Judab di gao-aob Axasi
(2 Gao-aogu 16:1-4)1 Axasi ge ǀgamdisi kurixab a hîa ge gao-ao kai, tsîb ge disiǃnaniǀa kuriga Jerusalems ǃnâ gere ǂgaeǂgui. ǁÎb ge ǁîb aboxab Davidi di ǃgâi aiǁgausa ge sao tama hâ i tsî ǃKhūb, ǁîb Eloba ǃgâiba tamana gere dī. 2 ǁÎb ge Israeli gao-aogu di aiǁgausa ge sao. Tsîb ge ǂnâhesa īgu Baali diga kuru 3 tsî Hinomǃgoaǃnāb ǃnâ ǀanǀanǁguibade gere ǁguiba. ǁÎb ôagu ǂûgab ge khauǁguibas ase ǁgôa-eloga ge ǁguiba, ǃKhūb ge Israelǁîn aiǃâ, ǃhūba xu ǁgariǂui ǃhaodi ǁgaiǁgaisa ǁnaetiga ǃoa. 4 Axasi ge ǁkhāti khauǁguibadi tsî ǀanǀanǁguibadi tsîna ǀūben di ǀgoreǀîǃkhaidi, ǃnâugu tsî ǃam hais hoas ǃnaka gere ǁguiba.
Torob, Siriab tsî Israeli tsîkha ǃoagu
(2 Gao-aogu 16:5)5-6 Axasi di ǂkhabadīb ǃaromab ge ǃKhūb, ǁîb di Eloba ge dī, Siriab gao-aob ge ǁîba dan tsî ǂgui khoen Judab dina ǃkhōsabese Damaskus ǃoa ǃgû-ūsa. ǃKhūb ge ǁkhāti ge dī, Israeli gao-aob Pekab, Remaliab ôab ge Axasa dan tsî ǀguikaidisi tsî ǀgamdisiǀoadisi toroǃkhamaogu ǁîb diga, ǀgui tsēs ǃnâ ǃgamsa. ǃKhūb, ǁîn aboxan di Elob ge ǁnā ǃkhais nî īsa ge mā-am, Judab di khoen ge ǁîba ǁnāxū amaga. 7 Efraimǁî toroǃkhamaob Sixrib ge Maasejab ôab gao-aob Axasi, gao-ommi ǂamkhoeb Asrikammi tsî ǃnaka ǂnôa gao-aob Elkanab tsîga ge ǃgam. 8 Judab khoen ge ǁîdi ǀaokhoe i, xawe gu ge Israeli toroǃkhamaoga ǀgamkaidisiǀoadisi tarekhoedi tsî ǀgôan tsîna ǃkhōsabese, Samarias ǁga ge ǃgû-ū tsî ǁkhāti ǂgui ǁkhâuǁnâxūn tsîna ge ūsao.
Kēbo-aob Odedi
9 ǃKhūb di kēbo-aob, Oded ti ǀon hâb ge Samarias ǃnâ ge ǁan hâ i. ǁÎb ge Israeli toroǃkhamaogu, ǃkhōsaben ǀkha ǃās ǃnâ ra ǂgâxa hîa ǁîga ǃgûǃoa tsî ge mî: “ǃKhūb sa aboxan di Elob ge Judab ǀkha ge ǁaixa hâ i tsî go dī ǁîbats nî dansa, xawe du ge sado ǁîna ǁgaisi ǀgaub ai go ǃgam. 10 Tsî du ge nēsi nē khoen Judab tsî Jerusalems tsîra dina ra khobodī ǂgao. ǂÂi tama du hâ sadu tsîn ge ǃKhūb, sadu Elob ǃoagu gere ǁore ǃkhaisa? 11 ǃGâ te re. Nē ǃkhōsaben ge sadu ǃgâsana. ǁÎna ǁnāxū, în ǃgû; ǁnā tamas ka i, ob ge ǃKhūba ǁaib âb ǃnâ nî ǁkhara du.”
