Levitikus 1 - Khoekhoegowab New Translation 2020 (KKG20)

Khauǁguibas ǁgaragu

1 ǃKhūb ge ǁîb di Tentomma xu Moseba ǂgai tsî ǁîba sao ra ǁguiǂams 2 Israelǁîn ga ǁguibade ǁguiba on nî dīsa ge mîba.

Khoe-i ga ǃKhūba ǀgoaǁguiba-e ūǀkhībao, o-i ge ǁî-i di goma-i, gū-i tamas ka io piri-e nî ǁguiba. 3 Goma-e ga khauǁguibase ǁguiba khoe-i ge ūo aoreba ǃKhūb di Tentommi ǂgâ-ams tawa ǃKhūb xa nî ūǃoahese nî ǁguiba. 4 ǁNā khoe-i ǁguibagomaba ra ǀkhī-ū-i ge ǁî-i di ǃomma gomab danas ai nî ǁgui tsî i ge ǁî-i ǁoren ǀûbas di ǂkhîbagus ase nî ǃkhōǃoahe. 5 ǁÎ-i ge gomaba ǃKhūb aiǃâ nî ǃgaoxadom tsî gu ge pristergu, Aronni ôaga ǁîb ǀaoba ǃKhūb Tentommi di ǂgâ-ams tawa mâ altars ǃnamgu ai nî ǀgapi. 6 ǁGuibagomaba ra ǀkhī-ū khoe-i ge ǁîb khōba ǁhauǁnâ tsî gomaba ǃâdi ǃnâ nî ǃgaoǃā, 7 tsî gu ge prister Aronni ôaga ǀaena altars ai ǁgui tsî ǀaesa nî khau.Pristeri, altars tawa 8 ǁÎgu ge ǁguibagomab di danas, kaub tsî nau ǃâron tsîn hoana altars ai khausa ǀaes ai nî ǁgui. 9 ǁGuiba-ao-i ge ǃnāxūn tsî ǃūgu tsîna nî ǁāǃanuǃanu, tsîb ge pristera ǁîn hoana altars ai nî ǂhubi, khauǁguibas, ǀaeǁguibas ǃgâi ǁamaba ūhâs, ǃKhūba ǃgâibas ase.

10 Khoe-i ga ǀuiǀnūǀgoana xu khauǁguiba-e dīo, gūn tamas ka io pirina xu, o-i ge ūo aoreba nî ǁguiba. 11 ǁÎ-i ge ǁîba ǃKhūb aiǃâ altars di ǀapasǀkhāb ai nî ǃgaoxadom tsî pristergu, Aronni ôagu ge ǁîb ǀaoba altars di ǃnamgu ai nî ǀgapi. 12 Tsî ǁguiba-ao-i ga ǁîba ǃâdi ǃnâ ǃgaoǃās khaoǃgâb ge pristera danas tsî kaub tsîna ǃkhōǂgā hâse hoana altars ai ra khau ǀaes ai nî ǁgui. 13 ǁGuiba-ao-i ge ǃnāxūn tsî ǃūgu tsîna nî ǁāǃanuǃanu, tsîb ge pristera ǁîn hoana altars ai nî ǂhubi, khauǁguibas, ǀaeǁguibas ǃgâi ǁamaba ūhâs, ǃKhūba ǃgâibas ase.

14 Khoe-i ga ani-e khauǁguibas ase ūǀkhīo, o-i ge ǂnai-i tamas ka io ǂkham ǂnabu-e ǃKhūba nî ǁguiba. 15 Pristeri ge ǁî-e altars tawa sī-ū, ǁî-i danasa ǂgomaǁnâ tsî danasa altars ai nî ǂhubi, tsî ǁî-i ǀaob ge altars di ǃnamgu ai nî ǂnâ kaihe. 16 ǁNās khaoǃgâb ge ǁkhaiǁkhomsa ǃamgu hoagu ǀkha tsuruǁnâ tsî aiǂoasǀkhāb altars dib hîab ra tsaoba aoxūheb ai nî aoxū. 17 ǁÎb ge ǁgabokha ai ǃkhō tsî ǁîkha tsuruǁnâ tamase soros âsa ǁaegub ǃnâ nî ǀgora; tsîb ge pristera ǁîsa altars ai nî ǂhubi, khauǁguibas, ǀaeǁguibas ǃgâi ǁamaba ūhâs, ǃKhūba ǃgâibas ase.