Jerusalems di ǂnubiǂgoab ge ǁkhawa ra ǂnubikhâihe
1 Nētib ge ǃās di ǂnubiǂgoaba ge ǂnubikhâihe. ǀGapipristeri Eljasib tsî ǁîb horesa pristergu ge Gūn Dao-amsa ǂnubikhâi, ǁîsa khai tsî dao-amra âsa ge ǃamǂgā. ǁKhāti gu ge ǂnubiǂgoaba Kaidisigu di ǂGō-ommi tsî Hananeli ǂGō-ommi tsîkha kōse ǂnubitoa tsî ge khai.
2 Sao ra ǃâsa gu ge Jerixos aoga ge ǂnubi.
Imrib ôab Sakuri ge ǁnāpa xu ra sao ǃâsa ge ǂnubi.
3 Hasenaab ǀaokhoegu ge ǁAun Dao-amsa ge ǂnubikhâi. ǁÎgu ge dao-amǃnaoga kurumâi, dao-amra ǃamǂgā tsî ǁîra ǂganamū ǀurigu tsîna ge kurumâi.
4 Hakosi ôab Uriab di ôab Meremoti ge sao ra ǃâsa ge ǂnubikhâi.
Mesesabeli ôab Berekiab di ôab Mesulammi ge sao ra ǃâsa ge ǂnubikhâi.
Baanab ôab Sadoki ge sao ra ǃâsa ge ǂnubikhâi.
5 Tekoas aogu ge sao ra ǃâba ge ǂnubikhâi, xawe ǁîn di ǂamkhoegu ge mûǂamaogu xa gu ge ǁgui-aihe ǃomsîsenna dī ǂgao tama ge i.
6 Paseaxi ôab Jojadab tsî Besodejab ôab Mesulammi tsîkha ge ǀOro Dao-amsa ge ǂnubikhâi. ǁÎgu ge dao-amǃnaoga tsî dao-amra tsîna ǃamǂgā tsî ǂganamū ǀurigu tsî ǃnâu-am ǀurigu tsîga ge kurumâi.
7 Melatjab Gibeons dib, Jadonni Meronots dib tsî Gibeons tsî Mispas hâra di aogu, Eufrati huriǂoasǀkhāb di gowoniab ǃnaka ge hâ igu ge sao ra ǃâsa ge ǂnubikhâi.
8 Harhajab ôab Usieli tsî ǃhuniǀurikuru-aogu tsîgu ge sao ra ǃâba ge ǂnubikhâi.
Hananjab, ǃgâihamxū kuru-aob ge sao ra ǃâsa, ǃās di ǂHabaǂnubiǂgoab kōse ge ǂnubikhâi.
9 Huri ôab Refajab, Jerusalems ǀkharib ǂgaeǂgui-aob ge sao ra ǃâsa ge ǂnubikhâi.
10 Harumafi ôab Jedajab ge sao ra ǃâs, ǁîb oms ǀgūse ge hâ isa ge ǂnubikhâi.
Hasabnejab ôab Hatusi ge sao ra ǃâsa ge ǂnubikhâi.
11 Harimmi ôab Malkijab tsî Pahat-Moab ôab Hasub hâkha ge sao ra ǃâs tsî ǁGanoms ǂGō-ommi tsîna ge ǂnubikhâi.
12 Halohesi ôab Salummi, Jerusalems ǀkharib ǂgaeǂgui-aob ge sao ra ǃâsa ge ǂnubikhâi, ǁîb ôadi xa ra huihese.
13 Hanunni tsî Sanoaxs di ǁanǂgāsaben tsîn ge ǃGoaǃnāb Dao-amsa ge omkhâi. ǁÎn ge dao-amra ǃamǂgā tsî ǂganamū ǀurigu tsî ǃnâu-am ǀurigu tsîga kurumâi tsî ǂnubiǂgoaba hakakaidisi tsî hakadisi metergu gaxusiba, ǀapob ǀgūse ǂnôa dao-ams kōse ge ǂnubikhâi.
14 Rekab ôab Malkijab, Bet-Hakeremǀkharib ǂgaeǂgui-aob ge ǀapob ǀgūse ǂnôa dao-amsa ge ǂnubikhâi. ǁÎb ge dao-amra ǃamǂgā tsî ǂganamū ǀurigu tsî ǃnâu-am ǀurigu tsîga ge kurumâi.
15 Kolhoseb ôab Salummi, Mispaǀkharib ǂgaeǂgui-aob, ǀAus Dao-amsa ge ǂnubikhâib ge ǁîsa ǁguiǂamǃnâ, dao-amra ǃamǂgā tsî ǂganamū ǀurigu tsî ǃnâu-am ǀurigu tsîga ge kurumâi. ǁÎb ge ǁkhāti Selaǁgams ǂnubiǂgoab gao-aob ǃhanab ǀgūse ǁgoeba, Davidi ǃĀs di ǃapa-ūdadi tawab ra sīs kōse ge ǂnubikhâi.
