Eksodus 37 - Khoekhoegowab New Translation 2020 (KKG20)

ǃGaeǀhaos ǂGaes di kuruhes

1 Besaleli ge ǃGaeǀhaos ǂGaes, ǀguikaidisi tsî disi sentimeterga gaxu, ǃnanidisiǃnaniǀa sentimeterga ǂhaba tsî ǃnanidisiǃnaniǀa sentimeterga ǀgapisa akasiahain ǀkha ge kuru. 2 ǁÎb ge ǁîs di ǂganagab tsî ǃaugab tsîna ǃūmû ǃhuniǀurib ǀkha ǃkhû tsî ǃhuniǀuriǃgarib ǀkha ǂgaesa ge ǁguiǂnami. 3 ǁÎb ge haka ǃkhāǃkharuǃnâ ǃhuniǀurirâide, mâ ǂgurihaib hoab ai ge kurumâi, ǀgamra mâ ǀkhāb hoab ai. 4 ǁÎb ge tani-aihaikha akasiahain ǀkha kuru tsî ǃhuniǀurib ǀkha ǃkhûǀkhā 5 tsî nē haikha hoa ǀkhākha, ǃGaeǀhaos ǂGaes dikha ai râidi ǃnâ ge ǃkhāǃkharu. 6 ǁÎb ge ǃūmû ǃhuniǀurib ǀkha ǀguikaidisi tsî disi sentimeterga gaxu tsî ǃnanidisiǃnaniǀa sentimeterga ǂhaba ǂganaisa ge kuru. 7 ǀGam xerukha, ǃhuniǀuriba xu ǂnauǂuisakhab ge kuru, 8 tsî ǂganais a kuru-ūsa ǃhuniǀuriba xu ǁîs di ǀamkha ai xerukha ge kuruǂui. 9 Xerukha di ǁgabogu ge ǀgapiseb ǁga khobaǂuihe tsî ǁgabogu ǀkha ǂganaisa ǃgū-ai hâ, ǁîkha aira ge ǂganais ǃoa kōǁnâ hâse ǂnûǃoagu hâ.

ǁGuibapere-i tāb di kuruhes

(Eksodus 25:23-30)

10 ǁÎb ge akasiahain ǀkha ǁkhaisadisiǁkhaisaǀa sentimeterga gaxu, hakadisihakaǀa sentimeterga ǂhaba tsî ǃnanidisiǃnaniǀa sentimeterga ǀgapi tāba ge kuru. 11 ǁÎba ǃūmû ǃhuniǀurib ǀkha ǃkhûǀkhā tsîb ge ǃhuniǀuriǃgariba ge ǁguiǂnami. 12 ǁÎb ge hûdisikoroǀa milimeterga ǂhaba ramsa tāb ǂnamipe kuru tsî ramsa ǃhuniǀuriǃgarib ǀkha ge ǁguiǂnami. 13 Besaleli ge haka ǃkhāǃkharuǃnâ ǃhuniǀurirâide, mâ ǀnūb hoab di ǁhôas ai ge kurumâi. 14 ǁÎb ge rams ǀgūse tāb nî tani-ūhe haikha nî ǃkhāǃkharuǃnâhe râide ge kurumâi. 15 Tani-aihaikha akasiahain ǀkha kuru tsîb ge ǃhuniǀurib ǀkha ge ǃkhûǀkhā. 16 ǁÎb ge ǂauxûiǁguibas ǃaroma ǂûǃnâǃoren, āǃnâxapan, ǁgamxapan tsî ǃoren tsîna tāb ai sîsenūs ǃaroma ǃūmû ǃhuniǀurib ǀkha ge kuru.

ǃAmǀaekandelari di kuruhes

(Eksodus 25:31-40)

17 ǁÎb ge ǃamǀaekandelara ǃūmû ǃhuniǀurib ǀkha ge kuru. ǁÎb di ǂais tsî ǁaegub di haib tsî ǁnâugu, ǁîb di îsa-îsa ǁharedi, ǃamǀaexaparodi tsî ǂnareroga ǃkhōǂgā hâsen ge hoana ǁkhā ǃhuniǀuriba xu ǀgui ge ǂnauǂuihe hâ i.

18 ǁAegub di haiba xu gu ge ǃnani ǁnâuga ra ǂoa, mâ ǀkhāb hoab ai ǃnonaga. 19 Nē ǃnani ǁnâuga xub ge mâ ǁnâub hoaba ǃnona îsa-îsa ǁharerodi, ǃamǀaexaparodi tsî ǂnarerogu ǀkha almondǁhares di īsiba ge ūhâ i. 20 ǃAmǀaekandelari di ǁaegub haib ge almondǁhares di īsib ǃnâ haka îsa-îsa ǁharerode ge ūhâ i. 21 Tsî ǃnona ǁnâugu ra ǁaegub di haiba xu ǂoaxa ǃkhais hoas ais ge ǁharesa ge hâ i. 22 ǁHaredi, ǁnâugu tsî ǃamǀaekandelari hoab ge ǁkhā ǃūmû ǃhuniǀuriba xu ǀgui ge ǂnauǂuihe hâ i. 23 ǁÎb ge hû ǃamǀaede ǃamǀaekandelari ǃaroma ge kuru tsî ǁîb di ǁaraǂao-ūxūb tsî xaparodi tsîna ǃūmû ǃhuniǀuriba xu ge kuruǂui. 24 ǁÎb ge ǃamǀaekandelari tsî ǁîb ai ra sī xūn hoana kuru-ūs ǃaroma ǃnonadisikoroǀa kiloxramgu ǃūmû ǃhuniǀurib ǀguiba ge sîsenū.

ǃGâihamxūna ǂhubi-ais altars di kuruhes

(Eksodus 30:1-5)

25 Besaleli ge altars ǃgâihamxūn gere ǂhubi-aihesa akasiahain ǀkha ge kuru. ǁÎs ge ge hakaǀkhāxa i tsî hakadisikoroǀa sentimeterga gaxu, hakadisikoroǀa sentimeterga ǂhaba tsî khoesedisi sentimeterga ge ǀgapi i. ǁÎs di ǁnâgu, haka ǁhôadi ai hâgu ge ǁkhā haiba xu ǀgui ge hâ i. 26 ǁÎb ge ǁîs di ǀgapise, hoa haka ǀkhāgu tsî ǁîs di ǁhôadi ai ra ǃkhāǂoaxa ǁnâgu tsîna ǃūmû ǃhuniǀurib ǀkha ǃkhûǀkhā tsî ǃhuniǀuriǃgarib ǀkha ge ǁguiǂnami. 27 ǁÎb ge ǀgam ǃkhāǃkharuǃnâ ǃhuniǀurirâira, tani-aihaikha nî ǃkhāǃkharuǃnâhera kuru tsî ǃhuniǀuriǃgarib ǃnaka, mâǃoagu hâ ǀkhākha ai ge kuruǂnûi. 28 Nē tani-aihaikha akasiahain ǀkha kuru tsîb ge ǃhuniǀurib ǀkha ge ǃkhûǀkhā.

ǀNau-ū-oli-i

(Eksodus 30:22-38)

29 ǁÎb ge ǁkhāti ǃnâu ǀnau-ū-oli-i tsî ǃgâihamhain tsîna kuru tsî ǁîna ǃgâihamxū-i ase ge haba.