Khākhoen ǃoagu hâ ǁgoaǂuis
1 Libanontse, ǁkhowa-am re ǂgâ-amdi âtsa,
îs ǀaesa sa sederhaide khauǃkhū!
2 Ā re sipreshaiso,
sederhais go ǁnā xuige;
ǂkhaisa haidi go hîkākāhe xuige!
ǃOa, î ā re Basanni aikehaiso
ǁau haiǀgoms go hîkākāhe xuige!
3 ǃÛi-aogu āb di ǀōb ge hâ;
ǂkhaisib âgu ge hîǀhuruhe hâ.
ǂKham xamn di ǃoros dommi ge hâ,
Jordanni di ǃgurib ge hîkākāhe hâ!
ǀGam ǃûi-aokha
4 Nētib ge ǃKhūb, ti Eloba ge mî: “ǃÛi-ao kaiba re ǂāgūna. 5 ǁÎna ra ǁaman ge ǁîna ǀhapitsâsen-i tsîn ose ra ǃgam tamas ka ion ge ǁîna ra ǁamaxūna ‘Kare re ǃKhūba, ǃkhū ta ge go!’ ti ra mî. ǁÎn di ǂhunuma ǃûi-aon tsîn ge ǁîna ǀkhom tama hâ.
6 “ǁKhawa ta ge ǃhūb di ǁanǂgāsabena ǀkhom tide” tib ge ǃKhūba ra mî. “Mû, tita ge mâ-i hoa-i ǁî-i ǀgūkhoe-i ǃomǁae nî ǁnā ǃkhaisa nî ǃaroma. Tsî ǁîb gao-aob ǃomǁaen ge ǃhūba nî ǂnauǂkhū tsî ta ge ǁîna ǁîgu ǃomǁaeba xu ore tide.”
7 Tita ge ǂāgūna gere ǃûi, ǀkhomǀkhomsan ge i amaga. Tsî ta ge ǃhôara ge ūbasen. ǀGuisa ta ge ǀKhom ti ge ǂgai tsî nausa ǃGaeǀhaos ti, tsî ta ge gūna ge ǃûi. 8 Tsî ta ge ǃnona ǃûi-aoga ǀgui ǁkhâb ǃnâ ge hîkākā. Ti ǀoms ge ǁîgu ǂama ǁaixa tsî ǁîgu ǀoms on ge tita ǂhara xui-ao. 9 O ta ge gūn ǃoa “Sado ta ge ǃûi tide. A-i ǁō ǂgao ka-e ǁō, ǁnān hîkākāhe nîna hîkākāhe, în ǁnān ûiǃgau kana ǁîǃnābe hapugu” ti ge mî. 10 Tsî ta ge ǀKhom ti ǀon hâ ǃûihaiba ū tsî ǁîba ge ǃgaoǃā, hoaraga khoen ǀkha ta ge dī ǃgaeǀhaosa nî khôase. 11 Tsîs ge ǃgaeǀhaosa ǁnā tsēs ai ge ǁauǁauhe, tsîn ge gūn di ǀkhomǀkhomsaben, tita ǃoa gere kōna ge mûǂan ǁnās a ǃKhūb di mî ǃkhaisa. 12 O ta ge ǁîga ge mîba: “Sago mûǁae i ga ǃgâi io matare te re, tsî ǁnāti tamas ka io tā dī.” O gu ge ǃnonadisi ǀhaiǀurimaride ge ǃgôaǂuiba te ti matares ase.
13 Ob ge ǃKhūba ge mî: “Sūǂnubi-aoba aoba! ǁNāb ge ǁkhāsib tita ǁîn ǃoagu anu hâba.” O ta ge ǁnā ǃnonadisi ǀhaiǀurimaride sūǂnubi-aob ǃaroma ū tsî ǃKhūb di Tempeli ǃnâ ge aoǂgā. 14 ǁNās khaoǃgâ ta ge ǀgamǁî ǃûihaib, ǃGaeǀhaos ti ǀon hâba ge khôa, Judab tsî Israeli di khoeǃgâgusisa nî khôase.
15 Ob ge ǃKhūba “ǁKhawa ǃûi-aosis ǁâtanin, gâre ǃûi-aob dina ūbasen re” ti ge mî. 16 Mû tita ge ǃhūb ǃnâ ǃûi-aoba nî ūkhâi, ǁnā-i kā ra-i ǀkha dīxū-e ūhâ tamab, ǀgaruǀgaruhe hâ-e ǀhaoǀhao tamab, khôa hâ-e ǂgauǂgau tamab, tsî ǂuruse mâ-e ǃkhōǂhomi tamab, xawe kausa gū-i di ǁgan-e ǂû tsîb ge ǁkhoradi â-e nî tsuruǁnâba. 17 Tsūba ǁnā tsū ǃûi-aob gūna ra ǁnāxūba. Gôaba ab ǁîb ǁôab ai hâ tsî amǀkhāb di mûs âb ai. Ab ǁôab âba hoaragase ǂnâ tsî amǀkhāb mûs âba hoaragase ǂgī.
© Khoekhoegowab Elobmîs © Bible Society in Namibia, 2020.
