Judab di ǁōb
1 Demetriub ge Nikanori tsî ǁîb di toroǂnubis ge ǃgamhe ǃkhaisab ge ǁnâu, o Baxideb tsî Alkimub hâkha nē ǃnāsa Siriaǁî toroǃkhamaogu ǀkha ǁkhawa Judeab ǃoa ge sî. 2 ǁÎgu ge Gilgals ǃoa garu daob ǀkha ǃgû tsî Mesalots, hîa Arbelab ǃnâ ǂnôasa ǃnamiǂgā, ǁîsa ūbasen tsî ǂgui khoena ge ǃgam. 3 ǀGuikaidisi tsî korodisiǀgamǀaǁî kurib, ǂguro ǁkhâb dib ǃnâb ge hâǃkhaiba Jerusalems ǃoagu ge dībasen. 4 ǁNāpa xu gu ge ǀgamdisiǀoadisi ǀnūtoroǃkhamaogu tsî ǀgamǀoadisi hātoroǃkhamaogu ǀkha Bereas ǃoa ge ǃgû.
5 Judab ge ǃnonaǀoadisi, ǂansa ūhâ toroǃkhamaogu ǀkha Elasas tawa hâǃkhaiba ge ǂnaumâibasen. 6 Xawe gu ge kai ǃgôab di toroǂnubis khākhoen disa gu ge mû, o kaise ge ǃao. ǂGui toroǃkhamaogu ge ge ūbēsen tsî gu ge ǁkhaisakaidisi Jodeǁî toroǃkhamaogu ǀguiga ge ǃgau. 7 Tsî Judab ge ǁîb di toroǂnubis ra garu ǀoro tsîb toroba tsoatsoas ai hâ ǃkhaisa a mû, ob ge ǂâu hâ ǁae-i, ǁîb di toroǂnubisa ǀhaoǀhaos ǃaroma ǀkhai ǃkhais xa gere ǂâiǂhansen. 8 ǁÎb ge ge ǂkhabuǂâi, xaweb ge ǁnāpa ge ǁîb ǀkha hâ i gu ǃoa ge mî: “A ge ǁnāǂams ǃaroma ǂhomisen, ǁîga ge hîkākā ǁkhā ǃkhais di īǁkhāsib noxopa hâ xuige.”
9 ǁÎb khoegu ge ǁîba ǂkhātsâ tsî “Sage ge ǂâu hâ ǀgaiba ūhâ tama hâ. A ge sage ûiba sâu, î ge oa tsî ǀgaisa ǃgâsagu ǀkha ǀkhī tsî khākhoegu ǃoagu hā ǃkham. Sage ge kaise a ǀoro” ti ge mî.
10 Ob ge Judaba ge ǃeream: “Tātsēs tsîna i ge tita ge toro-e xu ǃkhoeni, ti mîhe tide. Sage ǁaeb ga hā, o age ǃgari-aose, sage di ǃgâsan ǃaroma ǁō, î-i tā ǃaroma-i, sage di ǃgôasib xa nî dîhe ǃkhais di-e hâ.”
11 Baxideb di toroǂnubis ge toroǃkhamaogu di tentomde xu ǂoaxa tsî Judab di toroǃkhamaogu ǃoagu ǃkhammi ǃoa ǂhomisase hā ge mā. Hātoroǃkhamaogu ge ǀgam ǃnanra ǃnâ ge ǀgoraǂgāhe tsî slengerdi tsî khāde ūhâ toroǃkhamaogu ge danatoro-aoga ge aimâba. 12 Baxideb ge amǀkhāb di toroǁnâub ǃnâ ge hâ i. ǀNūtoroǃkhamaogu ge hoa ǀkhāgu ai hātoroǃkhamaogu xa ge ǁkhaubahe hâ i tsî di ge xâiǁnâde gere xâihe. Judab di toroǃkhamaogu tsîn ge ǁkhāti ǁîgu xâiǁnâde gere xâi. 13 Nē ǀgam toroǂnubira ge ǀhao, ob ge ǃhūba ǂkhupib xa gere ǂgūbi, tsî gu ge ǁgoasa xu ǃoes kōse ge ǃkham.
14 Judab ge Baxideb tsî toroǀgaib, Siriaǁî toroǂnubis dib tsîn amǀkhāb ǃnâ hâ ǃkhaisab ge mûo, ǁîb di ǁkhoaǂgaoxa khoegu hoagu ǀkha ǀhao hâse, 15 Siriaǁîgu di amǀkhāb di toroǁnâuba ge hîkākā. Tsî gu ge ǁîga ǃhommi di ǂai-ammi kōse ge ǃgôaǃgon. 16 Xawe gu ge ǁareǀkhāb ai ge hâ i Siriaǁîga, ǁîgu di amǀkhāb ai ge hâ i toroǃkhamaogu ge hîkākāhe ǃkhaisa gu ge mû, o dabasen tsî Judab tsî ǁîb toroǃkhamaogu tsîga ǃgâbǀkhāba xu ge ǁnāǂam. 17 Nē torob ge kaise ge kai i tsî gu ge ǂgui khoega hoa ǀkhākha ai ge ǃgamhe. 18 ǀUnis aib ge Judaba ge ǃgamhe tsî gu ge ǃgau ge khoega ge ǃkhoeni. 19 Jonatanni tsî Simonni hâkha ge ǃgâsab Judab di sorosa ū tsî omaris ǀhobas, Modeins tawa ǂnôas ǃnâ ǁkhō 20 tsî ǁîba ǁnāpa āba. Hoaraga Israelǁaes ge ǁîba gere āba tsî ǂgui tsēde ǃoab ǃnâ ge hâ i. Tsîn ge 21 “Mâtib kha ǀgaisa ǃgari-aob tsî Israelǁaes di ore-aoba go ǃgamhe” ti gere mî.
22 Judab di ǀnî dīgu, ǁîb di torogu, ǁkhoaǂgaoxasib tsî ǁîb di kai sīǃnâdi ge xoamâihes ǃaroma kaise a ǂgui.
Jonatanni ge Judaba ra saoǃgon
23 Judab di ǁōb khaoǃgâgu ge ǂhanuo khoega hoaraga Judeab ǃnâ ge khâi, hoaraga ǂkhabadī-aogu ge ge oahā. 24 ǁNā ǁaeb ǃnâb ge ǁkhāti kai ǃâtsūǀkhāba ge hâ i tsîn ge hoaraga ǃhūb di khoena nē ǂhanuoǃnâ khoegu ǀkhāb ǃoa ge ǃgâu. 25 Baxideb ge ǃhūba nî ǂgaeǂguise, ǀnî eloxoresa Jodeǁîga ǂgaeǂgui-aose ge ǁgaumâi. 26 Nē khoegu ge Judab di ǀhōsana ôaǂui tsî hoana Baxideb tawa hā-ū, tsîb ge ǁîba ǁîna tsûtsû tsî gere mîǁgaiǁgai. 27 ǁNāpab ge kai ǂōǂōsiba Israelǁaes ǃnâ ge hâ i, kēbo-aogu nî ǁîn ǃnâ ǂhaiǀû ǁaeb ai ge hâ ib ǃgâ-ai kaiba.
28 On ge Judab di ǀhōsan hoana ǀhao tsî Jonatanni ǃoa ge mî: 29 “Sa ǃgâsab, Judab ge ǁōsa xu i ge ǁîb khami sige sida khākhoen, Baxideb tsî sida ǁaes ǂûs di khoen, hîa sida ra ǁgâiǀān ǃoagu nî ǂgaeǂgui khoe-e a ǀkhai. 30 Nētsē da ge satsa, ǁîbats sida ǂgaeǂgui-ao tsî ǂammâisase nî saoǃgonse ra ǁhûi, îts sida toroga ǃkhamba da.” 31 Jonatanni ge nē ǂgaeǂguisa ǁnātsē ūǃoa tsî ǃgâsab, Judab soasa ge ūǃkhuni.
Jonatanni di ǀapemādi
32 Baxideb ge nēsab ge ǂan, o Jonatanna gere ǃgam ǂgao. 33 Xaweb ge Jonatanna nē ǂhôasab ge ǁnâu, o ǃgâsab, Simonni tsî ǁîkha toroǃkhamaogu ǀkha Tekoaǃgaroǃhūb ǃoa ǃkhoeni tsî hâǃkhai-e Asfars di ǁgamǃgaus tawa sī ge dībasen. 34 Baxideb ge Sabbattsēs ai nēsa ge ǂan tsî ǁîb di hoaraga toroǂnubis ǀkha Jordanǃāba ge ǃgâu. 35 Jonatanni ge ǁîb ǃgâsab, Johaneb hîa ge toroǃkhamaogu di ǀaokhoen ǃereamsa ge ūhâ iba, Nabateaǁîn, ǁîn di horesa ge in ǁga ge sî, îb ǁîn ai ūn ge hâ i ǂgui xūnan ǁnāpa sâu ǁkhā ǃkhaisa ǂgan. 36 Xawen ge Jambriǁîn, Medebab dina Johaneba ǃkhō tsî xūn âba ū tsî ǁîn ǀkha ge bē. 37 Nēn khaoǃgâ kha ge Jonatanni tsî ǁîb ǃgâsab Simonni hâkha, Jambriǁîn ra kai ǃgameba ǁâudī tsîs nî ǃgameǂnāsa Nadabatsa xu dīhe ǃkhaisa ge ǁnâu. ǃGame-aos ge Kanaanni di kai gaoǀgôagu di ǀguib di ôa ge isa. 38 Jonatanni tsî Simonni hâkha ge ǁîkha ǃgâsab, Johaneb di ǁōba gere ǀkhao ǂgao tsî ǁnā-amaga ǁîkha khoegu ǀkha ǃhomgu di ǀguib ai ǃgûǃapa tsî ǁnāpa ge gau. 39 ǁÎgu ge kō tsî ǂgui xūna ǃnao hâ ǂkhupi ra ǂnubis khoena ge mû. ǃGame-aob, ǁîb ǀhōsan tsî ǃgâsan tsîn ge ǃgame-aos ǀkha nî ǀhaose ǁâudīb ǃoa ge garu i. ǁÎn ge ǀgaisase ge ǁâtanisen hâ i tsî ǀkhōxūn tsî ǃkhomǃkharurudi tsîna gere ǀkhō. 40 Jonatanni tsî ǁîb khoegu tsîn ge ǁgoe-am gu ge hâ i ǃkhaiba xu ǁîna ǁnāǂam tsî ǂguin ǁîn dina ge ǃgam. Ûiǃgau gen ge ǃhomgu ǃoa ge ǃkhoeni, tsîn ge Jodeǁîna ǁîn di xūn hoana ūbasen. 41 ǃGameb di ǁaeb ge ǃoab ǃnâ tsî ǁîn di ǀkhōxūn di ǃgâi ǀōba, ǁkhōs ǁnaetsanadi ǃnâ ge ǀkharaǀkharahe. 42 Jonatanni tsî Simonni hâkha ge ǀoasase ǃgâsab di ǁōba ǀkhao tsî Jordanǃāb tawa ǁgoe ǁgamxa ǃhūb ǃoa ge oa.
43 Baxideb ge nēsa ǁnâu tsî Sabbattsēs ai kai toroǂnubis ǀkha Jordanǃāb di ǀnomammi tawa ge hā. 44 Ob ge Jonatanna ǁîb di khoega ge mî; “Nēsi ge ge sage ûiga nî ǃkhamba, noxopa ge ge hâǃnâtsâ tama hâ i, ǃgom mâsib ǃnâ ge hâ xui-ao. 45 Khākhoegu ge sage aiǃâ hâ tsî ǃāba sage ǃgâb ai; ǁgamxa ǃhūb tsî haiǀgommi ge hoa ǀkhākha ǃāb dikha ai hâ tsî i ge sage nî ǂoa-ū dao-i xare-e a ǀkhai. 46 A ge nēsi ǃKhūba ǃoa ǀgore, îb ta khākhoegu ǃomǁae māǁnâ ge.”
47 Torob ge ge tsoatsoa tsî nēsi gu Jonatanni tsî ǁîb di khoega Baxideba ra ǃgam ǁga, hîab ge ǁîba ǃgâbǀkhāb toroǂnubis dib ǃoa ge ǁhaiǃnora. 48 Jonatanni tsî ǁîb khoegu tsîgu ge ǁhaiǃnora nîse Jordanni ǃnâ uriǂgâ tsî nauǃanib ǃoa ge tsâǃgâu, xawes ge Siriaǁî toroǂnubisa ǁîga gu nî ǃgôaǃgonse ǃāba ǃgâu tama ge i. 49 ǁNā tsēb ge Baxideba ǁaubexa ǀguiǀoadisi khoega ge ǂoaǃnâ.
50 Baxideb ge Jerusalems ǃoa oahās khaoǃgân ge Siriaǁîna ǀgaisa hâǃkhaiga, ǀgapi ǂnubiǂgoagu tsî ǀgaisa ǀuridao-amdi ǀkha Judeab di ǃādi, Emmaus, Bet-Horons, Betels, Timnats, Faratons, Tefons tsî Jerixos tsîdi ǃnâ ge ǂnubi. 51 Nē ǃādi hoadi ǃnâb ge Baxideba toroǃkhamaoga ǀûs ose gu Jodeǁîna nî ǁgarise ge hâ kai. 52 ǁKhātib ge ǀgaisa hâǃkhaigu, Betsurs tsî Gesers digu tsî ǁkhui-ommi Jerusalems dib tsîna ge ǀgaiǀgai. Tsîb ge ǁnāpab toroǃkhamaoga hâ kai tsî ǂûn tsîna ge sâu. 53 Tsîb ge ǃhūb di danaǂgaeǂgui-aogu di ôaga ǃkhōsabese ū tsî Jerusalems tawa ǁkhui-ommi ǃnâ ge ǂganamǂgā.
54 ǀGuikaidisi tsî korodisiǃnonaǀaǁî kurib di ǀgamǁî ǁkhâb ǃnâb ge ǀgapipristeri Alkimuba ǂganagab ǃnā-ommi Tempeli dib di ǂnubiǂgoab nî khôaǁnâhe ǃkhaisa ge mîmā. ǁÎb ge kēbo-aogu di sîsenna ge khôaǁnâ. 55 Xaweb ge khôaǁnâs ra tsoatsoa, hîa ge ǀaesen tsîb ge sîsenna ge ǀûhe. ǃHom tsîb ge ge ǃhoa ǁoa i, tsî ǁnā-amaga omaris di ǀumis tsîna ge ǀgora ǁoa i. 56 Tsîb ge Alkimuba ǁnā ǁaeb ǃnâ kai tsûb ǃnâ ge ǁō. 57 Baxideb ge Alkimub ge ǁō ǃkhaisab ge ǁnâu, o gao-aob Demetriub ǃoa ge oa tsîb ge Judeaba ǀgam kurikha ǀgaiba ǂkhîba ge ūhâ i.
58 O gu ge hoaraga ǁgauoǃnâ khoega ǀhao tsî ge mî: “Kō, Jonatanni tsî ǁîb di khoegu hoagu ge ǂkhîb tsî ǃnorasasib ǃnâ ǁan hâ. Baxideba ge ga nēsi nēba hā-ū, ob ge ǀgui tsuxub ǃnâ hoaga ǃkhōsis ǃnâ ū ǁkhā.” 59 Tsî gu ge nē ǃkhaisa nî sī Baxideb ǀkha ǃhoaǁarese ge ǃgû. 60 ǁÎb ge kai toroǂnubis ǀkha ge ǃgûǂoa. Tsîb ge ǁîb ǀkha ge Judeab ǃnâ ǃgaeǀhaosa dī hâ i khoena ǂganǃgâsa sîǂkhanide ge sîba, în Jonatanni tsî ǁîb khoega ǃkhōsis ǃnâ ū. Xawe gu ge nēsa ge dī ǁoa, ǀapes âgu ge ǂanǃnâhe xui-ao. 61 Jonatanni tsî ǁîb khoegu tsîn ge korodisigu, nē ǂhanuoǃnâ ǂgaeǂgui-aogu di ǀapes ǃnâ ge dīxūxa īga ǃkhōsis ǃnâ ū tsî ge ǃgam. 62 O kha ge Jonatanni tsî Simonni hâkha ǁîkha khoegu ǀkha Betbasis, ǃgaroǃhūb ǃnâ ǂnôas kōse ge ǂgae-oasen. ǁNāpa kha ge khôaǁnâhe ge hâ i ǀgaisa hâǃkhaiga ǁkhawa ǂnubikhâi tsî ǃāsa nî ǁkhaubase ge ǀgaiǀgai. 63 Baxideb ge nēsab ge ǁnâu, o hoaraga toroǂnubisa ǀhaoǀhao tsî ǁîb di ǂkhâǃnâ-aon Judeab ǃnâ hâna ǂkhaikarin nî hâ ǃkhaisa ge mîmā. 64 ǁÎb ge hoa ǀkhāga xu Betbasisa ge ǁnāǂam tsî ǁîsa ge xāǂgā. Torob ra ǂgui tsēde aiǃgû, 65 ob ge Jonatanna ǁîb ǃgâsab Simonna ǃās ǃnâ hâ kai tsî ǁîba ǀoro khoegu ǀkha ǃāsa xu ge ǂoa. 66 Jonatanni ge Odomerab tsî ǁîb ǃgâsaga dan tsî Fasironǁîn di hâǃkhaiba ǁnāǂam tsî ge hîkākā. On ge danhen geo, Jonatanna sao tsî ǁîb ǀkha Baxideb ǃoagu ge hâ i ǁnāǂams ǃnâ ge aiǃgû. 67 ǁNā ǁaeb ǀguib ǃnâb ge Simonna ǁîb khoegu ǀkha ǃāsa xu ǃhaese ǂoa tsî torob di ǂnoa-ūxūna ge ǃkhāǂhubi. 68 Nē torob ge ǁnātikō kai ǁgâiba Baxideb ai ge ūhâ tsî di ge ǁîb ǀapede ge ī ǁoa i, tsîb ge ge danhe. 69 Kaiseb ge ǁgauoǃnâ Jodeǁîn hîa ge ǁîba Judeab ǁgab nî hāga ǃhoaǁare-ūn ǀkha ǁaixa tsî ǂguina ge ǃgam.
ǁNās khaoǃgâb ge Baxideba ǁîb di ǂhunuma ǃhūb ǁgab nî oa ǃkhaisa ge mîǁgui. 70 Xaweb ge Jonatanna nēsab ge ǁnâu, o ǂhanuǂnûǁkhaeba-aoga Baxideb ǃoa, ǂkhîba kha nî dī tsîb nî Baxideba Jodeǁî ǃkhōsabena ǃnora kaiga ge sî. 71 Baxideb ge Jonatanni di ǂgansa ǁnâu-am tsî ûib hâs kōseb ǁîba ǂkhîb ǃnâb nî ǁnāxū ǃkhaisa ge nū. 72 Baxideb ge ǃkhōsabena mā-oa tsî ǁîb di ǂhunuma ǃhūb ǃoa ge oa. Tātsēb ge ǁkhawa Jodeǁîn di ǁanǀkharib ǃnâ ge hā tama i. 73 Israeli ǃnâb ge toroba ǀams ai ge hā. Jonatanni ge Mixmas ǃnâ sī ǁan, ǂgaeǂguitsoatsoa tsî eloxoresan Israelǁaes ǃnâ ge hâ ina ge hîkākā.
© Khoekhoegowab Elobmîs © Bible Society in Namibia, 2020.
