Josua 12 - Khoekhoegowab New Translation 2020 (KKG20)

Moseb xa ge danhe gao-aokha

1 Moseb ǂgaeǂguis ǃnakan ge Israelǁîna ǀnai ǀgam gao-aokha Jordanni aiǂoas ǃnâ dan tsî ǁîkha ǀkhariba ge ū. Nē gao-aokha di ǀkharib ge Arnonǃgoaǃnāba xu Jordanǃāb nauǃanib ai Hermonǃhommi ǀapas ǃnâ ǁgoeb kōse gere sī. 2 ǁÎkha di ǀguib ge Amorǁîn di gao-aob Sihonni Hesbons ǃnâ gere ǂgaeǂguiba. ǁÎb di gaosis ge ǃkhare ǃâb Gileadi dib, Aroers Arnonǃgoaǃnāb amǃgâ ǁgoeb tsî ǁnā ǃgoaǃnāb ǃnâ ǂnôa ǃās tsî Jabokǃāb Amonni ǃhūǀgorase īb tsîna ge ǃkhōǂgā hâ i. 3 ǁKhātib ge Galileahurirob Jordanǃgoaǃnāb ǃkhawagas ǃnâ ǁgoeba xu Bet-Jesimots Galileahurirob di aiǂoas ǃnâ ǁgoes tsî Pisgaǃhommi amǃgâb kōse gere sī.

4 ǁÎn ge ǁkhāti Basanni di gao-aob Ogi, Refaimǁîn di ǀunigagu di ǀgui ge ib ona ge dan; ǁîb ge Astarots tsî Edreis tsîra ǃnâ gere ǂgaeǂgui. 5 ǁÎb di gaosis ge Hermonǃhommi, Salekas tsî hoaraga Basanna, Gesurs tsî Maakas tsîra ǃhūǀgoras kōse tsî ǃkhare ǃâb Gileadi dib tsîna, Hesbons gao-aob Sihonni di ǀkharib kōse ge ǃkhōǂgā hâ i.

6 ǁNā ǀgam gao-aokha ge Moseb tsî Israelǁîn tsîn xa ge danhe. ǃKhūb di ǃgāb Moseb ge ǁîkha di ǃhūba Rubenni, Gadi tsî Manaseb di ǃkhare ǃhaos tsîde ǁîdi dib nîse ge mā.

Josuab xa ge danhe gao-aogu

7 Josuab tsî Israelǁîn tsîn ge Jordanni huriǂoas ǃnâ ge hâ i gao-aogu hoaga ge dan, Balgads Libanonǃgoaǃnāb ǃnâ ǂnôasa xu Halakǃhommi ǃkhawagas ǃnâ, Edommi ǀgūse ǁgoeb kōse. Josuab ge ǁnā ǃhūba ǃhaodi ǃnâ ǀgora tsî ǁîde ǀamose di nî ūhâse ge mā. 8 Nē ǃâb ge ǃnâuxa ǃhūb tsî huriǂoas di ǂamse ǁgoe ǀkharib, Jordanǃgoaǃnāb tsî ǁîb di ǂamse ǁgoe ǀkharib, aiǂoas ǀkharigu tsî ǃkhawagas di ǂnâsa ǃhūb tsîna ge ǃkhōǂgā hâ i. Nēb ge Hetǁîn, Amorǁîn, Kanaanǁîn, Perisǁîn, Hivǁîn tsî Jebusǁîn tsîn ge ǁanǃnâ hâ i ǃhūba. 9 Israelǁîn ge sao ra ǃādi di gao-aoga ge dan: Jerixos, Ais, Betels ǀgūse ǁgoes 10 Jerusalems, Hebrons, 11 Jarmuts, Lakis, 12 Eglons, Gesers, 13 Debirs, Geders, 14 Hormas, Arads, 15 Libnas, Adulams, 16 Makedas, Betels, 17 Tapuas, Hefers, 18 Afeks, Sarons, 19 Madons, Hasors, 20 Simron-Merons, Aksafs 21 Tanaks, Megidos, 22 Kedes, Jokneams, Karmels ǃnâ ǂnôas, 23 Dors, hurib amǃgâ ǂnôas, Goims, Galileab ǃnâ ǂnôas, 24 tsî Tirsas tsîde. Nē gao-aogu ge ǀhaob ai ge ǃnonadisiǀguiǀa i.