16 Asbuki ôab Nehemiab, Betsurǀkharib ǂgaeǂgui-aob ge sao ra ǃâsa, Davidi ǀhobadiǂgās tsî ǀaus tsî ǁē-aogu di hâǃkhaib kōse ge ǂnubikhâi.
ǂNubiǂgoab tawa gere sîsen Leviǁîgu
17 Nau ǃâdi ǂnubiǂgoab didi ge sao ra Leviǁîgu xa ge ǂnubikhâihe:
Banib ôab Rehummi ge sao ra ǃâsa ge ǂnubikhâi.
Keilaǀkharib di ǂgaeǂgui-aob Hasabjab ge ǁîb di ǀkharib ǀons ǃnâ, sao ra ǃâsa ge ǂnubikhâi.
18 Henadadi ôab Bawaib, nau Keilaǀkharib di ǂgaeǂgui-aob ge sao ra ǃâsa ge ǂnubikhâi.
19 Jesuab ôab Eseri, Mispas ǂgaeǂgui-aob ge ǁâtanin ommi ams ai hâ ǂnubiǂgoaba ǁhôas kōse ge ǂnubikhâi.
20 Sabaib ôab Baruki ge sao ra ǃâsa, ǁhôasa xu ǀgapipristeri Eljasib oms di dao-ams kōse ge ǂnubikhâi.
21 Hakosi ôab Uriab di ôab Meremoti ge sao ra ǃâsa Eljasib oms di nauǀkhāb kōse ge ǂnubikhâi.
ǂNubiǂgoab tawa gere sîsen pristergu
22 Nau ǃâdi ǂnubiǂgoab didi ge sao ra pristergu xa ge ǂnubikhâihe:
Jerusalems ǂnamipe ǁgoe ǀkharib di pristergu ge sao ra ǃâsa ge ǂnubikhâi.
23 Benjaminni tsî Hasub hâkha ge sao ra ǃâs, ǁîkha omra ais ai hâsa ge ǂnubikhâi.
Ananiab ôab Maasejab ôab di ôab Asariab ge sao ra ǃâs ǁîb oms ais ai hâsa ge ǂnubikhâi.
24 Henadadi ôab Binuib ge sao ra ǃâsa Asariab omsa xu ǁhôas kōse ge ǂnubikhâi.
25-26 Usaib ôab Palali ge sao ra ǃâsa, ǁhôasa xu tsoatsoa tsî ǀgapikab gao-ommi di ǂgō-ommi, Tempelǃgāgu di hâǃkhaib ǀgūse mâb kōse ge ǂnubikhâi.
Parosi ôab Pedajab ge sao ra ǃâsa, aiǂoasǀkhāb ǁGam Dao-ams tsî Tempeli amǃgâ mâ ǂgō-ommi ǀgūseb kōse ge ǂnubikhâi. (ǁNās ge ǃās di ǃâs, Ofel ti gere ǀonǂgaihes, Tempelǃgāgu ge ǁanǃnâ hâ isa.)
Nau omaogu
27 Tekoas aogu ge ǁkhawa sao ra ǃâsa, Tempeli di ǂgō-ommi ǃoaguba xu Ofels di ǂnubiǂgoab kōse ge ǂnubikhâi.
28 Hān Dao-ams di ǀapasǀkhāba xu gu ge pristerga, mâb hoaba ǁîb oms ais ai hâ ǃâsa ge ǂnubikhâi.
29 Imeri ôab Sadoki ge sao ra ǃâs, ǁîb oms ais ai hâsa ge ǂnubikhâi.
Sekanjab ôab Semajab, Aiǂoas Dao-ams di ǃûi-aob ge sao ra ǃâsa ge ǂnubikhâi.
30 Selemjab ôab Hananjab tsî Salafi di ǃnaniǁî ǀgôab Hanunni tsîkha ge sao ra ǃâs, ǁîkha di ǀgamǁîsa ge ǂnubikhâi.
Berekiab ôab Mesulammi ge sao ra ǃâs, ǁîb oms ais ai hâsa ge ǂnubikhâi.
31 ǃHuniǀurikuru-aogu di ǀguib, Malkijab ge sao ra ǃâsa, Tempelǃgāgu tsî ǂharugu-aogu di ommi, Mifkab Dao-ams tawa, ǂnubiǂgoab ǁhôas ǂamǃnâ mâ ǃnā-oms ǀgūse mâb kōse ge ǂnubikhâi.
32 ǃHuniǀurikuru-aogu tsî ǂharugu-aogu tsîn ge ǀuniga ǃâs, ǁhôas tawa mâ ǃnā-omsa xu Gūn Dao-ams kōse ra sīsa ge ǂnubikhâi.
© Khoekhoegowab Elobmîs © Bible Society in Namibia, 2020.
