khoeba hâ. Tare-e ta nē khoeba nî dība?”
Ob ge Hamanna ǁîb ǂûb ǃnâ ge ǂâi: “Tari-eb kha gao-aoba ǃgôasiba ra mā ǂgao? Ti tama ta ka io.”
7 Tsîb ge Hamanna gao-aoba ge ǃeream: “Ab ǁnā khoeb, gao-aob ǃgôasiba ra mā ǂgaoba nēti dī-ūhe. 8 An gaosarab sats gao-aots ǂûts ra anaba nē khoeba hā-ūba tsî hāb sats ǂûts ra ǃgapib, gao-aosi ǁgauǁgausa danas âb ai ūhâb tsîna. 9 Îts gao-aotsa sa ǂamkhoegu hoagu ǃnâb ǁîba ǀgapi khoeba mîmā, îb ǁnā saraba ǁnā khoeb, gao-aob ǃgôasiba ra mā ǂgaoba ana tsî hāb ai ǃgapi kai tsî ǁîba ǃās di ǂgās ai ǃgapima-ū tsî garub a hîa ‘Mû mâtib gao-aoba ǁnā khoeb ǃgôasibab ra mā ǂgaoba ra dī-ū ǀgausa!’ ti garu ǂgaiǂui.”
10 Ob ge gao-aoba Hamanni ǃoa “ǃNoeǃnoesen, î sarab tsî hāb tsîna sī ū, î mîts go khami ǁnā Jodeǁîb Mordekaib, gao-ommi ǃnâ ǀgapi ǃharosa ūhâb ǀkha dī, î tā mîts go xūn di ǀgui-i tsîna ǁnāxūǂui” ti ge mî.
11 Hamanni ge sarab tsî hāb tsîna ū tsî saraba Mordekaiba ge ana. Mordekaib ge hāb ai ǃgapi hâse Hamanni xa ǃās di ǂgās ai gere ǃgûma-ūhe, ǁîb aiǃâb “Mû, mâtib gao-aoba khoeb, ǃgôasibab ra mā ǂgaoba ra dī-ū ǀgausa!” ti garu ra ǂgaiǂuise.
12 ǁNās khaoǃgâb ge Mordekaiba ǁkhawa gao-ommi ǃnâb ūhâ ǃoabas ǁga ge oa, xawe Hamanni ge taob xa ǃgūndana hâse, ǃnoesase oms âb ǁga ge ǁaru. 13 ǁÎb ge ǁîb taras Seres tsî ǁîb ǀhōsan hoana, tare-i ge ǁîb ǀkha ī ǃkhaisa ge mîba. On ge ǁîb taras tsî ǁîb gā-ai ǀhōsan tsîna ǁîb ǃoa ge mî: “Sats ge Mordekaib ǃoagu ǁkhāsib âtsa ra ǂoaǃnâ. ǁÎb ge a Jodeǁî tsîts ge ǁîba mâǃoa ǁkhā tide. ǁÎb ge ǂanǂansase nî dan tsi!”
Hamanni ge ra ǂgāmâihe
14 Noxopan ra ǃhoa hîa kha ge gao-ommi ǂamkhoekha hā tsî Hamanna ǃnoesase Esters di ǂûǁares ǃoa ge ǃgû-ū.
© Khoekhoegowab Elobmîs © Bible Society in Namibia, 2020.
