ǃGaeǀhaos ǂGaes Filisteǁîn tawa
1 Filisteǁîn ge ǃGaeǀhaos ǂGaes Elob disa ū tsî Ebenesersa xu ǁîn ǃās, Asdods ǁga ge ǃgû-ū. 2 Tsîn ge ǁîsa ǁîn elob, Dagonni tempeli ǃnâ ǂgâ-ū tsî Dagonni īb xōǀkhā ge mâi. 3 Sao ra ǁgoagan ge Asdods khoena Dagonni īb, ǃGaeǀhaos ǂGaes ǃKhūb dis aiǃâ, ǃhūb ai ǁnāǁgoe ǃkhaisa ge mû. On ge Dagonni ība ūkhâi tsî ǁkhawa ǃkhais âb ai ge mâi-oa. 4 Xawe sao ra tsēs ǃnauǁgoagan ge khâi, ob ge Dagonni ība ǁkhawa ais ǂama, ǃGaeǀhaos ǂGaes ǃKhūb dis aiǃâ ge ǁnāǁgoe i. ǁÎb danas tsî ǁôakha tsîn ge khôaǁnâ hâse dao-ams ǃnâ ge ǁgoe i, tsîs ge soros ǀguisa ge ǃgau hâ i. 5 ǁNā-amaga gu ge Dagonni di pristergu tsî ǁîb tempeli ǃnâ ra ǂgân tsîn hoana nētsēs kōse Dagonni tempeli, Asdods ǃnâ mâb dao-ams ǃnâ dā tama hâ.
6 ǃKhūb ge Asdods khoena kaise ǃgomse ge ǁkhara tsîb ge Asdods tsî ǁnā ǀkharib din ai tsuide hā kai tsî ǁîna ge ǃaoǃao. 7 Tsî Asdods din ge tare-i ra īsa mû, on ge ge mî: “ǃGaeǀhaos ǂGaes Israeli di Elob disa as ǃaruǀî tā sada tawa hâ, ǁîb kaise sada tsî sada elob, Dagonni tsîna ra ǁkhara xuige.” 8 Tsîn ge sîsabega sî tsî hoa koro gao-aogu Filisteǁîn diga ǂgaiǀhao tsî ge dî: “Tare-e da ǃGaeǀhaos ǂGaes, Israeli di Elob dis ǀkha nî dī?”
O gu ge gao-aoga ge mî: “As ǁîsa Gats ǃoa ǃgû-ūhe.” On ge ǃGaeǀhaos ǂGaes Israeli di Elob disa ǁnāǀî ge ǃgû-ū. 9 Xawe ǁîsan ge sī-ūs khaoǃgâb ge ǃKhūba ǁnā ǃās ona ǁkhara tsî kai ǃaoba ǁîs ǃnâ ge hā kai. ǁÎb ge ǁnā ǃās di khoen hoana, ǂkhamna xu kain kōse tsuin ǀkha ge ǁkhara. 10 ǁNās khaoǃgân ge ǃGaeǀhaos ǂGaes Elob disa Ekrons ǁga ge sî. ǁÎs ge ǁnāpa sī, on ge Ekrons khoena ge ǃau: “ǃGaeǀhaos ǂGaes Israeli di Elob disan ge sida ǃoa go hā-ū, sida tsî sida khoenan nî ǃgamga.” 11 On ge ǁkhawa sîsabega sî tsî Filisteǁîn di ǂgaeǂgui-aogu hoaga ǀhaoǀhao tsî ge mî: “ǃGaeǀhaos ǂGaes Israeli di Elob disa sî-oa ǁîs di ǃkhais ǂûs ǁga, îs tā sida tsî sida khoen tsîda ǃgam.” Kai ǃaob ge hoaraga ǃās ǃnâ ge hâ i, Elob ge ǁîna ǃgomse ǁkhara xui-ao. 12 ǁNān ǁō tama ge in ain ge tsuina ge ǂoa tsîb ge ǃaub âna ǃnūseb kōse gere ǁnâusen.
© Khoekhoegowab Elobmîs © Bible Society in Namibia, 2020.
