Elob ǃnâ ǂgomǃgâsa ūhâs di ǀgores
ǁNaeǃnans ǂgaeǂgui-aob ǃoa Jonat Elem Rexokims ǃoa
Davidi ǀgaipetsanas
Filisteǁîn ge Gats tawa ǃkhō bi ǁaeb ǃnâ
1 ǀKhomxa te re Elotse,
khoen ra dāǂkhū te xuige;
hoaraga tsēsan ge ǁnān ǃkhamū te rana ra ǁgâiǀā te.
2 Ti khākhoen ge hoa tsēsa go dāǂkhū te
ǂguin ra ǀgapiǂâixasib ân ǃnâ tita ǃoagu ǃkham xui-ao.
3 ǃAo ta ka tsēs ai ta ge sats ai nî ǂgomaiǂnûi.
4 Elob, ǁîb mîsa ta ra koab,
ǁnā Eloba ta ge ra ǂgomǃgâ.
Khoe-e tare-e nî dī te?
5 Hoa tsēsan ge ti mîde ra daba
tsî di ge ǁîn di ǂkhaba ǀapede ti ǃoagu hâ.
6 ǁÎn ge ǀhûpe gauǁgoe tsî tita ra ǃkhē.
Tsîn ti ǃnôara ra ǃûi,
ti ûiban ǃâu hâs ao.
7 ǂKhabasib ǃnâ ǁîna māǁnâ,
î ǁaib ǃnâ ǁîna ǂnauǁgui re Elotse.
8 Sats ge aitsama ti ǃgaesende ge ǃgôakhâi;
tsîts ge ti ǁgamrona khōxapas ǃnâ ge ǂgā.
On kha sa ǂkhanis ǃnâ xoamâisa tama hâ?
9 On ge ti khākhoena ǁnā tsēs ai ta ga ǂgaiǂui, o tita xu nî ū-oasen.
Nēs, Elob a tisa ta a ǂan xui-ao.
10 Elob di mîsa ta ge nî koa;
ǃKhūbdi mîsa ta ge nî koa.
11 Eloba ta ge ra ǂgomǃgâ.
Tare xū-e i khoe-e tita nî dī?
12 Satsa ta ge dība mîmâide ta ge surude tsi hâ Elotse;
tsî ta ge ganganǁguibadi ǀkha nî matare tsi.
13 Satsa ti ûiba ǁōba xu ǃnoraǃnora tama hâ
tsî ti ǂaira ǃnôa ra nîsa xu?
Elob aiǃâ
tsî ûib di ǃnâb ǃnâ ta nî ǃgûse.
© Khoekhoegowab Elobmîs © Bible Society in Namibia, 2020.
