ǃKhūb ge oresa ra mîmâi
1 ǃKhūb ai ǁhaoǁaeb ai ǀnanuba ǂgan re. ǃKhūb ge ǁnāb ǃguruǀnanude ra māba; ǁîb ge ǁnāb mâ-i hoa-e ǃhanaǂûna ra māba. 2 ǁGôa-elon ge ǂkhabasiba ra ǃhoa; aimûǀgaru-aon ra mûn ge a ǂhumi, tsî ǁhapodi ǁîn ge ǁguiǃādi ge ī tama ge i. ǁNā-amagas ge ǁaesa ra hâma, ǃûi-ao-e ūhâ tama gūn khami.
3 ǃÛi-aogu ǃoagub ge ti ǁaixasiba ge ǂhubi tsî ta ge ǂgaeǂgui-aoga nî ǁkhara tib ge ǃKhūb Hoaǀgaixaba ra mî. ǁÎb ge ǁaes âb, ǁîb di gūn, Judab ommi dina ra kōǃgâ tsîb ge ǁîna toroǃkhams ǃnâ ra dan hāb ase ra dī. 4 ǁÎba xus ge ǁhôaǀuisa ra hā, ǁîba xu tentǀuriba, ǁîba xu khās ǃkhams disa, ǁîba xu gu ge ǀhûpe doeǁga-aoga nî hā. 5 ǀGaisa ǃkhamaogu khamin ge Judab khoena khākhoen âna ǂgoab khami nî dāǃgâ. ǁÎn ge nî ǃkham, ǃKhūb ǁîn ǀkha hâ amaga, hāǃgapi-aogan ge nî taotao.
6 Tita ge Judab omma ǀgaiǀgai
tsî Israeli omma nî sâu.
ǁÎna ta ge nî ǀkhom
tsî i ge ǁîna ta ge ǂhara tama hâ i khami nî ī.
Tita ge ǃKhūta, ǁîn di Elota,
ǁîn ǀgorede ra ǁnâu-am ta.
7 Tsîn ge Efraimmi, ǀgaisa khoeb khami nî ī
tsîn ge ǂauxûi-e ā hâ khami nî ǃgâiaǂgao.
ǀGôan ân ge nēsa mû tsî nî ǃgâiaǂgao
tsî gu ge ǂgaogu âna ǃKhūb ǃnâ nî ǃgâiaǂgao.
8 “Tita ge ǂnam
tsî ǁîna nî ǂgaiǀhao.
Tita ge ǁîna ore
tsî ge ǂguiǂgui, ǀnain ge ǂgui i khami.
9 Tsî ta ge tita ǁîna ǁaedi ǃnâ nî ǀgaruǀgaru;
ǃnū ǃhūgu ǃnân ge tita xa nî ǂâi,
tsîn ge oa tsî ǁîn ôan ǀkha sī nî ǁan.
10 Tsî ta ge ǁîna Egipteba xu nî oaǀkhī-ū
Asiriaba xu ta ge ǁîna nî ǀhaoǀhao;
Gileadǃhūb tsî Libanonni ǃoa ta ge ǁîna nî hā-ū;
ǁnāpan ge ǂâu hâ ǃkhai-e ūhâbahe tide.
11 Tsîb ge ǁîba ǂōǂōsib huriba nî ǃgâu
tsîb ge hurib ǃgabigu ai nî ǂnau.
Tsî gu ge ǁîga hoaraga ǃgamsigu Nylǃāb diga nî ǂnâ kai,
tsî Asiriab di ǃgurisib ge nî ǃgamǃgamhe
tsîb ge Egipteb di ǀkharuba nî kā.
12 Tita ge ti ǁaesa ǃKhūb ǃnâ nî ǀgaiǀgai
tsîn ge ǁîb ǀons ǃnâ nî ǃgû,” tib ge ǃKhūba ra mî.
© Khoekhoegowab Elobmîs © Bible Society in Namibia, 2020.
