Simonni ge Oniaba ra ǂkhabaǂgā-am
1 ǀNai ge ǁîb xa mîhe hâ i Simonni, hîa ge Apoloniuba mari-i xa mîba tsî ǁaes ǃnâ ǃgomsiga hā-ūb ǀguib ge ǁkhāti Oniab xa ǂhumiba ge ǃhoa tsî Heliodorub ai ge dīhe ǁnāǂams tsî ǃgomsigu hîa ra saogu ge ǁîb xa ǃaromahe ti ge mîba. 2 ǁÎb ge Oniab ra ǂhanuba ǀapeǃgâsa dītsâ tis tsîna ge ǂkhabaǂgā-am bi. Oniab hîa Jerusalems khoen ǃaroma mari-e ǀhaoǀhao tsî Tempela ǁkhaubas ǀguisa dī tama i, tsî xawe ge ǂhanub nî ǁnâuǀnamhe ǃkhais di turab tsîna ūhâ iba. 3-4 Menesteub di ôab Apoloniub, Kai Siriab di ǂgaeǂgui-aob ge Simonna ǁîb di ǂkhabadīgu ǃnâ gere ǂgaoǂgaoǃnâ tsîs ge Simonni di mâǃoasa ǁnātikōse ǀgai tsîb ge ǀguib ǁîb di ǂgomǂgomsa saoǃgon-aogu diba ǂgui ǃgamde ge dī. Oniab ge nē ǃkhais di ǃaorosasiba ge mûǂan 5 tsî ǁnā-amaga ǁîb di ǃhūǁîn ǃoagu hâ ǂkhabaǂgā-amdi ǀkhas ose, xawe Jodeǁîn di ǀhû hâse tsî ǀguri hâ ûigu ǃnâ ǁîn di ǃgâiba ǃoa nî ǃhoase gao-aob ǃoa ge ǃgû. 6 ǁÎb ge gao-aob di sîsenǁareb oseb ǂkhîba hâ tide, tsîb nî Simonna ǁîb di gâsib ǀkha aiǃgû ǃkhaisa ge mûǂan.
Jasonni ge Grike ǁnaetiga ra mâi-aiǃâ
7 Gao-aob Seleukub ge ǁō tsîb ge Antioxub, Epifaneb tis tsîna ge ǂansa iba gao-ao kai, ob ge Oniab di ǃgâsab Jasonna ǀhôagao ǀgaub ǃnâ ge ǀgapiprister kai. 8 ǁÎb ge gao-aob ǃoa ǃgû tsî ǁîba disiǀgamǀaǀoadisi kiloxramgu ǀhaiǀurib tsî ǀgamǀoadisihûkaidisi kiloxramgu hîab nî ǃnāsase matarehegu tsîna ge mîmâiba. 9 Jasonni ge ǁkhāti ǀarosase ǁîba koroǀoadisi kiloxramgu di ǀhaiǀuriba ǂgaeǂgui-aogu ǃaroma ge mîmâiba, î gu ǂkham khoegu di ǃâisenǃkhaiba om tsî Jerusalems di khoena Antioxs di ǁanǂgāsaben ase ǃgaeǂgā.
