Kerkheb ǂgaeǂgui-aogu ǃoa hâ ǀapemās
1 Tita hîa ǂnomdomta,* Xristub* tsâgu di ǃkhō-amaota tsî ǁkhāti ǂhaiǂhaihe nî ǂkhaisib ǃnâ nî amǃnâxata ge ǀhûǃoaba-aose sadu ǁaegu hâ ǂnomdomga ra ǁnama:
2 Elob di gūn sago ǂgomǃgâbahe hâna ǃûi, ǁgarisa xu tama i tsî māsenxase. ǁKhāti taotaosa hōbasen-i ǃaroma tama, xawe ǂgaob hoaba xu, 3 Elob di kerkheba ra gaoǂamse tama, xawe gūn di aiǁgause. 4 Tsî ǂAmǃûi-aob ga ǂhaio, o go ge ǁgaoǁoasa krons ǂkhaisib disa nî hō.
5 ǁNās ǁkhās xase sadu ǂkhamdo kaikhoena ǃnaka hâba, î du hoado ǃnaka hâbagu, î du ǃgamǃgamsensa ana: “Elob ge ǃguriǂgaoxa khoena ra mâǃoa, xaweb ge ǃgamǃgamsen rana ǀkhomma ra mā.”
6 ǃGamǃgamsen ǁnâi re Elob di ǀgaisa ǃommi ǃnaka, îb ǁîb di ǁaeb ai ǀgapiǀgapi du. 7 Sadu ǂhansende ǁîba ǁgui-ai, ǁîb sado ra ǂhansenba xuige.
8 ǃGāsase tsî ǂkhaikari hâ, sadu di mâǃoasabeb ǁgâuab* ge ǃguru ra xammi ase ǃgûma tsî mâ-eb nî hapu ǃkhaisa ra ôa xuige. 9 ǁÎba mâǃoa ǂgoms ǃnâ ǁapo hâse, ǂan du a xui-ao nau ǂgomsaben ǃhūbaib ai hân hoan tsîn ra ǁnāti ī tsâgu ǃnâ ǃkharu ǃkhaisa. 10 Xawe ǂkharirose du tsâ hâ hîab ge ǀkhommi di Elob, ǁîb di ǀamo ǂkhaisib Jesub Xristub ǃnâ hâb ǃoa ǂgai du hâba ǀgaiǀgai, ǁapoǁapo tsî nî ǃgaoǃgao du. 11 ǁÎba ab ǀgaiba ūhâ ǀamosib kōse. Amen.*
ǀUni tawedes
12 Silvanub, ǂgomǂgomsa ǃgâsab ǀkha ta ge ǂâi ta ra khami ǀnîrona ge xoa, ǁnama tsî ra ǃkhō-amǃâ, nē ǀkhommi Elob dib, ǁîb ǃnâ du mâb a ama-ai ǃkhaisa. 13 Sadu ǃgâsa kerkheb nēpa Babilons ǃnâ hâb tsî ti ôab Markub tsîn ge ra tawede du. 14 Tawedegu du re ǃanu ǁoas ǀnammi dis ǀkha.
ǂKhîba ab sadu Xristub ǃnâ hâdu hoadu ǀkha hâ!
© Khoekhoegowab Elobmîs © Bible Society in Namibia, 2020.
