1 Nēs ge ǂhaiǂhais Jesub Xristub ge Elob xa māhesa, taren ǃhae ǁaeb ǃnâ ī ǃkhaisab nî ǃgān âba ǂanǂanse. Xristub ge ǁîb di ǀhomǃgāba ǁîb di ǃgāb Johaneb ǁga ge sî, ǁîbab nî nēna ǂanǂanse. 2 Tsîb ge Johaneba hoaraga xūn hîab ge mûn xa ra ǃkhō-am, Elob di mîs tsî Jesub Xristub di ǃkhō-ams xa. 3 ǀKhaehe-i ge hâ ǁnā-i hîa nē kēbosi ǂhôasa ra khomai-i tsî ǁnān hîa nē mîsa ǁnâu tsî ra ǁnâuǀnamna, nē xūn nî ī ǁaeb a ǀgū xui-ao.
Hû kerkhegu ǃoa hâ tawedes
4 Tita, Johaneta xu, hû kerkhegu Asiab ǃnâ hâgu ǃoa:
ǀKhommi tsî ǂkhîba sadu ǃoa, ǁîb hâ ab, hâ ge ib tsî hā nîb tsî hû gagagu ǁîb trons aiǃâ hâgu tsî 5 Jesub Xristub, ǁnā ǂgomǂgomsa ǃkhō-amaob, ǂgurose ǁōba xu ûib ǃoa ge ūkhâiheb, ǁkhāti ǃhūbaib gao-aogu di danaǂgaeǂgui-aoba xu.
ǁÎb ge sada a ǀnam tsî sada ǁorena xu ǁîb ǀaob ǀkha ǃnoraǃnora 6 tsî gaosise tsî pristerse ge dī da, ǁîb di Elob tsî ǁGûba nî ǃoabase. ǂKhaisib tsî ǀgaib tsîkha ge a ǁîb di, ǀamosib hoab kōse. Amen!
7 Mû, ǁîb ge ǃâudi ai ǃgoaxa! Mâ khoe-i hoa-i ge ǁîba nî mû, ǁkhāti ǁnān, hîa ge ǁîba ǃkhāǃganun tsî hoaraga ǃhaodi ǃhūbaib ai hâdi ge ǁîb ǂama nî ā. Amen.*
8 “Tita ge Alfata tsî Omegata” tib ge ǃKhūb Elob, hâ ab, hâ ge ib tsî hā nîb, Hoaǀgaixaba ra mî.
Jesub ge Johaneba ai-i ǃnâ-u ra ǂhai
9 Tita ge Johaneta sadu di ǃgâsata. Sada hoada ge Xristub ǀkha Gaosib ǃaroma tsâb ǃnâ ǃnūǃnâxasib ǀkha mâǃkharus ǃnâ ra amǃnâxa. Tita ge Patmosǃnāǃnuis ǁga ge sîhe, Elob di mîsa aoǁnâ tsî ta ge Jesub di amab xa ǃkhō-am ǃkhais ǃaroma. 10 ǃKhūb di tsēs ai ta ge Gagab ǃnâ ge hâ i tsî ta ge ti ǃgâbǀkhāb ai ǃgari dom-i xâiǁnâǀōb khami ra ǀō-e ge ǁnâu, 11 mî ra-e: “Mûts rana ǂkhani-i ǃnâ xoamâi re, î Efeses, Smirnas, Pergamums, Tiatiras, Sardis, Filadelfias tsî Laodiseas tsîdi ǃnâ hâ hû kerkhegu ǃoa sî.”
12 Tsî nē dommi hîa ra ǃhoa-ū teba ta nî mûse ta ge ǂnan, o ta ge hû ǃhuniǀuri ǃamǀaekandelarga ge mû. 13 Nē ǃamǀaekandelargu ǁaegu ta ge ǀguib hîa Khoen Ôab khami īb, gaxu anaǂamsaraba ana hâb tsî ǁkhaib ai ǃhuniǀuri ǃgaesenna ǃgae hâba ge mû. 14 ǀÛn âb ge ǃuri gūǀûn xase tsî tsamaros khami ge ǃuri i tsî mûra âb ge ǀaeǁhabub khami ge ī i. 15 ǁÎb di ǂaira ge ǁganoms ǃnâs khami ǂkhaiǂkhaihe hâ brons-i khami ge ī i tsî ǁîb di dommi ge dâu ra ǁgammi khami gere ǀō. 16 ǁÎb ge hû ǀgamirode amǀkhāb ǃommi ǃnâ ge ūhâ i tsî-i ge hoaǀkhāǀā gôa-e ams âba xu gere ǂoaxa. Ais âb ge hoaraga ǀgaib ǀkha ra ǃnâ sores di ǂkhaiba ge ūhâ i. 17 Tsî ǁîba ta ge mû, o ta ge ǂaira âb tawa ǁō hâ-i khami ge ǁnāǁgoe; ob ge ǁîb di amǀkhāb ǃomma tita ai ǁgui tsî ge mî: “Tā ǃao, tita ge ǂgurota tsî ǀunita 18 tsî ûitsamata; ǁō ta ge hâ i, xawe mû, tita ge a ûitsama hoa ǀamosib kōse. Tsî ta ge tita ǁŌb tsî ǁŌhân Hâǃkhaib di ǁkhowa-amma ūhâ. 19 ǁNā-amaga mûts gona xoamâi re, hâ an tsî nēn khaoǃgâ nî īn tsîna. 20 ǂGanǃgâsib hû ǀgamirodi hîats go ti amǀkhāb ǃommi ǃnâ mûdi tsî hû ǃamǀaekandelargu dib ge: ǁNā hû ǀgamirodi ge ǀhomǃgāgu hû kerkhegu diga tsî hû ǃamǀaekandelargu hîats go mûgu ge hû kerkhega. ǁNā hû ǀgamirodi ge ǀhomǃgāgu hû kerkhegu diga…