1 ǁNā-amaga, Xristub* ǀkha du ǂkhaiǂkhaihe hâ xui-ao, ǀgapiseb di xūna ôa re, Xristub Elob di amǀkhāb ai ǂnôapa. 2 Sadu di ǂâide ǀgapise hâ xūn ai ǂnûi re, ǃhūbaib ai hân ais ose. 3 ǁŌ du ge tsîb sadu di ûiba Xristub ǀkha Elob ǃnâ sâusase hâ xui-ao. 4 Xristub ga ǂhaiǂhaihe, ob ge sadu di ûib tsîna ǂkhaisib ǃnâ ǁîb ǀkha nî ǂhaiǂhaihe.
ǀOro ûib tsî ǀasa ûib
5 ǁNā-amaga ǃhūbaib din sadu ǃnâ hâna ǃgam re: ǀAib, ǃanuoǃnâsib, turab, ǂkhaba turagu, xūǃgunuxasib hîa ǁgôa-eloǃoabas ase īb tsîna. 6 ǁNān ǃaromab ge Elob di ǁaiba ra hā. 7 Sadu tsîn ge nēn ǃnâ gere ǃgû, ǁîn ǃnâ du ge ûi hâ io.
8 Xawe nēsi ǁaixasib, ǁaib, ǂkhabab, ǃkhāǃkhās tsî tsū gowan sadu di amde xu ra ǂoaxan hoana ǀgoraxū re. 9 Tā ǁîǃnābe ǂhumibagu, ǀoro khoesiba du go ǁîb di ǁnaetigu ǀkha a ǁguiǁnâ, 10 tsî du go ǀasa khoesib, ǂans ǃnâ ǁîb Kuru-aob di īb ǃoa ǀasaǀasahe hâba hō amaga. 11 Nēs xa ǃaromahe hâse i ge ǃaruǀî ǃkharagagusi-e Grikeǁî-i tsî Jodeǁî-i, ǃgaohe* hâ-i tsî ǃgaohe tama-i, ǂūǁoa-i, Skitǁî-i, khobo-i tsî ǃnorasa-i tsîn ǁaegu a ǀkhai, xaweb ge Xristuba a hoa tsî hoa khoen ǃnâ hâ.
12 ǁNā-amaga, Elob di ǃkhōǂuisabedu, ǃanu tsî kaise ǀnamhe hâdu ase ǀkhomxaǂgaosib, ǃgâisib, ǃgamǃgamsens, tsamtsiǃnâsib tsî taniǀnamxasib di ǂgaob ǀkha ǂgaeǂgāsen re, 13 a i nē-e nau-e taniǀnam tsî ǁîǃnābese du ga ǀauxūna ūhâbaguo, ǀûbagu. ǃKhūb ge ǁkhāti sado ǀûbas ǁkhās khami du ge sadu tsîna nî ǀûba. 14 Tsî nē xūn hoan tawa ǀnamma ǀaro re, ǁîb hîa hoaraga xūna dīǀoaǀoasa ǀguiǃnâxasib ǃnâ ra ǃgaeǀhaoba. 15 Ab Xristub di ǂkhîb, ǁîb ǃoab sado ǀgui khoedu ase ǂgai hâba sadu ǂgaogu ǃnâ gaosîsen, î du ganganxa re. 16 As Xristub di mîsa ǃkhū hâse sadu ǃnâ hâ, sadu ra hoa gā-aisib ǀkha ǁîǃnābe ǁkhāǁkhāgu tsî ǁnamagu tsî du ra psalmdi, koatsanadi tsî gagasi tsanade ganganxa ǂgaogu ǀkha Elob ǃoa ǁnae hîa. 17 Tsî tare-i ǀgui-e du ga dī xawe, mîs tsî dīb ǀkhas kas hoasa, ǃKhūb Jesub di ǀons ǃnâ hoana dī re Elob, ǁGûba ra ǁîb ǃnâ-u ganganse.
Xristesi omaris di ǁgaragu
18 Taraso, saso di aoga ǃnaka hâba, ǃKhūb ǃnâ i a ǂhanu khami.
19 Aogo, sago tarade ǀnam, î tā ǁîdi ǀkha ǁkhōse ûi.
20 ǀGôado, sadu îna hoa xūn ǃnâ ǁnâuǀnam re, nēs a ǃKhūba ǃgâiba xuige.
21 ǁGûdo, tā ǀgôan âdo ǀaraǀara, în tā ǂkhabuǂâi.
22 ǃGādo, sadu di ǀhonkhoena ǃnaka hâba, ǁîn ra mû hîa ǀgui tsî khoena nî ǃgâiǃgâiǂgaoses ose, xawe ǀguiǃnâxasib ǂgaob dib ǃnâ tsî ǃKhūba ra ǃaoǃgâse.
23 Tare-i ǀgui-e du ga dī xawe ǀgaisase, khoe-i ǃaromas ose xawe ǃKhūba ra sîsenba khami sîsen re. 24 ǂÂis ǃnâ ūhâ re, ǃKhūba xu du ǀumisa mādawa-ams ase nî ǃkhōǃoa ǃkhaisa. ǃKhūb Xristub ge a ǁnā, ǁîba du ra ǃoababa. 25 ǁNā-i hîa ra tsūdī-i nî ǁî-i di tsūdīn ai mādawa-amhe tsî-i nēs ǃnâ ǀgora-e a ǀkhai xui-ao.
© Khoekhoegowab Elobmîs © Bible Society in Namibia, 2020.
