1 Tobiab ge oab geo, kaise gere ǃgâiaǂgao. ǁÎb ge ǀhommi tsî ǃhūbaib tsîkha di ǃKhūb, hoaraga ǃhūbaib di Gao-aoba, ǃgûs âb ge ǃgâiǃgâxa i xui-ao ge koa. Tsîb ge Ragueli tsî ǁîb taras Ednas tsîra, ûi ra hâs kōseb ǁîra ǃgôasiba nî mā ǃkhaisa ge mîmâiba.
Oms tawa oahās
ǃĀs Kaserins, Nineves ǃauga ǁgoesa ra ge ǀgū, 2 ob ge Rafaela ge mî: “Tobiatse, mâ mâsib ǃnâ khom ge sa îba nēpa xu khom ge ǃgûo ǁnāxū ǃkhaisats ge a ǂan. 3 A khom sa taras aiǃâ ǃgû tsî hoaraga khoen nî sīs aiǃâ omsa sī ǂhomi. 4 ǁAub di tsababa ūsaosa tā ǀuru.” ǁÎkha ge aiǃâ ge ǃgû tsîb ge Tobiab di arib tsîna ǁîkha ge ǃkhoesao.
5 Annas ge ǁîs ôabas ǃâu hâ xui-ao daoba ǂōrisase ǂnôa gere kō. 6 ǁÎbas ge arib, ǁîb aiǃâ ǃkhoeǃgoaxase mû, os ge Tobiti ǃoa ge ǃhao: “Kō re, sam ôab ge ǃgoaxa tsî ǁîb ǃgûǁnū-aob ge ǁîb ǀkha hâ!”
7 Tobiti tawa kha nî hās aiǃâb ge Rafaela, Tobiab ǃoa ge mî: “Sa îb ge ǁkhawa a mû ǁkhā. 8 ǁAub di tsababa ǁîb mûra ai ǂkhau. Nē sōǀôa-i ge mûra ai ǁgoe ǃuruga nî ǂnâ kai tsîts ge ǁîga supuse nî ǂgaeǁnâ tsîb ge sa îba ǁkhawa nî mû ǁkhā.” 9 Annas ge ôasaba ǃkhoeǃoa, ǁîba ǁnam tsî ge ǂgaiǂui: “Ti ôatse, ûitsamase ta go mû tsi, o ta ge nēsi ǂkhîb ǃnâ ǁō ǁkhā!” Tsîs ge ǃgâiaǂgaob xa ge ā.
Tobiti di ǂgauǂgauhes
10 Tobiti ge khâi tsî dāsā ra garuse, omǂnamib di dao-ams ǃnâ-ū ge ǂoa. 11 Tobiab ge tsababa ǃommi ǃnâ ūhâse ǁîb ǃoa ge hā. Tsîb ge ǁgûba ǃkhō, ǁîb di mûra ai ǃgom tsî ge mî: “Ti îtse, tā ǂâiǂhansen re.” 12-13 ǁNās khaoǃgâb ge sōǀôa-e Tobiti mûra ai ǃamkuse ǂkhau tsî sao rase mûra ai ge hâ i ǃuruga ge ǂgaeǁnâ. 14 Tobiti ge Tobiaba ǁnam tsî ǃgâiaǂgaob xa ā tsî ge mî: “Mû tsi ta ge ra ti ôatse, ti mûra di ǃnâtse!
“Koa re Eloba. ǁÎb ǀonsa ǀamose koa re.
ǁÎb di ǃanu ǀhomǃgāgu hoaga koa re.
Ab hugaǀgui sada ǀkhae re.
ǁÎb ǀhomǃgāgu hoaga ǀamose koa re.
15 ǁÎb ge nē ǀaeba ti ai ge hā-ū,
xawe ta ge nēsi, ti ôab Tobiaba mû ǁkhā!”
ǁNās khaoǃgâb ge Tobiaba ǃgâiaǂgao tsî ǃgari dommi ǀkha Eloba ra koase oms ǃnâ ge ǂgâ. ǁÎb ge mâtib ge ǃgâiǃgâ i tsîb mari-i ǀgui-e oahā-ū tama, xaweb ge Ragueli ôas Saras, daob ai noxopa ǃgoaxas tsîn ǀkha ǃgame ǃkhaisa ǁgûba ge mîba.
Saras di hās
16 Tobiti ge dâ tsî Eloba ra koase, ǁîb ôab di tarasab nî ǃkhōǃoase ǃās omǂnamib ǂgâdaos tawa ge ǂoaxa. Nineves khoen ge ǁîban ge mûo ge burugâ, ǁîb ge aitsama, khoe-i xa ǃkhōǁôahe tsî ǂgaeǂguihe tamase garu i xui-ao. 17 Tobiti ge Eloba koa tsî mâ khoe-i hoa-e, mâtib ge Eloba ǁîb ǀkhomma xu mû ǁkhāb nîsa ī kai ǃkhaisa gere mîba.
Tobiti ge ǁîb ǀuiǀgôas, Saras ǀkhab ge ǀhao, o ǁîsa tawede tsî ge mî: “ǁKhoreǁharehe hâse tsâsen re, ti ôase! Sasab go sida ǁga hā-ū ǃkhais ǃaroma Eloba koa re. Ab Eloba sa îra, sas tsî ti ôab, Tobiab tsîdo ǀkhae re. Sa ǀasa oms tawa ǁkhoreǁharehe hâse tsâsen. As ǃgâi ǂurusib tsî ǃgâiaǂgaob ǀkha hoaǁae ǀkhaehe re. ǂGâxa re, ti ôase!”
Kai ǃgâiaǂgaob di tsē ge is ge ǁnāsa, hoaraga Jodeǁîn Nineves din ǃaroma. 18 Tobiti ǀaokhoekha Ahikari tsî Nadab tsîkha tsîn ge Tobiti di ǃgâiaǂgaob ǃnâ ǁîb ǀkha nî ǁhaose ge hā. 19 Tobiab di ǃgameb ge hû tsēde ge ǁâudīhe.
© Khoekhoegowab Elobmîs © Bible Society in Namibia, 2020.
