1 Bileammi ge Balaki ǃoa ge mî: “Hû altarde nēpa kuruba te, î hû ǁgōgu tsî hû baigu tsîna hā-ūba te.”
2 Balaki ge mîbaheb ge khami ge dī; ǁîb tsî Bileammi tsîkha ge mâ altars hoas ai ǁgōb tsî baib tsîkha ge ǁguiba. 3 ǁNās khaoǃgâb ge Bileamma Balaki ǃoa ge mî: “Aibe nēpa sa ǁguibas tawa mâǀgara, î ta tita ǃgû tsî kō iseb ǃKhūba nî ǂhai te ǃkhaisa. ǁÎb ga mîba te xū-i hoa-e ta ge hā nî mîba tsi.” ǁNātib ge ǁîba ǀguri ǃhommi di ǂaob ai ge ǂoa. 4 Elob ge Bileamma ge ǂhai tsîb ge Bileamma ǁîb ǃoa ge mî: “Hû altarde ta ge kuru tsî mâs hoas ai ǁgōb tsî baib tsîkha nî ǁguiba.”
5 ǃKhūb ge Bileamma tare-eb nî mîsa mîba tsî Balaki ǁga ǁîba ge sî-oa, ǃKhūb di ǂhôasa sī nî mîbase. 6 Bileammi ge oa tsî Balaka noxopab ǁîb di ǁguibas tawa, Moab di ǂgaeǂgui-aogu hoagu ǀkha mâse sī ge hō.
7 Tsîb ge Bileamma sao ra kēbosa ge gowaǂui:
“Moab di gao-aob Balaki ge go hā-ū te;
Siriaba xu, aiǂoas ǃhomga xu.
‘Hā, î ǃhoaba te’ tib ge go mî.
‘Israelǁîna ǀâxareba te.’
8 Mâti ta kha Elob ǀâxare tama khoena nî ǀâxare,
tamas ka io ǁîn di hîkākāhesa nî gowaǂui, ǃKhūb ǁîsa dī tama hîa?
9 ǀGapi ǀuiga xu ta ge ǁîna mû ǁkhā;
ǃNâuga xu ta ge ǁîna a ǃkhē ǁkhā.
ǁNās ge ǁaes ǀguri a ûi ǁkhāsa;
ǁÎn ge nau ǁaedi ǃgâ-ain ǃnāsase ǀkhaesa ǃkhaisa a ǂan.
10 Jakob surib ge tsarab khami ī,
kaisen ge ǁîna ǃgôas ǃaroma a ǂgui.
A ta ti tsēde Israelǁîn di ǀgui-i ase ǀamǀam;
a ta ǂkhîb ǃnâ ǂhanu-ai-i khami ǁō.”
11 Ob ge Balaka Bileammi ǃoa ge mî: “Tare-ets go dī? Tita ge nēpa ti khākhoenats nî ǀâxarese go hā-ū tsi, xawets ge ǁnās ǃās ǃnâ ǁîna go ǀkhae.”
12 Ob ge Bileamma ge mî: “Tita ge ǃKhūb ra mîba te xūn ǀguina ra mî.”
Bileammi ǀgamǁî kēbos
13 ǁNās khaoǃgâb ge Balaka Bileammi ǃoa ge mî: “ǀNî ǃkhais Israelǁîn di ǀgui ǃâb ǀguibats nî mûs ǁga tita sao, îts ǁîna ǀâxareba te.” 14 Balaki ge ǁîba Sofimǃgaroǃhūb ǁga ǃgû-ū tsî Pisgaǃhommi ǂaob ai ge ūǃapa. ǁNāpas tsînab ge hû altarde kuru tsî mâs hoas ai ǁgōb tsî baib tsîkha ge ǁguiba.
15 Ob ge Bileamma Balaki ǃoa ge mî: “Nēpa sa ǁguibas tawa mâǀgara, î ta Eloba naupa sī ǀhao-ū.”
16 ǃKhūb ge Bileamma ǂhai tsî tare-eb nî mîsa mîba tsî Balaki ǁga ge sî-oa, ǃKhūb di ǂhôasa ǁîba sī nî mîbase. 17 Bileammi ge oa tsî Balaka noxopab ǁîb khauǁguibas tawa, Moab di ǂgaeǂgui-aogu hoagu ǀkha mâse sī ge hō. Balaki ge ǁîba tare-eb ge ǃKhūba mî ǃkhaisa ge dî. 18 Ob ge Bileamma sao ra kēbosa ge gowaǂui:
“Sipori ôa, Balaktse hā re,
î tare-e ta ra mîsa ǃgâ.
19 Elob ge khoe tama, ǂhumib nîse;
ǁîb ge khoe tama, ǁîb ǂâisab nî dawase.
ǁÎb ga xū-e mîmâi, ob ge ǁnāsa hoaǁae ra dīǀoaǀoa;
ǁîb ga ǃhoa, o ra dīhe.
20 Tita ge ǀkhaeba ta nî gowaǂuise ge ǁgui-aihe,
tsî Elob ga ǀkhae, o ta ge tita ǁnāsa a ǂgae-oa ǁoa.
21 Tita ge Israelǁîn di ǃgoaxaǁaeb
ǁîna tsūǃō-i tamas ka io tsūǃgâ-e ǃkhōǂgāba hâsa mû tama hâ.
ǁÎn di ǃKhūb tsî Elob ge ǁîn ǀkha hâ;
ǁîn ge ǁîb a ǁîn di gao-ao ǃkhaisa ra ǃkhō-am.
22 Elob ge ǁîna Egipteba xu ge ǂgaeǂguiǂui;
ǁîb ge ǁîna ǃgarogomab khami gere ǃkhamba.
23 ǀHôagao ǂhumi-i tamas ka io ǃgaidī-i xare-i ǀkhai,
ǁnās ge Israelǁîn ǃoagu a sîsenūhe ǁkhā.
Khoen ge nēsi Israelǁîn xa,
‘Kō tare-eb go Eloba dīsa!’ ti nî mî.
24 Israelǁaes ge ǀgaisa xammi khami ī:
ǁÎb ge ǀkhauǃā tsîb hapu tamas kōse sâ tama hâ;
ǃgamhe go xū-i di ǀaobab ā tamas kōseb ge sâ tama hâ.”
25 Ob ge Balaka Bileammi ǃoa ge mî: “Sats ge Israelǁîna ǀâxare ǂgao tama hâ, xawe tā ǁnâi ǁîna ǀkhae re!”
26 Ob ge Bileamma ge ǃeream: “ǀNai ta kha mîba tsî tama hâ ǃKhūb ra mîba te xū-i ǀgui-e ta nî dī ǃkhaisa?”
Bileammi ǃnonaǁî kēbos
27 Balaki ge ge mî: “Tita sao, î ta ǀnî ǃkhai-i ǁga ī-ū tsi. ǀNîsib khom Eloba ǁnāpa xu sats nî ǁîna ǀâxare ǃkhaisa nî mā-am tsio.” 28 ǁNā-amagab ge Bileamma ū tsî Peorǃhommi ǃgaroǃhūb ǂamai ra ǃkhāǂuisenni ǂaob ai ge ūǃapa. 29 Bileammi ge ǁîb ǃoa ge mî: “Hû altarde nēpa kuruba te, î hû ǁgōgu tsî baigu tsîga hā-ūba te.” 30 Balaki ge mîbaheb ge khami dī tsî mâ altars hoas ai ǁgōb tsî baib tsîkha ge ǁguiba.
© Khoekhoegowab Elobmîs © Bible Society in Namibia, 2020.
