Israels di ǃûi-aogu
1 ǃKhūb di mîs ge tita ǃoa ge hā: 2 “Khoenôa ǀgôatse, Israels kēbo-aogu ǃoagu kēbo î ǁîga mîba, nētib ge ǃKhūb Eloba ra mî: Tsūba ǁnā ǃûi-aogu Israels digu ǁî-aitsama kōǃgâsenga. ǃÛi-aoga kha gūna nî ǃûise gu i tama hâ? 3 Sago ge kauba ra ǂû, tsî go ge gūǀûn ǀkha kurusa sarana ra ana. Sago ge ǂoaǂamsa gūna ra ǂā, xawe go ge gūna kōǃgâ tama hâ. 4 Sago ge ǂkhabusana ǀgaiǀgai tama i, ǀaesen hâna ǂgauǂgau tama i, khôa hâna ǃgae-aiba tama i, kāma rana oaǀkhī-ū tama i, kā hâna ôa tama i ti i. Tsî go ge ǁîna ǁgâiǀāb ǀkha ra gaoǂam. 5 Tsîn ge ǁîna ge ǀgaruǀgaruhe ǃûi-ao-i a ǀkhai xui-ao, tsîn ge ǀgarusasen hâ amaga ǃaub di ǀgurun hoana ge ǂû kaiba. 6 Ti gūn ge hoaraga ǃhomgu tsî ǃnâugu ai gere ǁhapuma. ǁÎn ge hoaraga ǃhūbaib ai ǀgaruǀgarusase ge hâ i, tsî i ge ǁîna ra dîǃgâ tamas ka io ra ôa khoe-i xare-e ge ǀkhai i.
7 “ǁNā-amaga sa ǃûi-aogo ǁnâu re ǃKhūb di mîsa: 8 Tita a ûitsama ǃkhais ao, tib ge ǃKhūb Eloba ra mî, ti gūn ge ge amǀnē kai tsî ǃaub ǀgurun di ǂû kai, ǃûi-ao-i xare-i a ǀkhai amaga. Ti ǃûi-aogu ge ti gūna ôa tama hâ; ǁîgu ge ǁî-aitsama ra ǂûmāsen tsî ti gūna kōǃgâ tama hâ. 9 ǁNā-amaga sa ǃûi-aogo ǁnâu re ǃKhūb di mîsa: 10 Nētib ge ǃKhūb Eloba ra mî: Tita ge ǃûi-aogu ǃoagu hâ. Tita ge ti gūna ǁîgu ǃomǁaeba xu nî ūbē tsî gu ge ǁîna ǃaruǀî ǃûi tide, tsî ǃaruǀî ǁî-aitsama ǂûmāsen tide. Tita ge ti gūna ǁîga xu nî huiǂui tsîn ge ǃaruǀî ǁîga ǂûse ība tide.
ǃGâi ǃûi-aob
11 “Nētib ge ǃKhūb Eloba ra mî: Tita ge aitsama ti gūna dîǃgâ tsî ǁîna nî ôa. 12 ǃÛi-aob ra ǀgaruǀgaruhe hâ gūn âba ôa khami ta ge tita ti gūna nî ôa. Tsî ta ge ǁîna ǀgaruǀgaruhen ge hâ i ǃkhaidi hoade nî huiǂui, ǃâudi tsî kai ǃkhaenas di tsēs ai. 13 Tsî ta ge ǁîna nau ǁaede xu nî ǂgaeǂguiǂui tsî ǁîna nau ǃhūga xu ǀhaoǀhao tsî ǁîn di ǃhūb ǃoa nî hā-ū. Tsî ta ge ǁîna Israeli ǃhomgu ai tsî ǃāgu tawa tsî ǁanǃnâhe ǁkhā ǃkhaidi ǃhūb didi hoadi tawa nî ǂûmā. 14 Tita ge ǁîna ǃgâi ǃû-ais ai nî ǃû kai tsî Israeli ǃhomgu ǃnâs ge ǁîn di ǃû-aisa nî hâ. ǁNāpan ge ǃgâi ǃû-ais ai ǁgoe tsî Israeli ǃhomgu ǃnâ nî ǃû. 15 Tita ge aitsama ti gūna nî ǃûi tsî ǁîna nî ǁgoe kai,
tib ge ǃKhūb Eloba ra mî.16 “Kā hâna ta ge nî ôa tsî ǃgûbē hâna nî oaǀkhī-ū. Tsuihe hâna ta ge nî ǃgae-aiba tsî ǀaesen hâna nî ǂgauǂgau, kausa tsî ǀgaisana ta ge nî hîkākā. Tita ge ǁîna ǂhanu-aise nî ǂgaeǂgui.
17 “Tsî sadu ti gūdu xasa, tib ge ǃKhūb Eloba ra mî. Tita ge gū-i tsî gū-i ǁaegu tsî gūn tsî pirin ǁaegu nî ǀgoraǃgâ. 18 ǃGâi ǃû-ais ai du ra ǃû ǃkhaisa ǂâuba du tama, o du ǃgau hâ ǃâb ǃû-ais diba sadu ǂaidi ǀkha nî dāǂkhū; tsî ǃanu ǁgamma du ka ā, o ǃgau hâba sadu ǂaidi ǀkha dāǂgomaǂgoma? 19 Ti gūna ǁnâi sadu xa ǂaidi âdu ǀkha dāǂkhūǂkhūhe hâna nî ǂû tsî sadu ǂaidi ǀkha dāǂgomaǂgomasa ǁgamma nî ā?
20 “ǁNā-amagab ge ǃKhūb Eloba nēti ǁîn ǃoa ra mî: Tita ge kausa gūn tsî ǂgabasa gūn ǁaegu nî ǀgora. 21 Sadu ge ǂkhabusana ǃnammi tsî ǃhōb tsîkha ǀkha ǂhābē tsî sadu ǁnâgu ǀkha ra ǃkhā, ǁîna du nî saurubēs kōse. 22 Xawe ta ge tita ti gūna nî huiǂui tsîn ge ǃaruǀî ǁkhâuǁnâxū kai tide. Tsî ta ge gūn tsî gūn ǁaegu nî ǀgoraǃgâ. 23 Tita ge ǁîna ǀgui ǃûi-aoba nî mā, ti ǃgāb Davida, tsîb ge ǁîba ǁîna nî ǃûi. ǁÎb ge ǁîna nî kōǃgâ tsî ǁîna ǃûi-aose nî ība. 24 Tita ǃKhūta ge nî ǁîn di Elo tsî ti ǃgāb Davidi ge nî ǁîn di ǂgaeǂgui-ao. Tita ǃKhūta ge ǁî ǃkhaisa go mî. 25 Tita ge ǂkhîb di ǃgaeǀhaosa ǁîn ǀkha nî dī tsî ǁaixa ǀguruna ǃhūb âna xu nî bē kai, ǃnorasasen ǃû-aidi ai nî hâ ǁkhāse tsî ǃaub ǃnâs tsîna nî ǁgoe ǁkhāse.
26 “Tita ge ǁîn tsî ti ǃnâub ǂnamipe hâ ǃkhaidi tsîna nî ǀkhae. Tsî ta ge ǀnanusa ǁaeb ai nî ǀapi kai, ǁnāb ge ǀkhaeb di ǀapiba. 27 Haidi ge nî ǂûtani tsî ǃhanaga xus ge ǀoasa ǃgaosa nî hā tsîn ge ǁîna sâsase ǃhūb ân ǃnâ nî hâ. Tsîn ge tita a ǃKhū ǃkhaisa nî ǂan, ǁîn ai ǁgoe ǃnaoga khôaǃā tsî ta ga ǁîna, ǁîna ra khobodīn di ǃomǁaeba xu huiǂuio. 28 On ge ǃaruǀî nau ǃhaodi di amǀnēse ī tide tsî ǁkhāti ǃaruǀî ǁaixa ǀgurun xa ōhe tide. Tsîn ge ǃnorasase nî ǁan tsî khoe-i xare-i xa ǃaoǃaohe tide. 29 Tsî ta ge ǁîna ǂûǂûxa ǃhūba nî mā tsîn ge ǃaruǀî ǃâtsūǀkhā-e ǃhūb ǃnâ tsâ tide, tsî nau ǃhaodi tsîn xa ǃaruǀî ǃharaxūhe tide. 30 Tsîn ge nî ǂan tita ǃKhūta ǁîn Elota ǁîn ǀkha hâ tsî ǁîn Israeli ommi din a ti ǁae ǃkhaisa,
tib ge ǃKhūb Eloba ra mî.31 “Sadu ge a ti gū, sadu ge a ti ǁae, tita xa ra ǂûmāhedo tsî tita ge a sadu Elo,”
tib ge ǃKhūb Eloba ra mî.© Khoekhoegowab Elobmîs © Bible Society in Namibia, 2020.
