Linekamanaǃgaesenni
1 Nētib ge ǃKhūba ra mî: “ǃGû î linekamanaǃgaesenna sī ǁama, î kamanab âts ai ǃgae, xawe tā ǁgam-i ǃnâ ǀhari.” 2 O ta ge ǃKhūb di mîs ai kamanaǃgaesenna ǁama tsî ti kamanab ai ge ǃgae. 3 Tsîs ge ǃKhūb di mîsa ǀgamǁî ǃnāsa ge hāba te: 4 “ǁAmats go kamanaǃgaesenni, sa kamanab ai hâba ū, îts khâi tsî Eufrati ǁga ǃgû tsî ǁnāpa, ǁhoab ǃnâ sī sâu.” 5 O ta ge ǃgû tsî Eufrati tawa ǃKhūb ge mîmā te khami dī tsî ǁîba sī ge sâu.
6 ǁAe-i khaoǃgâb ge ǃKhūba “Khâi îts Eufrati ǁga ǃgû tsî ǁnāpa ta ge sâu kai tsi kamanaǃgaesenna sī ū” ti ge mîba te. 7 O ta ge Eufrati ǁga ǃgû tsî ôa tsî sâu ta ge hâ ipa kamanaǃgaesenna ge ūǂui. Sarab ge ge ǂkhôahe hâ i tsî ǃaruǀî ge sîsenūhe ǁoa i.
8 ǁKhawab ge ǃKhūba ge ǃhoa-ū te: 9 “Nēb ge ǀgaub ǁîb ai ta Judab tsî Jerusalems di ǃguriǂgaoxasiba nî hîkākāba. 10 Nē ǂkhaba khoen, ti mîde ǁnâusa ǂkhā tsî ǃnâudanaxasib ân ǃnâ ǁîn ǂgaoga sao tsî ǁgôa-elona, ǁîna nî ǃoabase ge saon ge ǁnā kamanaǃgaesenni khami nî harebeoǃnâ. 11 Kamanaǃgaesenni ra aorekhoeb kamanab ai ǂae khami ta ge Israeli ommi din tsî Judab ommi din hoana tita ai ge ǂae kai, titan ǁaese, ǀonse, koas ase tsî ǂkhaisib ase nî ībase, xawen ge ǃgâ ǂgao tama ge i.
ǂAuxûixapab
12 “ǁÎnats ge nēti nî mîba: ‘Nētib ge ǃKhūb, Israeli Eloba ra mî: “Mâ ǂauxûixapab hoab ge ǂauxûi-i ǀkha nî ǀoaǀoahe.” ’ On ge ǁîna ‘O da kha ǂan tama hâ, mâ ǂauxûixapab hoab nî ǂauxûib ǀkha ǀoaǀoahe ǃkhaisa?’ ti nî dî tsi. 13 O ǁîna mîba re tita ǃKhūta nē ǃhūb di ǁanǂgāsaben hoana ǂauxûib ǀkha nî ǀoaǀoa ǃkhaisa; gao-aogu, Davidi suriba xu hâgu, pristergu, kēbo-aogu tsî hoaraga ǁanǂgāsaben Jerusalems dina nî ǀhoro kaise. 14 Tsî ta ge tita ǁîna nî ǂnauǂkhūǂkhū, nē-e nau-i ǃoagu, ǁgûgu tsî ǀgôaga ǀguipa. Tita ge ǀkhom, sâu tamas ka io ǀkhomxa tide ǁîna hîkākāsa”
tib ge ǃKhūba ra mî.Jeremiab ge ǀgapiǂâixasib ǃoagu ra ǃkhâikhom
15 ǁNâu î ǂgaesa ǂō re; tā ǀgapiǂâixa
ǃKhūb go ǃhoa xuige.
16 ǃKhūb sadu Eloba ǃgôasiba mā re;
ǃkhaebab nî hā-ūs aiǃâ
tsî di ǂaidi âdo ǃhomgu ai nî ǃomsens aiǃâ,
tsî du ǃnâba ra ôa
hîab ge ǁîba ǃoab ǃnâ ra ǀkharaǀkhara
tsî kai ǃkhaenab ase ra dī.
17 Xawe du ga ǃgâ ǂgao tama i
os ge ti ǀomsa ǂganǃgâsib ǃnâ sadu ǀgapiǂâixasib xa nî ā,
ti mûra ge kaise tsûsase nî ā, tsî ti ǁgamrogu ge nî ǂnâ,
ǃKhūb di ǁaes ǃkhōsis ǃnâ ūhe hâ xui-ao.
18 Gao-aob tsî gao-aos hâra mîba re: “ǁGôaxa re saro tronde xu, saro di îxa kronra go danara xu ǁnā xuige. 19 Judab ǃnaka hâ ǃādi ge ǁgoeǂnamihe hâ; khoe-i xare-i ǁîdi tawa sī ǁoas kōse. Hoaraga khoen Judab din ge ǃkhōsis ǃnâ ge ūbēhe.
20 “Mû re Jerusalemse, sa khākhoen ge ǀapasǀkhāba xu ǃgoaxa. Sadon nî ǃûise mîmāhe hâna mâpan hâ, sadu khoen ǁîn ai du kaise ǂnīsana? 21 Mâtits nî mî ǁnān hîats sa ǀhōsan ti ǂâi hân ga satsa dan tsî sa ǂama a dana kaio? ǁOratsûb ǃnâ hâ tarekhoes khamits tsû tide? 22 Tsîts ga ǂgaob âts ǃnâ ‘Mâtin nē xūn hoana go hāǂam te?’ ti dîo, ǁnās ge kaisib sa ǃûǂamdi diba xū, saran âts ǀhuikhâihe hâ tsîts tsûtsûhe hâ amagasa. 23 Etiopiaǁî-e ǀûb ǁî-i khōb diba ǀkharaǀkhara ǁkhā-e tamas ka io ǀgaruba ǁîb ande? ǀGarub ǁÎn ga dī ǁkhā, ots sats hîa ǀnî xū-i ose ǂkhabab ǀguiba ra dīts tsîna ǁkhāǁkhāsen ǁkhā ǂhanuse dīsa. 24 Tita ge ǁîna ǀapon hîa ǃgaroǃhūb di ǂoab xa ra ǃgomǀgaruǀgaruhen khami nî ǀgaruǀgaru. 25 Nēs ge a sa mādawa-am, sa amǃnâs satsa ta ǀnōǂuiba hâsa, tita ǀuru tsîts ǂhumiba ge ǂgomǃgâ amaga”
tib ge ǃKhūba ra mî.26 Aitsama ta ge tita sa sarana nî ǀhuikhâi tsîb ge taosib âtsa nî mûhe. 27 Sa ǀaib tsî ǀgamaisib, ǂkhabasib ǀaikhoesis dib âts di ǁgaiǁgaisana ta ge ǃnâudi ai, ǃgarob ǃnâ ge mû. Tsūba si sas Jerusalemse! Mâtikōse i nî ǀhabe sas nî ǃanus aiǃâ?
© Khoekhoegowab Elobmîs © Bible Society in Namibia, 2020.
