1 Makabergu 3 - Khoekhoegowab New Translation 2020 (KKG20)

ǂGurokam dandi Judab didi

1 Judab Makabaeub ge ǁîb îb Matatiab soasa ge ūǃkhuni. 2 ǁÎb ǃgâsagu hoagu tsî ǁgûb di saoǃgonaon tsîn ge ge mâxōǀkhā bi tsîn ge ǃgâiaǂgaob ǀkha Israeli ǃaroma gere torodī.

3 Judab ge kai ǃgâiaǂgaoba ǁîb khoena ge hā-ūba.

ǁÎb ge kaikara khoe-i khami ǁkhaiǁkhausaraba ana,

torob ǁâtaninna ū tsî gere torodīǃgû;

ǁîb di hoaǀkhāǀāgôab ǀkhab ge ǁîb hâǃkhaiba gere ǁkhauba.

4 ǁÎb ge ǁaixa xam-i, ǃgoro rase ra ǁnāǂam-i khami ge ge ī i.

5 Judab ge ǂhanuba ge khôana ôaǂui, ǃgôaǃgon

tsî ǁîb khoena gere ǁgâiǀān hoana ge ǃkhāǂhubi.

6 ǁÎba ǃaob xa gu ge ǂhanuo khoega ge ǂkhabuǂâi;

hoa ǂkhabadī-aon ge ge ǀgomaǂâi,

xawe ǁîb khoenab ge ǁîba ge ore.

7 Judab ge ǂgui gao-aogu di ûiga ge au-au,

xawe Israelǁaesab ge ǁîb di dīgu ǀkha ge ǂkhîǂkhî

tsîs ge ǁîb di ǂâiǂâisensa ǀamose nî ǀkhaehe.

8 ǁÎb ge Judeab ǃāde ǃgûǃnâǃganu

tsî eloxoresa khoen hoana ge hîkākā.

ǁÎb ge Israelǁaesa Elob di ǁaiba xu ge ore.

9 ǁÎb di ǂanǂansasib ge hoaraga ǃhūbaib ai ge khoraǂuisen

tsîb ge ǁnān ǁōb ǀkha ge ǁgarihena ge ǀhaoǀhao.

10 Ob ge Apoloniuba Jodeǁî taman di toroǂnubis tsî Samariab di kai toroǂnubis tsîra, Israelǁîn ǃoagu nî ǃkhamse ge ǀhaoǀhao. 11 Judab ge nēsab ge ǁnâu, o Apoloniub ǃoagu ǃkhamǃgûǂoa, ǁîb di toroǂnubisa dan tsî ǁîba ge ǃgam. ǂGui Jodeǁî taman ge ge ǁō, tsî ûiǃgau gen ge ge ǃkhoeni. 12 Torob ǃnâ ge ǁkhâuǁnâhe xūna gu ge ǀhaoǀhao, ob ge Judaba Apoloniub di hoaǀkhāǀāgôaba ge ū, tsîb ge ûib hâs kōse ǁnā gôab ǀkha gere torodī.

13 Siriab di toroǂnubis di ǂgaeǂgui-aob, Seronni ge Judab ge kai toroǂnubis, ǁîs ǃnâ gu ǁîb di ǂgomǂgomsa toroǃkhamaogu, ǁîb ǀkha hâ tsî ge torob ǃoa gere ǂoaga hâsa ǀhaoǀhao ǃkhaisab ge ǁnâu, 14 o ge mî: “Tita ge aitsama ǀonsa kurubasen tsî ǃgôasiba ti gaosib ǃnâ nî dan. Tita ge toroba Judab tsî ǁîb saoǃgonaon hîa gao-aob mîmāsa ǃgôaǃgâ taman ǃoagu nî dī.” 15 ǁKhawa gu ge ǀgaisa, eloxoresa khoega, ǁîba hui tsî Israelǁaesa nî ǀkhaose ǁîb tawa ge ǀhaoǀhaosen.

16 Tsî Bet-Horonsab ge Seronna ǀgū, ob ge Judaba ǁîb di ǂkhari ǃnans di khoegu ǀkha ge ǃgûǃoa bi. 17 Judab di khoegu ge nē ǁîgu ǃoa ǃgoaxa kai toroǂnubisa gu ge mû, o ǁîba ge dî: “Mâti ge sige ǂkhari ǃnans di khoega, nē kai toroǂnubis ǃoagu a ǃkham ǁkhā? ǁNās ǀguisa tama i tsî ge ge hoaraga tsēsa ǂû tamase hâ tsî tsau hâ!”

18 Ob ge Judaba ge ǃeream: “ǃGom tama i ge hâ, ǂkhari ǃnansa kaisa dansa. ǃKhūb mûǁae i ge ǂguin tamas ka io ǀoron xa huiǂuihes di ǃkharagasi-e a ǀkhai. 19 Torob ǃnâ dans ge toroǂnubis di kaisib ai ǃgaoǃgaosa tama hâ, xawe ǀHomma xu ra hā ǀgaib ai a ǃgaoǃgaosa. 20 Sada khākhoen ge kai ǁēsib tsî ǁgauoǃnâsib ǀkha, sada xūna hîkākā tsîn sage, sage taradi tsî ǀgôan tsîna nî ǃgamse ra hā, 21 xawe sada ge sada ûib tsî ǂgoms ǃaroma ra ǃkham. 22 ǁÎna da ga ǁnāǂam, ob ge ǃKhūba ǁîna nî hîkākā, xuige tā ǃao.”

23 Tsî ǃhoatoab ra hîa gu ge Judab tsî ǁîb di toroǃkhamaoga ǀases timîsi Seronni tsî ǁîb di toroǃkhamaoga ge ǁnāǂam tsî ǁîga ge hîkākā. 24 ǁÎgu ge khākhoega Bet-Horons ǀgūse ǁgoe ǂgāb kōse ǃgôaǃgon tsî ǁaubexa ǁkhaisakaidisi khoega ge ǃgam. Ûiǃgau ge gu ge Filisteǁîn ǃhūb ǃoa ge ǃkhoeni. 25 ǁNās khaoǃgân ge Jodeǁî tamana, hân a ǃkhain hoan ai Judab tsî ǁîb ǃgâsaga ge ǃaotsoatsoa. 26 Gao-aob Antioxub ge Judab di kommi xa ge ǁnâu, tsîn ge ǁaes di khoen tsîna ǁkhāti Judab di dandi xa gere ǃhoa.

Gao-aob ge Lisiaba ǂgaeǂgui-aose ra ǁgaumâi

27 Gao-aob Antioxub ge taren ge ī ǃkhaisab ge ǁnâu, o kaise ge ǁaixa. ǁÎb ge ǁîb gaosib di toroǂnubidi hoade, ǀhao tsî di nî ǀgui kai toroǂnubisa ǂnubi ǃkhaisa ge mîmā. 28 ǁÎb ge ǁîb di mariǂgaesa xu mâ toroǃkhamaob hoaba, kurib di mataresa mā tsî ǂōǂōsib ǁaegu ǃaroma gu nî ǂhomisase hâ ǃkhaisa ge mîmā. 29 Xaweb ge ega mari-i ge ǁîb di mariǂgaes ǃnâ toa ǃkhaisa ge mû. ǁGui-aimarin di hōǂgādi ge ǁîb ge ǃhūb ǃnâ ǃaroma tsūǀkhāb tsî ǃûǂamdi, ǂhanub hîab ge aibekam ǁaeba xu ǀnai ǂnûiǂgā hâ ib tsîn xa ge ǁnā kaihe. 30 Antioxub ge aiǃâkam gao-aogu ǃgâ-ai ǃnāǂamsase ǀkhaexūna gere māǂui, xaweb ge nēsi ǁnāsab aiǃâb ǃoa dī ǁoa, ǂgui māǂuideb ge ūhâ i xui-ao, ǃkhais xa gere ǂâiǂhansen. 31 ǁÎb ge kaise ge ǂkhîoǃnâ i, xaweb ge ǀunis ai Persiab ǃoa ǃgû tsîb ǁgui-aimarina ǀkharigu ǃnâ ǀhaoǀhao tsî kai ǃgôab di mari-e nî oahā-ū, ti ge mîǁgui.

32 ǁÎb ge mûmûsa khoeb Lisiab, gao-aob ǃhari-aisa xu hâba, gao-aob xūnab nî Eufratǃāb tsî Egipteb ǀkharigu ǁaegu kōǃgâ 33 tsî ǁkhāti ǁîb ôaba oahāb nîs kōse nî ǃûise ge ǁgaumâi. 34 ǁÎb ge Lisiaba hoaraga ǂkhoan tsî ǃkhare ǃâb toroǂnubis dib di mûǂamaose ge mâi tsî ǁnās khaoǃgâ dīhe nîse ī xūn di ǁgui-aidi, ǃnāǂamsase taren nî Judeab tsî Jerusalems di ǁanǂgāsaben ǀkha dīhe ǃkhais dide ge mā bi. 35 Lisiab ge Jodeǁîn, ǃgōsase Jerusalems di Jodeǁîn ǃoagub nî toroǂnubisa sî tsî ǀgaib âna khôa tsî xū-i xare-i ǃgau tidese ǁîna hîkākā ǃkhaisa ge mîmāhe. 36 ǁÎb ge ǁîn ǃhūba ū tsîb nî ǃhaokhoen mā, în hoaraga ǀkhariba ǁanǃnâ, ti ge mîmāhe. 37 ǃGau ge ǃkhare ǃâb toroǂnubis diba ū tsîb ge gao-aoba, ǁîb di danaǃās Antioxsa xu ǀguikaidisi tsî hakadisihûǀaǁî kuri ge ǃgû. ǁÎb ge Eufratǃāba ǃgâu tsî Mesopotamiab ǃnâ-ū ge ǃkharu.

Judab di dandi

(2 Makabergu 8:8-29, 2 34-36)

38 Lisiab ge Nikanori, Gorgiab tsî Dorimeneb ôab Ptolemib hâga ǃkhōdana-aose ge ǁhûi. Hoa ǃnonagu ge ǀgaisa aogu “Gao-aob di ǀHōsagu” ti hâ ǂgaiǂamǀonsa ge anu iga. 39 ǁÎb ge ǁîga hakadisiǀoadisi ǀnūtoroǃkhamaogu tsî hûǀoadisi hātoroǃkhamaogu di ǃereamsa mā tsî gao-aob ge mî khami, Judeab di ǃhūba ǁnāǂam tsî hîkākāsa ge mîmā. 40 Nē ǃkhōdana-aogu ge ǁîgu toroǃkhamaogu ǀkha ǂoa tsî Emmaus ǀgūse ǁgoe ǂgāgu tawa gu ge sī, o ǁnāpa hâǃkhaiba ge ǂnaumâibasen. 41 Idumeab hîa Siriab tis tsîna ra ǀonǂgaiheba xu hâ toroǃkhamaogu ge Filistiab digu ǀkha ge māǀhao. ǁNā ǀkharib di ǂharugu-aogu ge Israelǁîn toroǂnubis di ǀgaib xa gu ge ǁnâuo, khedegu tsî mari-i tsîna ū tsî hâǃkhaib tawa ge sī, Israelǁî khoboga gu nî ǁamase.

42 Judab tsî ǁîb ǃgâsagu ge ǃhaotoroǂnubidi ge ǁîn di ǃās ǀgūse hâǃkhaiba hā dībasen, o mâsib ǃaruǀî kaise ra ǃgom ǃkhaisa ge mû. ǁKhāti gu ge gao-aob ge hoaragasen nî khoena hîkākāhesa mîmā ǃkhaisa ge ǂan. 43 ǁNā-amaga gu ge ǁîgu nî hîkākāsa ǁaesa omkhâi tsî ǁîgu ǃhūb tsî Tempela ǃkhamba ǃkhaisa ge mîǁgui. 44 Ob ge hoaraga ǀhûhâsiba, torob ǃaroman nî ǂhomisen, tsîn Elob ǃoa ǀgore tsîn ǀkhomma nî ǂganbasenga ge ǀhao.

45 Jerusalems ge ǃgaroǃhū-i khami ge ǀkhaiǃnâ i;

ǀgui ǁanǂgāsabe-i tsîn ge ǂgâ tamas ka io ge ǂoa tama hâ i.

ǃAnu Tempeli ge ǃhaokhoen xa ge ǃgôaoǃnâ kaihe,

tsîn ge Jodeǁî tamana ǃās di ǁkhui-ommi ǃnâ ge ǁan.

ǃGâiaǂgaob ge Israelǁaesa xu ge ūbēhe,

tsîb ge ǀkhōxūn di ǃgâi ǀōba ǃaruǀî ge ǁnâuhe tama hâ i.

46 Judab tsî ǁîb khoegu tsîgu ge ǀhao tsî Mispas, Jerusalems ǃoagu ǂnôas ǃoa ge ǃgû, ǁnāpan ge Israelǁîna ǀgoreǀîǃkhaisa aiǃâ ūhâ i xui-ao. 47 ǃGam ǃoab ǃnâ gu ge hoaraga tsēsa ǂûtama hâ, ǃoab sarana ana, tsaoba danadi ai tsoro tsî ǁîgu sarana ge doaǃā. 48 Jodeǁî taman ge nēti ī mâsib ǃnâ ǁîn di ǁgôa-elon tawa gere ǀape-ôa, xawe Israelǁaes ge Moseb ǂhanub di ǂkhanisa ǁkhowa-am tsî Elob di ǂgaeǂguis ǂama ǁnāpa gere ôa. 49 ǁÎgu ge pristergu di ǂamsaragu, ǂguro ǃhorob di ǁguibadi, disiǁî ǃâs tsîna ge ǂgâxa-ū, ǁnās khaoǃgâ gu ge ǁîgu mîmâide dīǀoaǀoa hâ Nasirǁîga ge hā-ūhe. 50 Ob ge hoaraga ǀhûhâsiba ge ǀgore: “ǃKhūtse nē xūn ǀkha tare-e ge nî dī? Mâǀî ge ǁîna nî tani? 51 Sa ǃAnu Tempeli ge Jodeǁî taman xa dāǂkhūǂkhūhe tsî ge ǃgôaoǃnâ kaihe, tsî gu ge sa pristerga ǃharaxūb xa ǃoa hâ. 52 Jodeǁî taman ge sida ǁnāǂam tsî nî hîkākāse ge hā. Sats ge tare-en ra ǀapeǀape ǃkhaisa a ǂan. 53 Sats ga hui da tama io, mâti da ǁîna nî mâǃoa.” 54 ǁNās khaoǃgân ge xâiǁnâde xâi tsî ǃgarise ge ǂgaiǂui.

55 ǁNās khaoǃgâb ge Judaba ǁîb khoega ǀoadisidi, kaidisidi, korodisidi tsî disidi di ǃnandi ǃnâ ge ǀgoraǂgā. Tsîb ge ǂgaeǂgui-aoga ǁnā ǃnandi ǂama ge ǁgaumâi. 56 ǁNāgu hîa gere omde om gu, ǃgame nîse i gu, draibeǃhanaba gere ǃhana gu tamas ka io ǃaru ǂgaoga ūhâga, ǂhanuba ǁnâuǀnamsa ǃoa omdi ǃoa ge sî-oa. 57 ǀUnis ais ge toroǂnubisa dāǁnâ tsî Emmaus di ǃkhawagas ǃnâ hâǃkhaiba sī ge ǂnaumâi. 58 Ob ge Judaba ge mî: “Torob ǃaroma ǂhomisen, î go ǁkhoaǂgaoxa! ǁArikam ǃnauǁgoaga nē Jodeǁî taman, hîa go toroǃkhamaoga, sada tsî sada Tempelan ǁnāǂam tsî hîkākāse ǀhaoǀhao hân ǃoagu nî ǃkhamse ǂhomisen. 59 Sada ǁaes tsî Tempeli di hîkākāhesa mûǃnâs xa a ǃgâi ǃkhais ge torob ǃnâ da nî ǁōsa. 60 Xaweb ge ǃKhūba ǁîba ǃgâiba khami nî dī.”