Ûib ge a harebeoǃnâ
1 Nēdi ge Aoǁnâ-aob, Davidi ôab, Jerusalems ǃnâ ge gao-ao ib di mîde:
2 Harebeoǃnâ i ge a,
harebeoǃnâ a tib ge Aoǁnâ-aoba ra mî,
hoa xūn ge a harebeoǃnâ.
3 Tarebe harebesa i khoe-e ūba hâ
ǁî-i di ǀhupuǀhupusens ǃnâ,
ǃhūbaib ai?
4 ǁAeǃgâdi ge hā tsî ra ǃkharu,
xaweb ge ǃhūbaiba ǀamos kōse ra hâhâ.
5 Sores ge ǁhai tsî ra ǂgâ.
Tsîs ge ǁhais go hâ i ǃkhaibǀî ra oa,
ǁkhawa nî sī ǁhaise.
6 ǂOab ge ǃkhawagasǀî
tsî ǀapasǀî ǃgom
tsî ǁkhawa ra oa.
7 Hoaraga ǃāgu ge huribǀî ra dâu,
xaweb ge huriba ǀoa tama hâ.
Tsî gu ge ǃāga hāxu gu go ǃkhaiguǀî ra oa.
8 Hoaraga xūn ge a ǀhupu,
khoe-i xare-i a ǃhoaǂui ǁoas kōse.
Mûdi âda ge mûǂâu tide
tsî ǂgaedi âda ǁnâuǂâu tide.
9 ǀNai ge ī hâ i xūn ge ǁkhawa nî ī.
ǁKhātin ge ǀnai ge dīhe hâ ina
ǁkhawa nîra dīhe;
ǀgui xū-i tsîn ge ǃhūbaib ai ǀasa tama hâ.
10 Xū-e xare hâ i a ǁî-i xats “Mû, nē-i ge ǀasa xū-e” ti mî ǁkhā-e?
Tātsē, ǀnai ge sada ǁaeǃgâs aiǃâ hâ i.
11 ǀNai ge hâ i xūn di ǂâiǂâisen-i ge a ǀkhai,
ǁkhāti ǁnān ǃgoaxaǁaeb din
tsî ǁîna nî saon di-i on ge a ǀkhai.
Aoǁnâ-aob di hōǃâs
12 Tita, Aoǁnâ-aota ge Israelǁaes ǂama Jerusalems ǃnâ ge gao-ao i. 13 Tita ge hoaraga xūn ǃhūbaib ai ra īna ta nî ôaǃnâ tsî ǂan ǃkhaisa ge mîǀgui.
Elob ge kaise ǀgaisa ǃgomma khoesib ai ge ǁgui. 14 Hoaraga sîsengu ǁîn ge ǃhūbaib ai dīga ta ge ge mû; ǁîn ge harebeoǃnâ tsî ǂoaba saurus khami ī. 15 Gama xū-ets ge a ǂhanuǂhanu ǁoa tsîts ge ǁkhāti ǀkhai a xū-e a ǃgôa ǁoa.
16 Tita ge aitsama gere mîbasen kaisis tsî gā-aisis ǃnâ ta Jerusalems ǂama ge tita aiǃâ gao hâ in hoan ǂamai nî ǀarosen ǃkhaisa. Tita ge gā-aisib tsî ǂans tsîn amab ǃnâ tare-e ra ǂâibasen ǃkhaisa ge hōǃâ. 17 Tita ge ge mîǀgui gā-aisib, ǃkhausib tsî gâsiba ta nî ǂansa, xawe ta ge ge ǂan ǁîs ǂoaba saurus khami īsa. 18 ǃNāsa gā-aisibats ra ūhâ khamib ge ǃnāsa ǃoaba ra hâ; tsî ǂans ra ǀarosens kōseb ge tsûb ona ra ǀarosen.
© Khoekhoegowab Elobmîs © Bible Society in Namibia, 2020.
