Dans di ǁnaetsanas
ǁNaeǃnans ǂgaeǂgui-aob ǃoa
Davidi Psalms
1 Elob ra khâi, on ge khākhoen âba ra ǀgaruǀgaruhe;
ǁîba ǁkhan hân ge ais âba xu ra ǁhâ.
2 ǀAnni ra ǃgombēhes ǁkhas khamits ge ǁîna ra dībē;
ǂnuruǁnui-i ra ǀaes ǃnâ tsunis ǁkhās khami,
ǁnātin ge ǂkhaba khoena nî kā, Elob ga ǂhaio.
3 Xawen ge ǂhanu-aina ǃgâiaǂgao tsî dâb xa Elob aiǃâ ra urikhâi
tsîn ge dâxase ra ǃgâiaǂgao.
4 ǁNaeba re Eloba, koatsanade ǁîb ǀons ǃgôasib ǃaroma
ǁNāb ǃâudi ai ra ǃgapib,
ǀons âb a ǃKhūba ǀgapiǀgapi
î ǁîb aiǃâ dâ re.
5 ǁNāb hîa ǁgûona ǁgûse ībab,
ǃoataradi di ǂnoaba-aob,
Eloba, ǁîb di ǃanusib ǃnâ.
6 Elob ge ǁnān hîa ra ǀguritsânsena omaridi ǀkha ra ǁanǀhao kai
tsî ǃkhōsabena ra ǃnoraǃnora,
xawe mâǃoaxan ge ǃgaroǃhūb ǃnâ nî ǁan.
7 Elotse sa khoen aiǃâts ge ǃgûǂoao,
ǃgaroǃhūb ǃnâts gere ǀnobao,
8 ob ge ǃhūba ge ǂgubi.
O gu ge ǀhomga ǀnauba Elob aiǃâ ge ǀapi kai
Sinaib Elob aiǃâ
Elob, Israels dib aiǃâ.
9 ǀNanubats ge ǃnāǂamsase ge sî Elotse
tsîts ge ǀumis âtsa tsaus ge, o ge ǁapoǁapo.
10 Sa khoen ge ǁnāpa ǁan hâna;
Elotse sa ǃgâisiba xuts ge satsa ǀgâsana ge aiǂhomiba.
11 ǃKhūb ge mîsa ra mā
tsî tarekhoedi ǃgâiǂhôasa ra ǂoa-ūdi ge a ǂgui
12 “Gao-aogu toroǂnubidi digu ge ra ǃkhoeni.”
Oms tawa hâ tarekhoedi ge ǁkhâuǁnâxūna ra ǀgoraǂui.
13 ǃGaeǃgâǁgarura ǁaegu du ga sī ǁgoeo;
ǁnāpa di ge ǂnabudi, ǀhaiǀurib ǀkha ǃkhûǀkhāsa ǁgabogu
ǁgaboǀamgu âdi ǂkhai ra ǃhuniǀuriba ūhâde hâ.
14 Hoaǀgaixab ge ǁnāpa hâ gao-aoga ǀgaruǀgaru
tsî Salmonǃhommi ai ǃgomma ge hā kai.
15 Elob di ǃhomtse, Basanǃhomtse
ǃnomxa ǃhomtse, Basanǃhomtse!
16 Tarexa go surib ǀkha ra kō, ǃnomxa ǃhomgo,
ǃhomgo Elob ge ǁîb di ǁanǃkhaise ǁhûiǂuigo?
ǃKhūb ge ǀamose ǁîgu ai nî ǁan.
17 Elob di kunidi ge ǀgam ǃnāra di ǀoadisidi di ǀoadiside
ǃKhūb ge Sinaiba xu ǁîb di ǃanusib ǃnâ ge sī.
18 Sats ge ǀgapiseb ǃoa ge ǃapa
tsîts ge ǂgui ǃkhōsabena ge ūsao,
tsîts ge ǃnarexūna khoesib tsî mâǃoa-aona xu ǃkhōǃoa
tsîts ge ǁnāpa ge ǁan ǃKhū Elotse.
19 Ab ǃKhūba koahe re,
tsēsa xu tsēs ǁga sada ǃgomga ra taniba;
Elob sada di huiba.
20 Elob sada Elob ge ra ǃnoraǃnora
ǃKhūb, sada ǃKhūb tawas ge ǁōba xu ǃnorasa hâ.
21 Amaseb ge Eloba ǁîb khākhoen di danade nî ǂkhūǂkhū,
ǀûxa danaǂkhōs, ǁnān ǀhapis ân ǃnâ ra ǃgûman disa.
22 ǃKhūb ge ra mî: “Basanna xu ta ge ǁîna nî oahā-ū;
hurib ǃgamsiba xu ta ge ǁîna nî oahā-ū.
23 ǁÎn ǀaob ǃnâts ǂais âtsa nî dūǂgāse
îb sa arigu di namma ǁîb amǃnâsa khākhoena xu ǂû ǁkhā.”
24 Elotse sa ǃgûgan ge ge mû
ti Elo tsî Gao-aob ǃgûga, ǃanusib ǃnâ.
25 Aisǀkhāb ain ge ǁnae-aona ra ǃgû
ǁîn ǃgâb ai ǀkhō-aona
tsî ǁîn ǁaegu ǂkham khoedi ǃkhomǃkharurude ra ǂnaude.
26 Eloba kare re ǀhaohâgu ǃnâ,
ǃKhūba kare re Israeli ǀaus dido.
27 ǁNāpab ge Benjaminni, ǂkhamma ǁîna nî ǂgaeǂgui,
ǁnāpa xu Judab di ǂgaeǂgui-aoga ǂgui ǃgôab ǃnâ,
ǁnāpa xu gu ge Sebulonni tsî Naftalib hâkha
ǂgaeǂgui-aoga ra sao.
28 Elotse ǀgaib âtsa ǁgau re,
sa ǀgaib sidats ge huiǂui-ūba,
29 sa Tempeli Jerusalems ǃnâ mâba xu,
ǁîb tawa gu gao-aoga ǀkhaexūna ra hā-ūba tsiba.
30 ǁNā ǀgurub ǂāgu ǃnâ ǁan hâba ǂgōǀau re,
ǀhûpe hâ ǁgōgu, ǁaes di tsâun ǀkha hâga.
ǁNān marib ai ǂâisa ǂnûi hâna dāǂkhū re,
ǁnān torodīsa ǀnamna ǀgaruǀgaru re.
31 ǂNûǁkhaeba-aogu ge Egipteba xu nî hā;
Etiopiab ge ǃomgu âba ǃhaese Elob ǃoa nî ūkhâi.
32 ǃHūbaib di gaosiga Eloba ǁnaeba re,
ǃKhūba koaǁnaeba re,
33 ǁnāb ǀhomgu ǃnâ ra ǃgapiba,
tsoatsoasa xu hâ ǀhomgu ǃnâ.
ǁÎb ge dommi âba ra ǀō kai,
ǁîb di ǀgaisa domma.
34 Elob ǀgaiba ǂanǂan re.
ǁKhāsib âb ge Israeli ǂamai hâ
tsî ǂkhaisib âba ǀhomgu ǃnâ.
35 ǃHuriǃhurisab ge Eloba hâǃkhais âb ǃnâ,
Israels di Eloba.
ǁÎb ge ǁaes âba ǀgaib tsî ǁkhāsib tsîkha ra mā.
Ab Eloba koahe re!
© Khoekhoegowab Elobmîs © Bible Society in Namibia, 2020.
