Jeremiab tsî kēbo-aob Hananjab
1 ǁKhā kurib ǃnâ, koroǁî ǁkhâb, hakaǁî kurib dib ǃnâ, Sedekiab Judab gao-aob di gaosis tsoatsoas ǃnâ, hakaǁî kurib di koroǁî ǁkhâb ǃnâs ge Asuri ôab Gibeons di kēbo-ao ge ib, Hananjab ge tita ǀkha Tempeli ǃnâ ǃhoasa. ǁÎb ge kēbo-aogu tsî hoaraga ǁaes aiǃâ ge mîba te: 2 Nētib ge ǃKhūb Hoaǀgaixab, Israeli Eloba ra mî: “Tita ge Babilons gao-aob di ǀgaiba ge khôa. 3 ǀGam kurikha ǃnâ ta ge hoaraga xapan ǃKhūb ommi din, Babilons gao-aob Nebukadnesari ge nēpa xu ūbēna nē ǃās ǃoa ǁkhawa nî oahā-ū. 4 ǁKhāti ta ge Jexonjab, Jojakimmi ôab, Judab gao-aob, tsî ǁnān ǃkhōsabese Judaba xu ge ǂgaeǂguibēhen, Babilons tawa ge sīn hoana nē ǃās ǃoa ǁkhawa nî ūhā, Babilons gao-aob di ǃnaoba ta nî khôaǂkhū xui-ao”
tib ge ǃKhūba ra mî.5 Tsîb ge kēbo-aob Jeremiaba kēbo-aob Hananjab ǃoa, hoaraga kēbo-aogu tsî Tempeli ǃnâ ge mâ i ǁaes aiǃâ ge ǃhoa 6 tsîb ge kēbo-aob Jeremiaba ge mî: “Amen! Ab ǃKhūba ǁnāti dī; ab ǃKhūba ǁnā mîdi ǁîdets go kēbode ǁapoǁapo tsî xapan Tempeli din tsî hoaraga khoen hîa ge ǃkhōsabese nēpa xu ǃgû-ūhena Babilonsa xu oahā-ū. 7 Xawe nēsi ǁnâu nē mîs, sa ǂgaera ǃnâ tsî ǁaes hoas ǂgaedi ǃnâ ta ra ǃhoasa. 8 Kēbo-aogu, sats tsî tita tsîkhom aiǃâ ge hâ i gu ge torob, ǃâtsūǀkhāb tsî ǂhīǁōba ǂgui ǃhūgu tsî gaosigu ǃoagu ge kēbo. 9 Xawe ǁnā kēbo-aob ǂkhîb xa ga kēbob, tsîs ga mîs âba ama kaib, ge amase ǃKhūb xa sîhe hâ kēbo-aob ase nî ǂansa.”
10 Ob ge kēbo-aob Hananjaba, kēbo-aob Jeremiab ǃaosa xu ǃnaoba ūǁnâ tsî ge khôaǂkhū. 11 Tsîb ge Hananjaba hoaraga ǁaes ǃoa ge mî: “Nētib ge ǃKhūba ra mî: Nēti ta ge tita ǃnaob Nebukadnesari, Babilons gao-aob diba, hoaraga ǁaedi ǃaoba xu, ǀgam kurikha ǁaeb ǃnâ nî khôaǂkhū.” Xaweb ge kēbo-aob Jeremiaba ǁîb daoba ge ǃgû.
12 ǃKhūb di mîs ge Jeremiaba ge hāba, kēbo-aob Hananjab ge ǃnaoba kēbo-aob di ǃaoba xu khôaǂkhūs khaoǃgâ: 13 “ǃGû, îts Hananjaba sī mîba: Nētib ge ǃKhūba ra mî: ‘Haiǃnaogats ge satsa go khôaǂkhū, xawe ta ge tita nēsi ǁîgu amǃnâs ai ǂnūǀuriǃnaoga nî dī.’ 14 Nētib ra ǃKhūb Hoaǀgaixab, Israeli Eloba mî xui-ao: Tita ge ǂnūǀuriǃnaoba nē ǁaedi hoadi di ǃaob ai ge ǁgui, Nebukadnesari, Babilons gao-aoban nî ǃoabase, tsîn ge ǁîba nî ǃoaba. ǀGurun ǃaub din tsîna ta ge tita ǁîba ge mā.”
15 Ob ge kēbo-aob Jeremiaba kēbo-aob Hananjab ǃoa ge mî: “ǃGâ re Hananjatse, ǃKhūb ge satsa sî tama hâ, tsîts ge nē ǁaesa ǂhumigu ai ge ǂgomaiǂnûi kai. 16 ǁNā-amaga, nētib ge ǃKhūba ra mî: ‘Mû, tita ge satsa ǃhūbaiba xu nî ūbē. Nē kurib ǂûb ǃnâts ge satsa nî ǁō, ǃKhūb ǃoagus nî ǁaesa khâikhâisen ǃkhaisats go gowa amaga.’ ”
17 Kēbo-aob Hananjab ge ǁkhā kurib di hûǁî ǁkhâb ǃnâ ge ǁō.
© Khoekhoegowab Elobmîs © Bible Society in Namibia, 2020.
