ǃKharaga ǁaedi ǂama hâ ǀgoraǃgâs
1 Nēs ge ǂhôas ǃKhūb dis, Hadraxi ǃhūb tsî Damaskus, ǁîs di sâǃkhais xa hâsa, ǃKhūb mûra khoen tsî hoaraga ǃhaodi Israeli didi ai hâ xui-ao. 2 Hamats xōǀkhā ǁgoes tsî Tirus tsî Sidons hâra, kaise ra a gā-ai xawe. 3 Tirus ge ǁkhui-omma ombasen tsî ǀhaiǀuriba tsarab khami tsî ǃhuniǀuriba ǃgangu di ǂgoab khami ge ǀhaoǀhaobasen. 4 Xaweb ge ǃKhūba ūs hân hoana ūxū si tsî ǃkhūsib âsa hurib ǃnâ nî aoǂgā, tsîs ge ǀaes xa nî hîkākāhe.
5 Askelons ge ǁî ǃkhaisa mû tsî nî ǃao. Gasas ge kai tsûb xa nî hāǂamhe tsî Ekrons ona, ǃâubasens âs nî ǃkhom amaga. Gasas ge gao-aob âsa nî ǂoaǃnâ tsî Askelons ge ǁanǃnâhe tide. 6 ǃKharaga ǃhaodi di khoen ge Asdods ǃnâ nî ǁan tsî ta ge Filisteǁîn di ǀgapiǂâixasiba nî ǀamǀam. 7 Tita ge ǀaob âba ams âba xu nî dībē tsî ǁgaiǁgaisa xūn âba ǁgûgu ǁaeguba xu. Nētib ge ǁîb tsîna sida eloba nî ǃgauba tsîb ge gaosab ase Judab ǃnâ nî ī tsî Ekrons ge Jebusǁîn khami nî ī. 8 Ti ommi ǂnamipe ta ge ǃûi-aoba nî mâi, ǃkharu ra-i tsî oahā ra-i ǃaroma. Tsîb ge ǁgâiǀā-aoba ǁîna ǁkhawa dāǀhani tide. ǁÎ ǃkhaisa ta ge nēsi ti mûra ǀkha go mû.
ǃGoaxaǁaeb gao-aob
9 Kaise dâ re Sions ôase!
Dâ re sas Jerusalems ôase!
Mû sa gao-aob ge sas ǃoa ra hā!
ǂHanu-ai tsî danaose
ǀgâsase, dâuki-i ai ǃgapi hâse
dâukib, dâukis di ǂkhamrob ai.
10 Efraimma xu ta ge torokunide nî ǃhomǂui
tsî torohāga Jerusalemsa xu;
ǁkhātis ge ǃkhams di khāsa nî hîkākāhe.
Tsî ǁîb ge ǁaede ǂkhîba nîra ǃhoaba,
tsî ǁîb di gaosis ge huriba xu hurib kōse;
Eufratǃāba xu ǀkhâuǀams ǃhūbaib dis kōse nîra hâ.
Elob ǁaes di ǀasaǀasahes
11 ǁKhāti sats xasa, sa ǃgaeǀhaos di ǀaob ǃnâ-u
ta ge sa ǃkhōsabena nî ǃnoraǃnora
ǁgamo tsausa xu.
12 ǁKhawa oa re ǁaposa ǃkhaidiǀî
ǃkhōsabedu ǃâubasens dido
nētsē ta ge ǃhonarisase ta nî ǀasaǀasa dusa ra mî.
13 Judaba ta ge khāse ge ǂgaeǃnâbasen
tsî Efraimma ǂāb ase.
Tsî Siontse, sa ôaga ta ge nî ūkhâi,
sats Grikeǃhūts di ôaga ta ge ǁē-aob di gôase nî dī.
14 Tsîb ge ǃKhūb ǁîgu ǂama nî ǂhai,
tsî gu ge ǁîb di ǂāga napab khami nî ǂoa.
Ob ge ǃKhūb Eloba xâiǁnâba nî xâi
ob ge ǁîba ǃkhawagas ǁgaoǂoaguǀî nî ǃgû.
15 ǃKhūb Hoaǀgaixab dib ge ǁîna nî ǁkhauba.
ǁÎb slengers di ǀuidi xan ge nî ǁō
tsîn ge ā tsî ǂauxûib xa nî ǂkhupi.
ǁÎn ge ǃores khami nî ǀoa,
altars di ǁhôadi khami.
16 ǃKhūb ǁîn Elob ge ǁîna ǁnā tsēs ai nî ǃnoraǃnora
ǁaes âb di gūn a amaga.
Krons di ǀuidi khamin ge
ǃhūb âb ǃnâ nî ǂkhai.
17 Mâtikōsen nî kai dīxūn âba!
Mâtikōseb nî kai îsasib âba!
ǃHorob ge ǂkham khoega nî ǀomkhâi kai
tsî ǀasa ǂauxûiba ǂkhamkhoede.
© Khoekhoegowab Elobmîs © Bible Society in Namibia, 2020.
