Pristergu di ǀnauǂgāhes
(Eksodus 29:1-37)1 ǃKhūb ge Moseba ge mîmā: 2 “Aronni tsî ǁîb ôagu tsîga ǃKhūb di Tentommi ǂgâ-ams tawa sī-ū, î ǁkhāti pristersi saran, ǀnau-ū-oli-i, ǂkham gomaba ǁoreǁguibas ǃaroma, baikha tsî khūkhū-e ūhâ tama pere-i hâǃnâ ǃores tsîna ǀkhī-ū. 3 ǁNās khaoǃgâ hoaraga ǀhûhâsib Israelǁîn diba ǁnāpa ǂgaiǀhao.”
4 Moseb ge ǃKhūb ge mîmā bi khami ge dī tsîb ge hoaraga ǀhûhâsiba ǃKhūb di Tentommi tawa sī ge ǀhao, 5 ob ge ǁîn ǃoa ge mî: “ǃKhūb ge mîmā te xūn hoana ta ge nēsi nî dī.”
6 Moseb ge Aronni tsî ǁîb ôagu tsîga ǂgaiǀgū tsî ǁîga ǁgam-i ǀkha ge ǁā. 7 ǁÎb ge Aronna ǃnubuǁôasarab tsî anisa anaǂamsarab tsîna ǂgaeǂgā tsî kamanaǃgaesenni ǀkha ge ǃgae. ǁÎb ge ǁîba efoda ǂgaeǂgā tsî tsaura lapin ǀkha ǂomsa kamanaǃgaesenni ǀkha ge ǃgae. 8 ǁNās khaoǃgâb ge ǁkhaisarasa ǁîba ana tsî ǁîs ǃnâ Urimn tsî Tumimn tsîna ge ǂgā. 9 Moseb ge ǁîba ǃkhaiǀgapasa ǀgapa tsî ǃkhaiǀgapas di ǃūs ai ǃhuniǀuri ǁharesa ge ǂnûi, ǃanu saos Aronni ǀnauǂgāhes dis ase, ǃKhūb ge mîmā khami.
10 Moseb ge ǃaruǀî ǀnau-ū-oli-i ǀkha ǃKhūb Tentommi tsî ǁîb ǃnâ hâ xūn hoana ǃKhūb di ǃgôasib ǃoa ge khai. 11 ǁÎb ge ǀnî ǀnau-ū-oli-i ǀkha ǁguiba-aihe ra altarsa ǁîs ai ra sîsenūhe xūn hoan ǀkha hû ǃnāde ge ǀgapi-ai tsî ǁkhāti brons-i ǀkha kurusa kai ǃoreb, bronsǃgaoǃgaoba ūhâb tsîna, ǃKhūb di ǃgôasib ǃoa ge khai. 12 ǁÎb ge Aronni di danas ai oli-e ǂnâs ǀkha ǁîba ǃKhūb di ǃoabas ǃnâ ge ǀnauǀgā. 13 Moseb ge ǃaruǀî ǃKhūb ge mîmā bi khami Aronni ôaga ǂgaiǀgū tsî ǁîga ǃnubuǁôasaraga ǂgaeǂgā, kamanaǃgaesengu ǀkha ǃgae tsî ǃkhaiǀgapade ge ǀgapa.
14 ǁNās khaoǃgâb ge Moseba ǁoreǁguibas di tsâuba ge hā-ū kai, tsî Aronni tsî ǁîb ôagu tsîga ǁîgu ǃomga tsâub di danas ai ge ǁgui kai. 15 ǁÎb ge tsâuba ǃgam, ǀnî ǀaob tsâub dib ǃnâ ǀkhunuba ǀhari, tsî haka ǁnâgu altars ǂnamipe mâgu ai ge ǂkhau, ǃKhūbdi ǃgôasib ǃoa. ǃGau ra ǀaobab ge altars di ǃgaoǃgaob ai ge ǁhōǂui. ǂKhîbagusa dīs ǃaromab ge ǁîsa ge ǃanuǃanu. 16 ǁNās khaoǃgâb ge Moseba hoaraga ǀhaub hîa ǃnāxūn hoana ra ǃgū-aib, ǂoaǂamsa ǃâb âis dib, ǃnaira tsî ǁîra ai hâ kaub tsîna ū tsî altars ai ge ǂhubi. 17 ǃAruǀîb ge ǁîba nau ǃâb tsâub dib, ǁîb di khōb ǀkha, ǁgan-i tsî ǃnāxūn tsîna ū tsî Tentommi di ǃaugab ai khausa ǀaes ǃnâ ge ǂhubiǂui, ǃKhūb ge mîmā bi khami.
