Sauli tsî ǀgôagu âb di ǁōb
(1 Kroniks 10:1-12)1 Filisteǁîn ge Israelǁîn ǃoagu Gilboaǃhommi ai ge ǃkham. ǂGui Israelǁîgu ge ǁnāpa ge ǃgamhe tsî ǀnîgu, ǁîgu ǃnâ gu gao-aob Sauli tsî ǁîb ôagu tsîna hâgu ge ge ǃhū. 2 Xawe gu ge Filisteǁîga ǁîga ǃgôaǃgon tsî ǃnona ǀgôagu Sauli digu, Jonatanni, Abinadab tsî Malkisuab tsîga ge ǃgam. 3 ǃKhammi ge Sauli ǃoagu kaise ge ǀgai tsîb ge Saula ǁkhâu-aogu xa ǁkhâuhōhe tsî ǁkhōǁkhōsase ge tsuihe. 4 Ob ge Saula ǁâtanin âb tani-aob ǃoa ge mî: “Sa gôaba ǂgaeǂui, îts ǃkhāǃan te, î gu tā nē ǀūbe Filisteǁîga hā ǃgam te tsî ǃhō te.” Xaweb ge ǁâtanin tani-aoba kaiseb gere ǃao xui-ao ǁnāsa dī ǂgao tama ge i. Ob ge Saula ǁîb gôab ǂûba ū tsî ǁîb ai ge ǁnāǁnāsen. 5 ǁÂtanin tani-aob ge Sauli go ǁō ǃkhaisab ge mûo, ǁîb tsîna gôab âb ai ǁnāǁnāsen tsî Sauli ǀkha ǀguipa ge ǁō. 6 ǁNāti gu ge Sauli tsî ǁîb ǃnona ǀgôagu, ǁâtanin tani-aob tsî toroǃkhamaogu âb tsîgu hoaga ǁnātsē ǀguipa ge ǁō. 7 Jesreelǃgoaǃnāb nauǀkhāb tsî Jordanǃāb nauǀkhāb ai ge ǁan hâ i Israelǁîn ge Israeli toroǃkhamaogu go ǁhâ tsî Sauli tsî ǀgôagu âb tsîn go ǁō ǃkhaisan ge ǁnâuo, ǃādi âna ǁnāxū tsî ge ǃhū. On ge Filisteǁîna hā tsî ǁîdi ǃnâ ge ǁan.
8 Filisteǁîgu ge sao ra tsēs ai gu ge ǁō hâgu sorode xu gu nî ǁkhâuǁnâse hāo, Sauli tsî ǁîb ǃnona ǀgôagu sorode Gilboaǃhommi ai ge hōǁgoe. 9 O gu ge danas âba ǁhāǁnâ, ǁâtanin âba ǁîba xu ǂgaeǁnâ tsî sîsabega ǁîn ǀkha Filisteǁîn ǃhūb hoab ǃnâ gere sîma, nē ǃgâi ǂhôa-e gu ǁîn elon omgu ǃnâ tsî ǁîn khoen ǃnâ nî ǂanǂanse. 10 Tsî gu ge ǁâtanin âba Astartes tempeli ǃnâ ǁgui tsî soros âba Betsans ǂnubiǂgoab ai ge ǃgâumâi.
11 Tsî Jabes, Gileadi dis ǁanǂgāsaben ge tare-en ge Filisteǁîna Sauli ǀkha dīsa ǁnâu, 12 o gu ge ǁkhoaǂgaoxa aogu hoaga ǂhomisen tsî hoaraga tsuxuba Betsans ǁga ge ǃgû. ǁÎgu ge Sauli tsî ǀgôagu âb sorodi tsîna Bet-Sans ǂnubiǂgoaba xu sī ūǁnâ tsî Jabes ǃoa ǃgû-ū tsî ǁnāpa sī ge ǂhubiǂui. 13 Tsî gu ge ǂkhōna ū tsî Jabes tawa dabehais ǃnaka ge ǁkhō; ǁnās khaoǃgân ge hû tsēde ǂûtama ge hâ.
© Khoekhoegowab Elobmîs © Bible Society in Namibia, 2020.
