ǃHobasen tamas ka io ǁō
1 ǁNā ǁaeb ǃnân ge ǀnî khoena ǁnāpa hā tsî Jesuba Galileaǁîn hîa Pilatub xa ǁguibaǀgoanan ra ǂā hîa ge ǃgamhen xa ge mîba. 2 Ob ge Jesuba ge ǃeream: “Nē Galileaǁîn go nau Galileaǁîn ǃgâ-ai kai ǁore-ao i, ti du ra ǂâi, nēn go ǁîn ǀkha ī ǃkhais ǃaroma? 3 Tātsē, ti ta ra mîba du, xawe ǃhobasen tama du ga io, o du ge ǁîn ǁkhān khami nî kāǁō. 4 Tamas ka io ǁnā disiǁkhaisaǀan, Siloams ǂgō-ommi xa ge ǁnā-aihe tsî ǁōna, ǂâi du ra nau ǁanǂgāsaben Jerusalems din xan ge ǃnāsase ǀhapixa isa? 5 Hî-î ti ta ra mîba du, xawe ǃhobasen tama du ga io, o du ge ǁîn ǁkhān khami sadu tsîna nî ǁō.”
ǂÛtanioǃnâ ǀnomahais di ǂkhōs*
6 Tsîb ge Jesuba ǁnās khaoǃgâ nē ǂkhōsa ge ǁgam: “Khoeb ge ǀnomahaisa ǁîb draibeǃhanab ǃnâ ge ǂgā hâ i. Tsî ǁîs ai ǂûna ôa tsîb ge hō tama io, 7 ob ge ǃhanasîsenaob ǃoa ge mî: ‘Mû ǃnona kuriga ta ge nē hais ai ǀnomana hā ra ôa tsî xū-e hō tama hâ. ǁHāǂui si! Tare-i ǃaromas kha ǃaruǀî ǃhūba nî ǂûoǃnâ kai?’ 8 Xaweb ge ǃhanaǂgā-aoba ge ǃeream, ‘ǀHonkhoetse, as ganupe nē kurib ǀguiba mâ. Tita ge ǁîs ǂnamipe hâ ǃhūba ǃkhāǃkhuri tsî nî ǀarumā. 9 Nēsis ga ǃgoaxa kuri ǂûtani o-i ge a ǃgâi. ǁNā tamas ka io, os ge a ǁhāǂuihe ǁkhā.’ ”
Jesub ge ǃhora tarasa Sabbattsēs* ai ra ǂgauǂgau
10 ǀGui Sabbattsēs aib ge Jesuba sinagogegu* di ǀguib ǃnâ gere ǁkhāǁkhā. 11 ǁNāpas ge tarasa ge hâ i disiǁkhaisaǀa kuriga ge ǀaesen kai si ra gaga-e ūhâ isa; ǁîs ge ǁâb âs ge gama is ǀkha ǂhanuse tsî ǂgōse ge ǃgû ǁoa i. 12 Tsî Jesub ge mû sib ge, o ǁîsa ǂgaiǀgū tsî ge mî: “Tarase sa ǀaesenna xus ge go ǃnora!” 13 ǁÎb ge ǃomkha âba ǁîs ai ge ǁgui tsîs ge ǁnātimîsi ǂhanuse mâ tsî Eloba ge koatsoatsoa.
14 Sinagogeb di ǂgaeǂgui-aob ge Jesub ge Sabbattsēs ai tarasa ǂgauǂgau ǃkhais xa ge ǁaixa tsîb ge “ǃNani tsēdi ge wekheb ǃnâ hâ khoe-i nî sîsense. ǁNā tsēdi di ǀguis ai du ge hā tsî nî ǂgauǂgau kaisen, Sabbattsēs ais ose!” ti ge mî.
15 Ob ge ǃKhūba ge ǃeream bi: “Sa ǀgamaixago! Mâ-i sadu di-e ǁî-i di gomab tamas ka io dâukiba Sabbattsēs ai ǁgoroba xu ore tsî ǂgaeǂgui tama, ǁgam-eb sī nî āse? 16 Tsî nēs ge khoes, Abrahammi surib dis, disiǁkhaisaǀa kuriga Satanni* xa ǃgaehe hâsa. Sabbattsēs ais kha ǁnâi nē ǃgaeǃhâuba xu a xorehe ǁoa?” 17 Nē ǃereams ǀkhab ge Jesuba ǁîb mâǃoa-aon hoana ge tao kai tsî hoaraga khoen ge ǂkhaisa xūn hîab gere dīn ǂama gere ǃgâiaǂgao.
Mostardǃkhomro-i* di ǂkhōs
(Mateub 13:31-32Markub 4:30-32)18 Ob ge Jesuba ge dî: “Elob Gaosiba kha mâtib ī? Tare-i ǀkha ta ǁîba a ǀgopeǀnō ǁkhā? 19 Gaosib ǀHommi dib ge ǂkhari mostardǃkhomro-i khoeb ra ū tsî ǃhanab ǃnâ tsoro-i khami ī. ǁÎ-i ge ǀomkhâi tsî ge hai kai tsîn ge ǀhomanirona hā tsî ǁnâugu âs ǃnâ omde ge dībasen.”
Khūkhū-i di ǂkhōs
(Mateub 13:33)20 ǁKhawab ge Jesuba ge dî: “Tare-i ǀkha ta Elob Gaosiba a ǂkhō ǁkhā? 21 Elob Gaosib ge khūkhū-i, taras ū tsî ǃores di mel-i ǃnâ ra ǂgā tsî hoaraga pere-e ra khū kai-i khami ī.”
ǂŌ dao-ams
(Mateub 7:13-14, Mateub 21-23)22 Jerusalems ǃoa garu daob aib ge Jesuba ǃādi tsî ǃārodi tsîna ǃkharuǃnâ tsî khoena gere ǁkhāǁkhā. 23 O-i ge khoe-e ge dî bi: “ǃKhūtse, ǀoro khoen ǀguina nî sâuhe?”
Ob ge Jesuba ge ǃeream: 24 “ǁGū re, î ǂō dao-ams ǃnâ-u ǂgâ. ǂGuin ge nî dītsâ ǂgâsa, xawen ge ǂgâ ǁkhā tide. 25 ǀHonkhoeb ga khâi tsî daos âba ǂganam, o du ge ǃauga mâ tsî dao-ams ai ǃgubu-amtsoatsoa tsî ‘ǃKhūtse, ǁkhowa-amba da re!’ ti nî mî. Ob ge sado ‘ǀŪ ta a mâpa xu du ra hā ǃkhaisa!’ ti nî ǃeream. 26 O du ge nî ǃeream: ‘Sats ǀkha da ge ǂû tsî gere ā tsî sida ǃgangu ǃnâts ge khoena gere ǁkhāǁkhā.’ 27 Xaweb ge ǁkhawa sadu ǃoa nî mî: ‘ǀŪ ta a mâpa xu du ra hā ǃkhaisa. ǀGui-i sadu di-i tsîn ge ǃgâi-e ge dī tama hâ i. Bēxū te.’ 28 ǁNāpab ge āb tsî ǁaninǁgûb ǀguiba nî hâ, Abrahammi tsî Isaki tsî Jakob tsî hoa kēbo-aogu tsîga du ga Gaosib Elob dib ǃnâ sī mûo, tsî du ge ǃaugab ǃoa nî aoǂuihe. 29 Khoen ge aiǂoas tsî huriǂoas, ǀapas tsî ǃkhawagas tsîna xu hā tsî ǁâudīb di tāb tawa Elob Gaosib ǃnâ nî ǂnû. 30 ǂÂis ǃnâ ūhâ re: ǁNā-amagan ge nētsē ǂguro hâna nî ǀuni tsî ǁnān hîa ǀuniga hâna nî ǂguro.”
Jesub ge Jerusalems ǂama ra ǃoa
(Mateub 23:37-39)31 ǁKhā ǁaeb ǃnâ gu ge ǀnî Farisega hā tsî Jesub ǃoa ge mî: “Nēpa xu ūbēsen, î ǀnî ǃkhai-i ǁga ǃgû, Herodeb ra ǃgam tsi ǂgao xuige.”
32 Xaweb ge Jesuba ge ǃeream gu: “ǃGû, î ǁnā ǀgiriba sī mîba: ‘Nētsēs tsî ǁaris tsîna ta ge noxopa ǁgâuaga* ra ǃhaeǂui tsî khoena ra ǂuruǂuru, xawe ǃnonaǁî tsēs ai ta ge ti sîsenna nî ǀamǀam.’ 33 Ā, nētsēs tsî ǁaris tsî ǃgoaxa tsēs ai ta ge ǃaruǀî nî ǃgû, īǁoa a ǃkhais ge kēbo-aob ǀnî ǃkhai-i ai nî ǁōsa, Jerusalems ǃnâ tama i tsî.
34 “Jerusalemse, Jerusalemse! Sas kēbo-aoga ǃgam tsî sas ǃoa Elob xa sîhe hâga ra ǀuiǁhomse, mâtikō ǃnāde ta ge dītsâ sa ôana ǀhaoǀhaosa, anis ǁîs ôarona ǁgabokha âs ǃnâ ra ǀhaoǀhao khami, xawe du ge mā-am te tama ge i. 35 ǁNā-amagab ge sadu Tempela nî ǀkhaiǃnâ. Tsî ta ra mîba go tātsēs tsîna go ǁkhawa mû te tidesa sago sī ‘ǀKhaeheb ge hâ ǁnāb, ǃKhūb ǀons ǃnâ ra hāba!’ ti nî mîs kōse.”
© Khoekhoegowab Elobmîs © Bible Society in Namibia, 2020.