10 Gao-aob ge ge mā-am tsî Jasonni ge ǀgapipristeri di berosab ra ūǃkhuni hîa Jerusalems di khoena Grike ǁnaetigu ǃoa ge ǀkharaǀkharasen kai. 11 ǁÎb ge Johaneb xa ge aiǃâkam Siriaǁî gao-aoga xu Jodeǁîn ǃaroma ǁapoǁapohe hâ i ǃgâina ge ūbē. Johaneb ge Eupolemub hîa ega ge Romes ǀkha ǃgaeǀhaosa dī tsî khoexaǃnâsiba ge ǂnubib di îba. Jasonni ge ǁkhāti Jodeǁîn di ǁnaetiga ūbē tsî ǀasa ǁnaetigu sida ǂhanuga ra mâǃoaga ge ǂgâxa-ū. 12 ǁÎb ge kai turaxasib ǀkha Tempelǃhommi ǀgūse ǂkham khoegu ǃâisenǃkhaiba om tsî sida anusa ǂkham khoega Grike ǁnaetigu ǃoa ǂgamǂgamsenǀhurun ǃnâ ǁhaos ǃaroma ge ǂgaeǂguiǂgā. 13 Jasonni ge kaise ge ǂkhabaxa i tsî ǀgapipristersisa ge anu tama hâ i. ǁÎb di ǀhāpis ge sida khoen ge ǃhao ǃhūgu di ǁnaetigu tsî Grikeǁîn di ûiǀgaub tsîna ūǃoasa. 14 Pristergu ǀkhās ge ǃanu ǃoabadi tsîna ǃaruǀî ge dī tama hâ i. ǁÎgu ge Tempelǃoabadi ǃnâ gu ge ūhâ i hōǃâde ǂoaǃnâ tsî ǁguibade dīsa ge ǀû. Saos ra māhe hîa gu ge sida ǂhanub xa mā-amhe tama ǂgamǂgamsen ǀhurugu ǃnâ nî ǁhaose ǁnāǀî gere ǃnoe. 15 ǁÎgu ge xū-i xare-e aboxagu ge harebesa ūǃnâ hâ in ǀkha ge ǁae tama hâ i tsî Grikeǁîn di ǃgôasib ǀguiba gere ǃkhōǃoa ǂgao. 16 Tsî nēs ge ǁîn di ǃgomsigu hoagu di ǃaroma ge isa. Tsî ǁnān hîan gere ǁîn di ûiǀgauga burun tsî ǀoasase ǁgaeǁgaen ge ge ǁîn di khākhoe kai tsî ǁîna ge ǁgâiǀā. 17 Elob ǂhanuba ǁnākhaos ge supu xū tama hâ, ǃgoaxaǁaeb ǃnâ nî ī xūn ǃnâts nî mû khami.
Jerusalems ge Siriaǁîn di khâikhâiǃnâs ǃnaka hâ
18 ǀGui ǃnā-eb ge gao-aoba mâ koroǁî kurib hoaba ge Tirus ǃnâ gere ūhâhe ǂgamǂgamsen ǀhurugu tawa sī, 19 ob ge nē xū tama Jasonna, Antioxs di khoegu Jerusalemsa xu hâga disiǀoadisi kiloxramgu ǀhaiǀurib ǀkha Herkuleb di ǁguibas nî matarehese ge sî. Xawe gu ge nē khoegu tsîna ǁîgu ǃnâ, nētikō mari-i ǁguiba-i ǃaroma māhe ǁoa ti ge ǂâi. 20 Xawe nē mari-i hîa ge Herkuleb di ǁguibas ǃaroma ǂâibasenhe hâ i-i ge torodoe-omde kuruhes ǃaroma ge sîsenūhe.
21 Menesteub ôab Apoloniub ge Egipteb ǃoa Filometori di gao-aose ǀgapahesab nî hâǃnâga ge sîhe. Antioxub ge Filomentori ge ǁîb khākhoe kai ǃkhaisab ge ǂan, o ǁîb gaosiba ge ǁkhaubatsoatsoa. Antioxub ge ǁîb gaosib di ǃnorasasib xa ra ǂâiǂhansense Jopas ǃnâ-ū Jerusalems ǃoa ge ǃgû. 22 ǁNāpab ge Jasonni xa ǃgôasib ǃnâ ge ǃkhōǃoahe tsîn ge ǃās di khoena ǃaub tsî ǃamǀaedi ǀkha ǁîba nî tawedese ge ǃgûǂoa. Jerusalemsa xub ge Antioxuba ǁîb di toroǂnubisa Fenisiab ǃoa ge ǂgaeǂgui.
