Hoseab ge Israeli ǁkharaba ra ǂanǂan
1 Tā ǃgâiaǂgao, sadu Israeli dido, ǁaedi ra dī khami; sadu ge aitsama sadu Eloba xu ge ǀaiǁgôa; ǀai-aode hoa dāǃnâǃkhaigu ǃhorob digu ai ǃgaesa du ge ge ǀnam i. 2 Dāǃnâǃkhaidi tsî ǀāǃnâǃkhaidi ge ǁaede ǂûmā tide, tsî ǀasa ǂauxûib ge ǁîna nî gā. 3 Tsîn ge ǁîna ǃKhūb di ǃhūb ǃnâ hâhâ tide tsîb ge Efraimma Egipteb ǁga nî oa tsîn ge Asiriab ǃnâ ǃanuoǃnâ ǂûna nî ǂû. 4 ǁÎn ge ǃKhūba ǂauxûiǁguibade ǁguiba tide tsî di ge ǁîba ǃgâiba tide; ǁguibadi ân ge ǃoab di pere-i khami ǁnān ǁî-e ga ǂûna nî ība. 5 Tare-ets mîmâisa ǁâudīb tsēs ai nî dī, tsî ǁâudītsēs ǃKhūb dis ai? 6 Hîǀhurusa xun ga ǁhâ xaweb ge Egipteba ǁîna nî ǀhaoǀhao, Memfis ge ǁîna nî ǁkhō; ǁîn di ǃgomǀgausa ǀhaiǀurib ge ǁîǁhain xa nî ǁhaiǂganhe tsîn ge ǁkhūna ǁîn tentdi ǃnâ nî hâ.
7 ǁKharab tsēdi ge go hā, tsēdi ǀkhaob didi ge go hā! Israeli dina ǂan kai re. “Kēbo-aob ge a gâ; gagab di khoeb ge ǃkhau hâ!” Sa kai ǃûǂamdi ǃaromab ge sa ǁkhanna a kai. 8 Kēbo-aob ge Efraimmi, ti Elob di ǁaes di ǃûi-ao, xawe gu ge aniǃkhō-aob di ǁnoaga kēbo-aob daogu ǃnâ ge ǁgui, khākhoesiba Elob ommi ǃnâ. 9 Gibeab tsēdi ǃnâs khamin ge ǁgaoǁgaosen hâ; ǁîb ge dīsādi âna ǂâihō tsî ǁîna nî ǁkhara.
Israeli ǁoreb tsî ǃaromadi
10 ǃKhūb ge ge mî: “ǃGaroǃhūb ǃnâ hâ draibehain khami ta ge Israela ge hō. ǂGuro ǂûn ǀnomahais din khami ta ge sadu aboxana ge mû. ǁÎn ge Baal-Peorsa xu hā tsî aitsama taosiba ǁîn ai ge khaibasen, tsîn ge ge ǁgaisi xū kai, ǀnamn hâb khami. 11 Efraimmi ǂkhaisib ge ani-i khami nî ǁkhanabē; ǁora-i tamas ka io ǁhā-i tamas ka io ǀgamǀkhā-i ge hâ tide. 12 Tsî ǀgôanan ga kaikai xawe ta ge tita ǁîna khoe-i xare-i ǃgau tides kōse nî ǃoaǃoa. Tsūba re ǁîna, tita ga ǁîna xu bēo.”
13 Efraimmi ge Tirus, ǃû-aiǃhūb ǃnâ tita xa ǃhanahe hâs khami īse ra mûsen. Xaweb ge Efraimma ôasana ǃgamaob ǃoa nî ǂoaxa-ū. 14 Tare-ets kha ǁîna nî mā ǃKhūtse? ǁÎna ǀgôao ǃnāb tsî ǀōsa samde mā re.
ǃKhūb di ǀgoraǃgâs Israels ǂama
15 ǃKhūb ge nēti ra mî: “Hoaraga ǂkhabasib ân ge Gilgals tawa hâ. ǁNāpa ta ge tita ǁîna ǁîn sîsengu di ǂkhabasib ǃaroma ǁkhan tsî ti omma xu nî doeǁgaǂui. ǃAruǀî ta ge ǁîna ǀnam tide, hoaraga ǂgaeǂgui-aogu ân ge a mâǃoaxa. 16 Efraimmi ge ǂnauhe hâ tsîb ge ǃnomab âna ǂnâ hâ tsîn ge ǂûtani tama hâ. ǁÎn ge nî ǁora tsî ta ge tita ǁnān hîa ǁîna a ǃgomǀgausabana nî ǃgam.”
Kēbo-aob ge Israeli xa ra ǃhoa
17 Tita ra ǃoaba Elob ge ǁîna nî ǂhara, ǁnâuǀnamoǃnân a amaga; ǁîn ge ǀnarema rase ǁaedi ǃnâ nî ī.
© Khoekhoegowab Elobmîs © Bible Society in Namibia, 2020.
