Hebreǁîn 4 - Khoekhoegowab New Translation 2020 (KKG20)

1 ǁÎb di mîmâis, ǁîb sâb ǃnâ ǂgâs dis ganupe mâ, xuige ǂanbasen î-i ǀgui-i âdu tsîna tā ǁîsa ǂoaǃnâ. 2 Sida tsîn ge ǃGâiǂhôasa naun ǁkhān khami ge ǃkhōǃoa. Mîs di aoǁnâsan ge ǁnâu, xawe i ge ǁîn ǃaroma ge harebeoǃnâ i, ǁnâun gere xūnan ge ǂgom tama hâ i xui-ao. 3 Sada ǂgom rada ge sâb ǃnâ nî ǂgâ, Elob ge mî khami:

“Ti ǁaib ǃnâ ta ge ge nū,

‘ti sâb ǃnân ǂgâ tide ǃkhaisa.’ ”

Tsîb ge ǁnāsa sîsengu âb ge ǃhūbaib di ǃgaoǃgaosa xu dītoahe hâ i xawe ge mî. 4 Tsîb ge ǀgui ǃkhai-i ai Xoas ǃnâ hûǁî tsēs xa nēti ge mî: “Tsîb ge Eloba hûǁî tsēs ai ǁîb di hoaraga sîsenga xu ge sâ.” 5 Tsîb ge nēpa ǁkhawa ra mî: “Ti sâb ǃnân ge ǂgâ tide.”

6 ǁNān ǂguro ge ǃGâiǂhôasa aoǁnâbahen ge ǁîn di ǁnâuǀnamoǃnâsib ǃaroma ǂgâ tama ge i, xawen ge ǀnîna ǂgân nî ǃkhaisa nî mā-amhe. 7 Ob ge ǁkhawa ǀnî tsēs, “Nētsēs” ti ra ǂgaihesa ge mîǁgui, ǂomxa ǁaeb khaoǃgâ ge Davidi ǃnâ-u ǀnai mîhe hâ i khami:

“Nētsē, ǁîb di domma du ga ǁnâu,

o sadu ǂgaoga tā karokaro.”

8 Josuab ga ǁîna sâǃkhai-i ǃoa sī-ū hâo, ob ge Eloba nēn khaoǃgâ ǀnî tsē-i xa noxopa ga ǃhoa tama i hâ. 9 ǁNā-amaga i ge ǁnāpa Sabbat sâ-e Elob khoen ǃaroma ǃgau hâ. 10 Elob ge ǁîb di sîsenga xu sâs ǁkhās khami i ge ǁkhāti ǁnā-i, sâb ǃnâ ra ǂgâ-e sîsengu â-e xu nî sâ. 11 ǁNā-amaga a da ǁnā sâb ǃnâ ǂgâsa ǁgūba, î-i tā ǀgui-i tsîna ǁî-i aiǁgaus ǁnâuǀnamoǃnâsib disa sao tsî ǁnā.

12 Elob di mîs ge ûitsama tsî a ǀgaisa. Tsî ǁîs ge hoaǀkhāǀāgôab ǃgâ-ai a ǀā, tsî ra ǃkhāǃganu ǀoms, gagas, uniǁaedi tsî ǂgaeb tsînas ra ǀgoraǃās kōse. Tsîs ge ǂâidi tsî mûǂgāǀgaugu ǂgaob diga ra ǀgoraǃgâ. 13 Tsî kurusabe-i xare-i ge Elob aiǃâ ǂganǃgâsa tama hâ, xawen ge hoa xūna ǁnāb, ǁîb ai da ǃereamsa nî māb di mûǁae ǁkhowa-amsa tsî a ǂhaisa.

Kai ǀGapipristeri* Jesub

14 Kai ǀGapipristeri, Jesub, Elob Ôab* ǀhomga ge ǃgûǃnâba da ūhâ, amaga a da ǂgoms hîa da ra ǁguiǁnâsa ǃkhōǀgaipe. 15 ǀGapipristeri, sada di ǂkhabusasigu ǀkha ra tsâbaǁhaob, mâ ǀgaub hoab ai sada khami ǃâitsâhe hâb, xawe ǁoreoba da kom ūhâo. 16 ǁNā-amaga, a da ǁkhoaǂgaosib ǀkha ǀkhommi di trons ǁga ǀgūǀgūsen, î da ǀkhomxasiba ǃkhōǃoa tsî ǀkhomma hō ǁkhā, ǂhâb ǁaeb ǃnâb nî hui dase.