Menelaub ge ra ǀgapiprister kai
23 ǃNona kurigu khaoǃgâb ge Jasonna, Simonni ǃgâsab Menelauba gao-aob ǃoa mari-i ǀkha mîǁguiba ǂhâǂhâsa ǁhōgu ai nî ūse ge sî. 24 Gao-aob ais aib ge mâ, ob ge Menelauba ǁîb ǁkhāsiba ǁgauǂui tsî disiǀoadisi kiloxramgu di ǀhaiǀuriba Jasonni xa ǃnāsase ǁîb nî ǀgapipristerse ǁgaumâihega ge mā. 25 ǁNās xa ǃaromahe hâseb ge Menelauba gao-aob xab ge māhe ǂkhanigu, ǀgapipristeri a ǃkhaisa ra ǁapoǁapoǃnâhegu ǀkha Jerusalems ǃoa ge oa. ǁÎb ge ǀnî hâ ǁkhāǁkhāsen-i tsîna ge ūhâ tama hâ i, xawe karosaǂgao tsî ǀguru-i ǃgâ-ai ge ǁaixa i. 26 Jasonni, ǁîb di ǂhunuma ǃgâsaba ge ǀhôagaoǃnâb ge nēsi ge ǁgarihe, îb Amonǁîn di ǃhūb ǃoa ǃkhoeni. 27 Menelaub ge ǀgapipristersis ǀkha ge aiǃgû, xaweb ge gao-aobab ge mîmâiba hâ i mari-i xare-e matare tama ge i. 28 Jerusalems di ǁkhui-ommi di danab Sostratub ge nē mari-e, ǁîb ge marina ǀhaoǀhaos di ǃereamsa ūhâ i xui-ao ǀû tamase gere ǂgan. ǀUnis ai kha ge nē khoekha nē ǃkhais ǀkha kha gao-aob aiǃâ nî ǂhaiga ge ǂgaihe. 29 Menelaub ge ǁîb ǃgâsab, Lisimakuba ǂnûǁkhaeba ra ǀgapipristeri ase ge ǁnāxū tsîb ge Sostratuba ǁkhui-omma, Krateb hîa Siprusa xu hâ toroǃkhamaogu di ǃkhōdana-aob di mûǂams ǃnaka ge ǁnāxū.
Oniab di ǃgamhes
30 ǁNā ǁaeb ǃnâb ge ǂkhîoǃnâsiba, Tarsus tsî Malus tsîra di ǁanǂgāsaben ǃnâ, gao-aob ge ǁîb di ǀaitaras Antioxisa nē ǃāra mā xui-ao ge hâ i. 31 ǁNā-amagab ge gao-aoba Andronikub, ǁîb ǀgapi ǂgaeǂgui-aogu di ǀguiba, ǃkhōdana-aose ǁnāxū tsî xūna nî sī ǃgâiǃgâise Silisias ǃoa ge ǃnoe. 32 Menelaub ge nē ǃēsa sîsenū tsî ǀnîn Jerusalems Tempela xub ge ū ǃhuniǀuri xapan dina Andronikuba ge mā. ǁÎb ge ǀnîna ǀnai Tirus tsî ǀgūse ǁgoe ǃādi ǃnâ ge ǁamaxū hâ i. 33 Oniab ge nēn xab ge ǁnâu, o ǃnorasasib ǃaroma Dafnes hîa Antioxs ǀgūse ǁgoes di tempel-i ǃoa ǃkhoeni tsî ǂhaisase Menelauba gere ǀhapiǂgā-am. 34 Menelaub ge Andronikuba, Oniabab nî ǃgam ǃkhaisa ǂganǃgâsib ǃnâ ge gowadan. Andronikub ge ǃgû tsî Oniaba khoexaǃnâ ǁoas ǀkha gāxaǃnâ tsî ǃnorasasiba ge mîmâiba. Oniab gere ǂâisā xaweb ge Andronikuba ǀunis ai Oniaba nanabē tsî ǃnapetamase ge ǃgam.
Andronikub ge ra ǁkharahe
35 Jodeǁîn tsî Jodeǁî taman ge Oniab ge ǂhanuoǃnâse ǃgamhe ǃkhais ǃaroma kaise ge ǁaixa. 36 Gao-aob ge Silisiab ǀkhariba xu oahā, on ge Antioxs di Jodeǁîna ǁîb ǃoa ǃgû tsî nē ǃaromaoǃnâ ǃgams ǃoagu ge khâikhâisen. Jodeǁî taman tsîn ge ǁkhā ǀgaub ai nē ǃgams xa gere tsâ. 37 Gao-aob Antioxub ge kaise ǃgamse ge ǃoa tsî ge tsûaǂgao hâ i. Oniab di gā-aisib tsî ǃgâiǂūxasib ûib âb ǃnâb gere ǁgauǂuib xab gere ǂâi-oa, o gere ā. 38 Antioxub ge kaise ǁaixa tsî Andronikub di gaosaraba doaǁnâǀkhā bi tsî hoaraga ǃās ǃnâ-u Oniab ge ǃgamhe ǃkhaib ǃoa ǁîba ge ǃgû-ū. ǁNās khaoǃgâb ge Antioxuba nē ǀapaxaǂgao ǃgamaoba ge ǃgam. Nē ǀgaub aib ge ǃKhūba ǁîb nî hōse ge ī-i ǁkharaba ge mā bi.
Lisimakub ge ra ǃgamhe
39 ǁNā ǁaeb ǃnâb ge Lisimakuba, ǁîb ǃgâsab Menelaub xa mâxōǀkhāhe hâse ǂgui ǃnādi ai Jerusalems Tempela ǁkhâuǁnâ tsî ǂgui ǃhuniǀuri xapana ge ū. Nē xūn ge ūhe ǃkhais di ǂhôas ge ǂapaǂoa, on ge ǂnubidi khoena ǀhao tsî Lisimakub ǃoagu ge khâikhâisen. 40 Khoen ge ǁaib xa ge khâikhâisen tsîb ge Lisimakuba ǃnonaǀoadisi ǁâtanisa khoega ǁîna nî ǁnāǂamse ge sî. ǁÎgu ge kaira hâǃâ ge gâre i khoeb, Auranub ti ǀon hâb xa ge ǂgaeǂguihe hâ i. 41 Tempeli di omǂnamib ǃnâ ge hâ i Jodeǁîn ge tare-i ra ī ǃkhaisan ge ǂanǂuio, ǀuin, ǃnaon di ǃân tamas ka io ǃomdiǀoa tsaoba altarsa xu ū tsî ǀgarusaǂâisib ǃnâ Lisimakub tsî ǁîb khoegu tsîna ǁîn ǀkha ge ǂnoa. 42 ǁÎn ge ǀnî khoegu Lisimakub diga ǃgam tsî ǂguiga ge tsui, tsî gu ge ǃgau gegu hoaga ge ǃkhoeni. Lisimakub ǀkhās, ǁnā Tempelǁkhâuǁnâb tsîn ge Tempeli ǁuib di ǃnā-oms ǀgūse ge ǃgamhe.
Menelaub ge ǀgoraǃgâhe nîse ra hā-ūhe
43 Nē ge ī xūn ǃaromab ge Menelauba ǀgoraǃgâhe nîse ge hā-ūhe. 44 Gao-aob ge Tirus tawa hā, o gu ge Jodeǁîn di danakhoegu Jerusalems diga ǃnona khoega, Menelauba nî ǃnuriǃgâse ge sî. 45 Tsî Menelaub ge ǁhōbab ra ǂoaǃnâ ǃkhaisab ge mû, o Dorimeneb ôab Ptolemiba kai mari-e ge mîmâiba, îb gao-aoba gowadan, îb gao-aoba Menelaub di ǃgâib ǃoa mîǁguiba ū. 46 Ptolemib ge gao-aoba ge ǂgan, î kha kara ǂoaba nî hōse ǁnâuǃgâǃkhaiba xu ǂoa tsî ǁnāpab ge gao-aoba ǂâis âbab nî ǀkharaǀkhara ǃkhaisa ge gowadan, 47 tsîb ge Menelauba ǃnuriǃgâ-aiheb ge xūn ai ǀhapiose ge hōhe. Hoa ǃgomsigab ge ǃaroma, xaweb ge Menelauba ǁnā ǀgaub ai ge ǃnoraǃnorahe. Xawe gu ge karosaǂgao Skitiaǁîgu tsîn xa ga ǀhapiose hōhe hâ ǃnona khoega ǁōǁkharaba ge ǁgui-aihe. 48 Nē ǃnona khoegu ge Jerusalems, ǁîs khoen tsî ǃanu xapan hîa ge Tempela xu ǃnarihena ra ǁkhaubase gere ǃhoa, xawe gu ge ǃhaese tsî ǂhanuoǃnâse ge ǃgamhe. 49 ǀNî khoen Tirus din ge ui-uisasib nē tsūdīb dib tsî ǃgôasiba nē khoega māsa ǁgauǂuis ǃaroma kai ǁkhōsa ǁîga ge dība. 50 Menelaub ge ǁîb ǃharos ǃnâ naugu ǁkhāsib ǃnâ mâgu di xūǃgūnuxasib ǃaroma ǁnā ǃharos ǃnâ ge hâǀgara. ǁÎb ge tsēs hoasa ǃaruǀîǀgui gere tsū, tsî ge ǁîb di ǂhunuma khoen di khākhoe kai.
© Khoekhoegowab Elobmîs © Bible Society in Namibia, 2020.