18 Sao raseb ge Moseba khauǁguibas ǃaroma baiba hā-ū kai tsî Aronni tsî ǁîb ôagu tsîga baib di danas ai ǁîgu ǃomga ge ǁgui kai. 19 Moseb ge baiba ǂā tsî altars di ǂnamipe ǀaob âba ge ǁhō. 20-21 ǁÎb ge baib di ǁgan-e ǃâdi ǃnâ ǃgaoǃā, ǃnāxūn tsî ǃūgu tsîna ǃanuǃanu kai tsî danas, kaub tsî nau ǃân baib din hoana altars ai ge ǂhubi, ǃKhūb ge mîmā bi khami. Nēs ge khauǁguibas, ǀaeǁguibas, ǃgâi ǁamaba ūhâsa, ǃKhūba ǃgâibas ase.
22 Moseb ge pristergu di ǀnaus ǃaroma nau baiba ge hā-ū kai tsî Aronni tsî ǁîb ôagu tsîga baib di danas ai ǁîgu ǃomga ge ǁgui kai. 23 ǁÎb ge baiba ǃgam kai tsî ǀnî ǀaob ǁîb diba ū, tsî Aronni amǀkhāb ǂgaeǂaob, ǁîb amǀkhāb ǃommi di kai ǀkhunus tsî ǁîb amǀkhāb ǂais di kai ǀkhunus tsîna ge ǂkhau. 24 Moseb ge ǃaruǀî Aronni ôaga ǂgaiǀgū tsî ǀnî ǀaob baib diba ū tsî ǁîgu amǀkhāb ǂgaeǂaodi, ǁîgu amǀkhāb ǃomgu di kai ǀkhunudi tsî ǁîgu amǀkhāb ǂaidi di kai ǀkhunudi tsîna ge ǂkhau. ǃGau ra ǀaobab ge altars di ǂnamipe ge ǁhō. 25 ǁÎb ge baib di kaub hoab, ǂarekaus, hoaraga ǃnāxūna ǃgū-ai hâ ǀhaub, ǂoaǂamsa ǃâs âis dis, ǃnaira tsî ǁîra ai hâ kaub tsî amǀkhāb tîs tsîna ge ū. 26 ǁÎb ge ǃKhūb ge ǁguibahe khūkhū-e ūhâ tama pere-i di ǀharusa xu ǀgui pereb, ǀkhera-oli-i ǀkha hâb tsî ǂkhari tsampereros tsîna ū tsî ǁîna baib di kaub tsî amǀkhāb tîb ǀgapise ge ǁgui. 27 Nē ǂûn hoanab ge Aronni tsî ǁîb ôagu tsîga ge mā, î gu ǀō-aisa mās ase ǃKhūba khaiba. 28 Moseb ge ǁîna ǁîgu di ǃomga xu ū tsî altars ai, khauǁguibas di ǀgapise ǀaeǁguibas ase ge ǂhubi. Nē ǁguibas ge ǃgâi ǁamaba ūhâs ǃKhūba ǃgâibas ase ge ī i. 29 ǁÎb ge baib di ǁkhaiba ū tsî ǀō-aisa mās ase ǃKhūba ge khaiba. Nēs ge pristersi ǀnaus di baib ǃâs Moseb di ge isa. ǁÎb ge hoaraga xūna ǃKhūb ge mîmā bi khami ge dī.
30 ǁNās khaoǃgâb ge Moseba ǀnau-ū-oli-i tsî baib di ǀaob, altars ai ge mâ ib tsîna ū tsî Aronni tsî ǁîb saran tsî ǁîb ôagu tsî ǁîgu saran ai ge ǀgapi; nē ǀgaus aib ge ǁîgu tsî ǁîgu saran tsîna ge khai ǃKhūb di ǃoabas ǃoa.
31 Moseb ge Aronni tsî ǁîb ôagu ǃoa ge mî: “ǃKhūb di Tentommi ǂgâ-ams tawa nē ǁgan-e sâi, î ǀharus ǃnâ hâ peren ǀnaus ǁguibas din ǀkha ǁnāpa ǂû, ǃKhūb ge mîmā hâ i khami ǀgui. 32 ǃGau ra ǁgan-i tamas ka io pere-i ge nî ǂhubiǂuihe. 33 ǀNaus di ǁāxasib nî toas kōse du ge hû tsēdi ǀgaiba ǃKhūb di Tentommi ǂgâ-ams tawa ǂoa tide. 34 Nētsē da go dī xūna da ge ǁoreǀûbas di ǂkhîbagus ǃaroma, ǃKhūb di mîmās ǃoa go dī. 35 ǁNā-amaga du ge hû tsēdi ǀgaiba tsēs tsî tsuxuba ǃKhūb di Tentommi ǂgâ-ams tawa nî hâǀgara, î du tā ǁō.” 36 ǁNāti gu ge Aronni tsî ǁîb ôagu tsîga ǃKhūb ge Moseb ǃnâ-u a mîmā xūn hoana ge dī.
© Khoekhoegowab Elobmîs © Bible Society in Namibia, 2020.
