Mā-amsa tama tsâbaǁhaoǀgaub
1 Moseb ge ǃaruǀî Israelǁîn ǃoa ge mî: “Sadu ge ǃKhūb sadu Elob di ôado. ǁŌ go khoe-i ǃaroma du ga tsâbaǁhao, o tā ǁî-aitsama ǃgaoǁhūsen tamas ka io sadu ǃūs di ǀûna ǂkhom. 2 Sadu ge ǃKhūb sadu Elob xa ǁîb di ǃoabas ǃaroma nau ǁaedi, ǃhūbaib ai hâdi hoade xu ge ǁhûiǂuihe.
ǃAnu tsî ǃanuoǃnâ ǀgoan tsî xamarin
(Levitikus 11:1-47)3 “ǃKhūb ge ǃanuoǃnâse ǃgapaǀî xū-i hoa-e du ge ǂû tide. 4 Sao ra ǀgoan tsî xamarina du ge ǂû ǁkhā: Goman, gūn, pirin, 5 ǀgaen, ǁgûn, ǁkhaman, ǃgarogūn, ǃgaropirin, ǃkhann, 6 mâ ǀgoa-i tsî xamari-i hoa-i, ǀgorasa ǁkhorade ūhâ tsî ra ǁgaeǃgâ-i tsîna. 7 Hoaraga xamarin tsî ǀgoan, ǀgorasa tama ǁkhorade ūhâ, xawe ra ǁgaeǃgân ge ǂûhe tide. Sao ra xamarin ge ǂûhe tide: ǃNain, ǃôan tsî ǃâun. ǁÎn ge ra ǁgaeǃgâ, xawe ǀgorasa ǁkhorade ūhâ tama tsî ǃanuoǃnâse nî ǃgapaǀîhe. 8 Hāgūn tsîn ge ǂûhe tide. ǁÎn ge ǀgorasa ǁkhorade ūhâ, xawe ǁgaeǃgâ tama hâ. Tā ǁîna ǂû tamas ka io ǁîn ǁō hâ sorode tsâǀkhā.
9 “Hoaraga ǁaun ǁgamgu ǃnâ hân hîa ǀgaregu tsî khōǂhawiroga ūhân hoana du ge a ǂû ǁkhā, 10 xawe ǁnān hîa ǁgamgu ǃnâ hân, xawe ǀgaregu tsî khōǂhawirogu tsîna ūhâ tamana du ge ǂû tide. ǁÎn ge ǃanuoǃnâse nî ǃgapaǀîhe.
11 “Hoaraga ǃanu anina du ge a ǂû ǁkhā. 12-18 Xawe sao ra aniǃnôan ge ǂûhe tide: ǃAriǃkhān, ǀhonon, ǀaun, ǀauǃnôan; kai-anin, goraǃnôan; ǀamin; huri-anin, oefarn, reirǃnôan, ǀēdeharan, ǃuriǁkhain; ǁnūren tamas ka io surutsiǃguben tsîna.
19 “ǁGaboxa xoxon hoan ge sadu ǃaroma a ǃanuoǃnâ tsî ǂûhe tide. 20 Xawe hoaraga ǃanu aniǃnôan ge a ǂûhe ǁkhā.
21 “Aitsama ga ǁō xamari-i tamas ka io ǀgoa-e du ge ǂû tide. ǁÎ-e du ge sadu ǁaegu ǁan hâ ǃhaokhoena nî mā, în ǂû tamas ka io ǀkhara ǃhaokhoen ai ǁamaxū. Xawe sadu ge ǃKhūb sadu Elob xa ǃkhōǂuihe hâ tsî a ǁîb di.
“Tā ǁkhaoro-i tamas ka io piriro-e ǁî-i îs di dai-i ǃnâ sâi.
Disiǁîǃâs di ǂhanub
22 “Mâ kurib hoaba sa ǃhanaǂûn di hōǂgāsa xu disiǁîǃâsa ǂnûiǂui. 23 ǃKhūb sadu Elob ge ǀgoreǀî-aiheb nîse ǁhûiǂui ǃkhaib tawa sī, î sadu disiǁîǃâs ǃhoron, ǂauxûi-i, ǀkhera-oli-i tsî ǂguroǃnaesagu goman tsî ǀgoan tsîn disa ǃKhūb mûǁae ǂû; î du ǃKhūb sadu Eloba hoaǁae ǃaoǃgâsa ǁkhāǁkhāsen. 24 ǃKhūb ge ǀgoreǀî-aiheb nîse ǁhûiǂui ǃkhaib ga kaise ǃnū sadu ǁan hâ ǃāde xu disiǁîǃâs, ