Elob ge a hoan di ǀgoraǃgâ-ao
1 Elots ǀkhaogu ditse,
ǃKhūtse, ǀkhaogu di Elotse
sa kaisiba ǂhai kai re.
2 Khâi re ǀgoraǃgâ-aots ǃhūbaib ditse;
mādawa-am re ǀgapiǂâixana, ǁîn ǃoaǂuis ǃoa!
3 Mâǁaeb kōse ǃKhūtse, mâ ǁaeb kōsen
ǂkhaba khoena nî dâ?
4 ǁÎn ge ǀgapiǂâixasib mîde ra ǀkhabu;
ǂKhabadī-aon hoan ge ra koasen.
5 ǃKhūtse sa khoen ge ra ǂkhū;
sa ǀumisan ge ra ǁgâiǀā.
6 ǁÎn ge ǃoataradi tsî ǃhaokhoena ra ǃgam;
ǃguniǀgôana ge ra hîkākā.
7 “Tsîn ge ǃKhūb ge mû tide;
Jakob Elob ge ǂan tide” ti ra mî.
8 ǁNâuǃā re, sadu ǁaes ǃnâ hâ gâredo.
Sadu gâdo, mâǁae du nî gā-ai?
9 ǁNāb ǂgaesa ge kuruba ǁnâi ǁnâub tide?
Mûs di kuru-aoba ǁnâi mûb tide?
10 ǁNāb ǃhaode ra ǁkhāǁkhāba ǁnâi ǁkharab tide;
ǁîb hîa khoesiba ǂansa ra ǁkhāǁkhāba?
11 ǃKhūb ge khoen ǂâide a ǂan
mâtikōse di a ǁau ǃkhaisa.
12 ǀKhaehen ge hâ ǁnān sats ra ǁkhāǁkhāna ǃKhūtse
ǁnān sa ǂHanuba xuts ra ǁkhāǁkhāna.
13 ǁÎnats ge ǂkhabadīb tsēdi ǃnâ nî sâ kai
ǁnān hîa a ǂkhaban nî ǃgam āba khaobahes kōse.
14 ǃKhūb ge ǁîb khoena ǂhara tide;
ǁîb ge ǀumis âba ǁnāxū tide.
15 ǀGoraǃgâs ge ǂhanu-aisib ǃoa nî oa;
tsîn ge ǂhauǃnâ ǂgaogu â-in hoana ǁîsa nî sao.
16 Tari-e tita ǃaroma ǂkhabadī-aon ǃoagu nî khâi?
Tari-e ǂkhaba khoen ǃoagu tita nî khâiba?
17 ǃKhūb ga huib ase ība te tama hâ,
o ta ge ǃhaese ǃnōsan ǃhūb ǃoa ga bē hâ.
18 “Ti ǂais ge ra ǂkhiri” ti ta ga mî,
ob ge sa hâhâ ra ǀnamma ra ǂkhâǃnâ te ǃKhūtse.
19 Ti ǂhani ra ǂâidi di ǃnāǂamsasib ǃnâ
di ge sa ǁkhaeǂgaode ǃnākhoesib âtaba ge khoakhoa.
20 Hîkākās di tronsa sats ǀkha nî ǀgui,
tsūǃōb ǀguiba ra kurusa?
21 ǁÎn ge ǂhanu-ai-i ǃoagu ǀapeǀhao
tsî ǀhapiona ǁōb kōse ra ǀgoraǃgâ.
22 Xaweb ge ǃKhūba tita ǁhaiǁhâǃkhaise ge ība
tsî ti Eloba ge ti ǃgareǀuib, tita sâuǃkhaise ībaba.
23 ǁÎb ge ǁîna ǁoren ân ǃaroma nî dīdawa-am
tsî ǂkhabasib ân ǃaroma ǁîna nî hîkākā;
ǃKhūb, sada Elob ge ǁîna nî hîkākā.
© Khoekhoegowab Elobmîs © Bible Society in Namibia, 2020.