12 Haka ǂgaeǂui-aogu ǀapasǀkhāb gaosis digu, Johananni ôab Asariab, Mesilemoti ôab Berekiab, Salummi ôab Hiskiab tsî Hadlaib ôab Amasa tsîgu on ge toroǃkhamaogu ǂâibasensa ge mâǃoa. 13 ǁÎgu ge ge mî: “Tā nē ǃkhōsabena nēpa hā-ū. ǀNai da ge ǃKhūb ǃoagu go ǁore tsî ǁîba ǁkharadab nîse go ǁaiǁai, tsî xawe go ge sago, sada ǀhapisa nî ǀaro xū-e ra dī ǂgao.” 14 O gu ge toroǃkhamaoga ǃkhōsaben tsî ǁkhâuǁnâxūn tsîna, ǁaes tsî ǁîn di ǂgaeǂgui-aogu tsîn ai ge ǁkhaeǁnâ. 15 Nē haka khoegu ge ǃkhōsabena gu ǁkhâuǁnâxūna xu, sarana nî māse ǁgaumâihe. O gu ge ǁîna saran tsî ǁharon, ǂûn tsî āxūn tsîna mā tsî ǀhapin âna ǀkhera-oli-i ǀkha ge ǂnâ-ai. ǃGû ǁoa ge ina dâukin ai ǃnao tsî gu ge hoaraga ǃkhōsabena Judab ǃhūb ǁga palmdi ǃās, Jerixos tawa ge oasī-ū. ǁNās khaoǃgâ gu ge ǁkhawa Samarias ǁga ge ǁaru.
Axasi ge Asiriab ai huiba ra ǂgan
(2 Gao-aogu 16:7-9)16-17 Edomǁîn ge ǁkhawa Judaba ǁnāǂam tsî ǂgui khoena ǃkhōsabese ge ū, ǁnā-amagab ge gao-aob Axasa Asiriab di gao-aob Tiglat-Pilesera haisiba tsî huiba ǁîb ai ge ǂgan. 18 ǁNā ǁaeb ǃnân ge Filisteǁîna huriǂoasǀkhāb ǃhomgu amǃgâb tsî ǃkhawagasǀkhāb Judab dib tsîn ǃnâ ǂnôa ǃādi tsîna ge ǂgâǃnâ. ǁÎn ge Bet-Semes, Ajalons tsî Gederots tsîdi tsî ǁkhāti Sokos, Timnas tsî Gimsos tsîde ū tsî ǁîdi ǃnâ ge ǁan. 19 Judab gao-aob Axasi ge ǁîb khoena ǃgôaǁnâ tsî ǃKhūba ǁnâuǀnamoǃnâ, amagab ge ǃKhūba nē ǂōǂōsiba Judab ǂama ge hā-ū. 20 Asiriab di gao-aob Tiglat-Pileseri ge Axasab nî huis ǃās ǃnâ, ǁîba ǂōǂōsib ǀguiba ge ǀaroba. 21 Axasi ge ǃhuniǀuriba Tempeli tsî gao-ommi tsî ǂamkhoegu tsîga xu ū tsî Asiriab gao-aoba ge mā, xawes ge ǁnās tsîna hui bi tama ge i.
Axasi di ǁoren
22 ǂŌǂōsigu ge îbe ǃgom, ob ge gao-aob Axasa ǃaruǀîǀgui ǃKhūba ge ǁnâuǀnamoǃnâ. 23 ǁÎb ge dan bi ge Siriaǁîn di eloga ǁguibade ge ǁguiba. ǁÎb ge nēti ge mî: “Siriaǁîn elogu ge Siriab gao-aoga ge hui, tsîgu ge ǁîga ta ga ǁguibade ǁguibao, tita tsîna nî hui ǁkhā.” Xawes ge ǁnāsa ǁîb tsî ǁaes tsîn ǂama tsūǀkhāba ge hā-ū. 24 Axasi ge ǁkhāti Tempeli di sîsenūxūn hoana ū tsî ge khôaǂkhū. Tsîb ge Tempeli di dao-amde ǂganam tsî Jerusalems di ǁhôadi hoadi tawa altarde ge kuru. 25 ǁÎb ge Judab di ǃādi hoadi ǃnâ ǀūben di ǀgoreǀîǃkhaide ge kuru, ǁîdi tawab ǃhao eloga ǀanǀanǁguibade nî dībase. ǁNātib ge ǁîba ǃKhūb ǁîb aboxan di Eloba ge ǁaiǁai.
26 Axasi ge ǁîb ǂgaeǂguis di tsoatsoasa xu ǀams kōse dī xūn hoan ge ǃNaeǃkhaidi ǂKhanis Judab tsî Israeli tsîkha Gao-aogu dis ǃnâ a xoamâisa. 27 Axasi ge ǁō tsî Jerusalems ǃnâ ge ǁkhōhe, xawe gao-aogu di ǀhobadi ǃnâs ose. ǁÎb ôab Hiskiab ge ǁîb khaoǃgâ ge gao-ao kai.
© Khoekhoegowab Elobmîs © Bible Society in Namibia, 2020.
