1 ǃKhūbats ga ǃaoǃgâ, ob ge mâ ǂōǂōsib hoaba xu nî sâu tsi. 2 Gā-ai khoen ge ǂhanuba ǀnam, xawe ǂhanuba ǂgomǂgomsase ū tama i hoa-i ge ǁgaoǂoab ǃnâ hâ ǂgau-i khami nî aomahe. 3 ǁNâuǃāxa khoe-i ge ǂhanub ǃnâ nî ǂgom, ǁnāti ī-i ǃaromab ge ǂhanuba kēbosis ase ī.
4 Nau khoen xats nî ǃgâhe ǃkhaisats ga ǂgao, o tare-ets ge ǁkhāǁkhāsen tsîts nî ǁnā xū-e mâti ǃgâise mî ǃkhaisa ǂâiǃgâ, ǃhoatsoatsoats nîs aiǃâ. 5 Gâb di hōǃâs ge kuniǀnūs khami ra sîsen tsî ǁîb di ǂâidi ge ǂnamipeǃgapusen ra as-i ase ī 6 ǃHō ra ǀhōsab ge aore hāb hîa tarib ra ǃgapi bi ǃkhais tsînab ǀūse ra āb ase ī.
Khoen ge ǀguiti-ī tama hâ
7 Tare-i ǃaroma di ǀnî tsēde nau tsēdi ǃgâ-ai a ama-ai, mâ tsēs kurib dis hoasa di hoade ǃnâba soresa xu ra ǃkhōǃoa hîa? 8 Elob ge ǁîb Gā-aisib ǃnâ ǁîde ǃkharagase kuru tsî ǀnîdi ǁîdi dide ǀō-aisa ǃanu tsēdi ase ǂnûiǂui xui-ao i ge ǁnāti ī. 9 ǁÎb ge ǀnî tsēde ǀgapiǀgapi tsî ge khai, xawe nau tsēde ǁnaetisa tsēdi ase ge dī.
10 ǃKhūb ge Adamma xu tsoatsoa tsî sao ra khoesib hoaba ǃhūba xu ge kuru. 11 Tsîb ge kai Gā-aisib âb ǃnâ hoana ǃkharagase kuru tsî ǃkharagaǃnâgu sîsenga ge mā. 12 ǃKhūb ge ǀnî khoena ǀkhae tsî ge ǀgapiǀgapi. ǁÎb ge nauna ǃanuǃanu tsî ǁîb ǀgūse ge ūhâ. Xaweb ge ǀnîn ai ǂkhababa ge hā-ū tsî ǁîna ǁîn di ǃkhaidi xu ūbēs ǀkha ge ǃgamǃgam. 13 Sada Kuru-aob ge ǁîba ǃgâiba khami kuru da ǁkhā, ǂgoasūkuru-aob ǃnorasase ǂgoa-e ǁîb ra ǂgao ǀgaub ai unu ǁkhā khami.
14 ǂGui mâǃoagu ra xūn ge hâ: ǃGâib tsî ǂkhabab, ǁōb tsî ûib, ǁore-aon tsî ǃKhūb di khoen tsîna. 15 ǁNās xa ǂâi re: Hoan xa ǀGapi Elob ge mâ xū-i hoa-e ǀnî-e ra mâǃoa kai.
16 Tita xasa, tita ge a Gā-aisib di ǀuni ǁgauǃnâ-ao. Tita ge khoeb hîa nau draiben ǃora-aogu ga ǃgûs khaoǃgâ ǀgui draibena ra ǃorab khami ī. Xaweb ge ǃKhūba tita ge ǀkhae tsî ta ge naugu ti aiǃâ ge ǃoragu xa ǃnāsase ge ǀhaoǀhao. 17 Xawe ta ge ǂan du nî ǃkhaisa ǂhâba hâ, nē hoaraga sîsenna ta ge tita ǃaroma ǀgui dī tama hâ i, xawe ta ge mâ-i hoa-i nî ǁkhāǁkhāsenga dī ǃkhaisa. 18 Sa kai ǂgaeǂgui-aogo hoago tita ǃgâ re! Hoaraga ǂgaeǂgui-aogo ǀhûhâsib digo, tita ra mî ǂgao xū-e ǃgâ re!
ǃNorasa re
19 Tātsē, ûits hâs kōse i tā ǀnî khoe-e sa ǂama ǀhonkhoe, aoreǀgôab kas, taras kas, ǃgâsab kas tamas ka io ǀhōsa i kas hoasa. ǂÂi-unuǃgâ tsîts ǁkhawa ǂganoa ǁkhā xuige, tā sa ūhâxūna khoe-i xare-e mā. 20 Ûits hâs kōse, tā ǀnî khoe-i sa ûiba nî tsâǀkhā mîǁguiga, sats ǃaroma nî ū ǃkhaisa mā-am. 21 ǃGâi nî ǃkhais ge sats nî ǁîn ai huiba ǂgans xan nî sa ôana sats ai huiba ǂgansa. 22 Dīts ran hoan ai ǂgaeǂguisa ūhâ; tā sa ǃgôasiba nî tsâǀkhā xū-i xare-e dī. 23 Sa ûib di ǀuni ǁaeb kōse ǃâu; sa ǀuni ǀommi nî ǂoas kōse, î sa ūhâxūna sa ǀumi-aon ǁaegu ǀgora.
Khobon nî sîsenūhe ǀgaub
24 Sats ge sa dâukiba ra ǂûmā, sats ge ǁîba haib ǀkha ǂnau tsî xūna ǁîb ai ra ǃnao. ǁNātits ge khobona ǂûmā, ǁkhara tsî dīn nî sîsenna nî mā. 25 ǃGomsi-ets ga ǂhâba tama i, o sa khobona sîsenna ra dīse ūhâ; ǁnā tamas ka i, on ge mâtin nî ǃnora ǃkhais di ǂâiǁaeba nî hō. 26 Jokhoes tsî ǃhâub tsîn ge gomaba ra ǂauǂau tsî mâǃoaxa khobobats ga tsûtsû, ob ge nî ǁnâuǀnam tsi. 27 Sa khobona sîsena ra dīse ūhâ. ǂKhababan nî dī ǃkhais di ǂâisoasan nî hō xuige tān ǁūse hâ. 28 ǁNāsab hâba xuige sîsen kai bi. Tsîb ga ǁnâuǀnamoǃnâ tsi, o ǃgom khedegu ǃnâ ǂgā bi.
29 Xawe tā mâ khoe-i hoa-i ǀkha kaise ǁkhōse sîsen, î tātsē tā ǂhanuoǃnâ. 30 Khobo-ets ga ūhâo, sats ra sîsenūhe ǂgao khami, ǁî-i tsîna sîsenū; ǁî-ets ge ǃgomsets ǃoaǂui hâ mari-i ǀkha ge ǁama. 31 ǃGâsab ase ǁîba sîsenū; sats ge ǁîba sats aitsama ǂhâbasen hâ ǃkhais ǁkhās khami ǂhâba hâ. Sats ga ǁîba tsūse sîsenū tsîb ga ǃkhoeni, o mâpats nî ôa bi.
© Khoekhoegowab Elobmîs © Bible Society in Namibia, 2020.
