Josuab
1 Nunni ôab, Josuab ge ǀgaisa toroǃkhamao tsî Moseb khaoǃgâ ge hâ i kēbo-aoba. ǁÎb ge ǁîb di ǀons ra ǂâibasen khami, ǃKhūb di ǁhûiǂuisa khoena ge ore. ǁÎb ge ǁîna ge ǁnāǂam khākhoena Israelǁaes nî ǁîs di ǃhūba hō-oa ga ge ǃkhamdan. 2 Mâtikōseb ge ǁîb ǁôakha khui tsîb ge ǃādi ǂama hâ ǁnāǂamsa ǂgaeǂguio, ǂkhaisa i! 3 Khoe-i xare-i ge ǁîb ǃoagu ge mâ ǁoa i; ǁîb ge ǃanu toroba ǃKhūb ǃaroma gere ǃkham. 4 ǁÎba soresa ǀhommi aib ai mâ kai tamab ge i? ǁÎba ǀgui tsēsa ǀgam tsēra di gaxusiba mā tama ge i? 5 Khākhoen gere hoa ǀkhāga xu ǁēba bio, ob ge hoaǀgaixa ǃKhūb, Hoan xa ǀGapib ǃoa ge ǀgore, 6 os ge ǁîb ǀgoresa ge ǁnâu-amhe tsîb ge ǀgaisa ǃnareba khākhoetoroǃkhamaogu ai ge ǁnā. ǃKhūb ge ǁîga hoaragase ge hîkākā. Khākhoetoroǃkhamaogu ǃhomma xu ra ǁgôaxa hîab ge ǃKhūba, Josuaba gere mâǃoa ǂgaon hoana ge hîkākā. ǁÎb ge nēsa, mâpa xub Josuaba ǃkhams di ǀgaiba ra hō ǃkhaisab ǃhūbaiba nî ǂanga ge dī. Josuab ge Hoaǀgaixa ǃKhūba ǁnâuǀnam hâ i, xui-aob ge ǃkhammi gereo, ǃKhūb xa gere sâuhe.
Kaleb
7 Josuab ge Moseb ge ûi hâ is kōse ge îǂhôa i, ǁîb tsî Jefuneb ôab, Kaleb tsîkha hoakha. ǁÎkha ge hoaraga ǀhûhâsiba ge mâǃoa tsî ǁîna ǁorena xu ūdawasen kai tsî ganganoǃnâsib ǃgaesende ge ǀû kai. 8 ǃNanikaidisiǀoadisi Israelǁîn, ǃgaroǃhūb ǃnâ-ū ge ǃgûn ge ge ǁō. Kaleb tsî Josuab hâkha ǀguikha ge ge sâuhe tsî ǃkhū hâ tsî ǂûtanixa ǃhūb, ǁîkha di kai nîb ǃnâ ǂgâsa ge mā-amhe. 9 ǃKhūb ge Kaleba ǀgaiba ge mā hâ i tsîb ge kairab ge xawe noxopa ǃnâuxa ǃhūb aib a ǂoa ǁkhās kōse ge ǀgaisa i, tsî ǁîba ǁîb tsî ǁîb di ôananôagub di ǀumis ase ge ǁkhâuǁnâbasen. 10 Nēs ge hoaraga Israelǁaes, mâtikōse i Elobats ga ǁnâuǀnam, o ǃgâi ǃkhaisa nî mûga ge ī.
ǂHanuǂhanu-aogu
11 ǁNāpa gu ge ǂhanuǂhanu-aogu, mâb hoab ge ǁîb di ǂhanub ǃnâ koahegomxa igu, tātsē ge ǁgôa-eloǃoabas ǃnâ ǁnā tsî Eloba ǁnāxū tama hâ iga ge hâ i. 12 A gu nē ǂhanuǂhanu-aogu di ǂkhōga, ǁgoegu hâ ǃkhaiba xa ǀasa ûiba ais ǁga sîǂui! A gu nē ǃgôaǃgôasa ǂhanuǂhanu-aoga, ǁîgu di ôananôagub ǃnâ ǁkhawa ûi.
Samueli
13 Samueli ge ǃKhūb xa ge ǀnamhe i. ǃKhūb di kēbo-aob aseb ge gaosiba ǂnubi tsî ǂgaeǂgui-aoga khoen ǂama ge ǁgaumâi. 14 ǃKhūb di ǂhanub ǃoab ge ǁaesa gere ǀgoraǃgâ tsîb ge ǃKhūba Israelǁaesa ge sâu. 15 Samueli gere ǃKhūba ǂgomǂgomsase ǃoaba xui-aon ge ǁîba kēbo-aose ge ūǃoa. ǁÎb di mîde xun ge amaseb gere ǃKhūba ǃhoaba ǃkhaisa a ǂan. 16 Khākhoen ge hoaǀkhāga xu ǁēba bi, ob ge Hoaǀgaixa ǃKhūb ǃoa ǀgore tsî ǂkham ǁkhao-e ǁguibas ase ge ǁguiba. 17 Ob ge ǃKhūba ǁîb domma, ǀgaisa ǃgurub khami ǀhomma xu ǁnâusen kai 18 tsî hoaraga khākhoen tsî ǂgaeǂgui-aogu Filisteǁîn digu tsîna ge hîkākā. 19 ǁŌb nîs aiǃâb ge Samuela, ǃKhūb tsî ǀnauhesa gao-aob aiǃâ, khoe-i di ūhâxū-i kas, ǁharora xawera kas hoasab ū tama tsî i khoe-i xare-e ǁîba ǂnoaǃoa tama ǃkhaisa ge ǁapoǁapo. 20 ǁŌb ges khaoǃgâs tsînab ge gao-aob Sauli ǃoa ǃhoa tsî Sauli ǃhaese nî ǁō ǃkhaisa ge aimûǀgaru, khoena nî ǁîn di ǁorena xu ǃnora kaise.
© Khoekhoegowab Elobmîs © Bible Society in Namibia, 2020.
