Jetrob ge Moseba ra sari
1 Jetrob, Moseb ǀuiǁgûb, Midianǃhūb pristeri ge mâtib ge ǃKhūb Eloba Moseba hui tsî Israelǁîn tsîna Egipteba xu ǃnoraǃnora ǀgausa ge ǁnâu. 2 Moseb ge ǁîb taras, Siporas tsî ǁîb ôakha tsîna ǀnairo Jetrob, ǁîb ǀuiǁgûb tawan nî aibe sī hâse ge sîbē hâ i. 3 ǂGuro ǀgôabab ge Moseba Gersom ti ge ǀonǂgai, ǁîb ǂûb ǃnâb ge ge mî: “Tita ge ǁîba Gersom ti ge ǀonǂgai, nē ǃhūb ǃnâ ta a ǃhaokhoe xui-ao.” 4 ǀGamǁî ǀgôabab ge Elieser ti ge ǀonǂgai, nētib ge ǁîb ǂûb ǃnâ mî xui-ao: “Ti îb gere ǀgoreǀî Elob ge hui te tsî Faraob di gôaba xu ge ǃnoraǃnora te.” 5 Jetrob, Moseb ǀuiǁgûb ge Moseb ôakha tsî taras tsîn ǀkha hâse Moseb Elob di ǃhommi ǀgūse ǃgaroǃhūb ǃnâ hâǃkhaiba ǂnaumâi hâpa ge sī. 6 Ob ge Jetroba Moseba nēti ge ǂanǂan: “Sa taras tsî ǀgôakha ǀkha hâse ta ge ra sī sari tsi.” 7 Moseb ge nē ǂhôasab ge ǁnâuo, ǂoa tsî ǁîb ǀuiǁgûb aiǃâ ǃhonǁgoa tsî ǁîba ge ǁoa. ǁNāpa xu kha ge ǂkhaisidîgu tsî Moseb di tentoms ǃnâ ge ǂgâ. 8 Moseb ge ǁîb ǀuiǁgûba hoaraga xūn ǃKhūb ge Faraob tsî Egipteǁîn ǃoagu Israelǁîn ǃaroma dīn, Israelǁîn daob ai gere ǂgâǃnâ ǃgomsigu tsî mâtib ge ǃKhūba ǁîna ǃnoraǃnora ǀgaus tsîna ge mîba. 9 Jetrob ge ǃKhūb ge Israelǁîna dība ǃgâi xūn hoan xa kaise ǃgâiaǂgao, 10 tsî ge mî: “Ab ǃKhūba koasa māhe, Egipteǁîn tsî Faraob ǃomga xu ge ǃnoraǃnora duba! ǁÎb ge Egipteb di khobosisa xu ge ǃnoraǃnora du! 11 Nēsi ta ge ǃKhūb nau elogu hoagu xa a kai ǃkhaisa a ǂan, Israelǁînab ge Egipteǁîn xa ǃgôaǁnâhes di ûiba xu ǃnoraǃnora xui-ao.” 12 Ob ge Jetrob, Moseb ǀuiǁgûba khauǁguibasa Elob ǃaroma ge ǁguiba. Tsî gu ge, Aronni tsî hoaraga Israelǁîn di ǂgaeǂgui-aogu tsîga Jetrob ǀkha nî ǂûǀhaose ge sī.
ǂHanuǂhanu-aogu di ǁgaumâihes
(Deuteronomium 1:9-18)13 Sao ra ǁgoagab ge Moseba ǁaes ǁaegu ge hâ i ǂnoagu-aina, ǁaes khoen xab mâǂnamihe hâse, ǁgoasa xu ǃuis kōse gere ǁnâuǃgâ. 14 Jetrob ge Moseb ra ǁaesa dība xūn hoana mûo, Moseba ge dî: “Tare-e nēts ra ǁaes ǃoagu dīhe? Tare-i ǃaromats nēsa ǀguri ra dī tsîs ǁaesa ǁgoasa xu ǃuis kōse nēti nî mâ?”
15 Ob ge Moseba ǀuiǁgûba ge ǃeream: “Nē ǁaes ge Elob di ǂâisan nî ǂanse tita ǃoa ra hā. 16 ǀGam khoen ǁaegu i ga ǂnoagu-e hâ, on ge tita ǃoa ra hā tsî ta ge Elob mîmādi tsî ǂhanugu ai ǃgaoǃgao hâse ra mîǁgui, tari-i a ǂhanu ǃkhaisa.”
17 Ob ge Jetroba ge mî: “ǂHanu ǀgaub aits ge ǁnāsa dī tama hâ. 18 Nē sîsennats ge ǀguri a dī ǁoa, sats tsî sats tawa ra hā khoen tsîdu ǀguidu ge nî dītoasen. 19 ǁNā-amaga a ta nēsi ǃgâise ǀapemā tsi, ob ge Eloba sa ǀkha nî hâ. Sats ge ǁaes di ǃgomsiga Elob aiǃâ sī-ū tsî ǁaesa nî mâǂgâba. 20 Sats ge ǁîna Elob mîmādi tsî ǂnûiǂgādi tsîna ǁkhāǁkhā tsî mâtin nî ûi tsî tanisen ǃkhaisa nî ǁguiǃāba. 21 Xawe sa xōǀkhā ǁkhāsiba ūhâ, ǂhauǃnâ, eloǃaoǃgâxa tsî ǀhôagaosiba ǁkhan hâ khoega ǁhûi, î ǁnā khoega ǀoadisidi, kaidisidi, korodisidi tamas ka io disidi khoen di ǃgubidi ǂama ǂgaeǂgui-aose ǁgaumâi. 22 A gu ǁîga hoaǁae ǂhanuǂhanu-aogu ase ǁaes khoena ǃoaba. Î gu ǃgomǀgausa ǁhōga sa ǃoa ǀkhī-ū tsî ǂkhari ǁhōna aitsama ǀgoraǃgâ. ǁNās ǀkha gu ge satsa hui tsî sa ǃnaoba ra supusupu. 23 Nēsats ga Elob ge mîmā tsi khami dī, ob ge sa ǃnaoba nî supu tsîn ge nē khoen hoana ǁhōgu ân ǁnâuǃgâtoahe hâ ǃkhais ǃaroma ǂkhîǂâixase ǁîn di hâǃkhaidi ǁga nî ǁaru.”
24 Moseb ge ǁîb ǀuiǁgûb ǀapemāsa ǁnâuǀnam tsî ǁîb ge mîn hoana dī, 25 tsî ǁkhāsiba ūhâ khoega hoaraga Israelǁîn ǁaeguba xu ge ǁhûi. ǁÎgab ge ǀoadisidi, kaidisidi, korodisidi tamas ka io disidi khoen di ǃgubidi ǂama ǂgaeǂgui-aose ge ǁgaumâi. 26 ǁÎgu ge hoaǁae ǂhanuǂhanu-aogu ase ǁaes khoena ǃoaba tsî ǃgomǀgausa ǁhōga Moseb ǃoa ǀkhī-ū tsî ǂkhari ǁhōna aitsama gere ǀgoraǃgâ.
27 ǁNās khaoǃgâb ge Moseba ǁîb ǀuiǁgûba ge tawedeǁnāxū, tsîb ge Jetroba ǁîb di ǃhūb ǁga ge ǁaru.
© Khoekhoegowab Elobmîs © Bible Society in Namibia, 2020.
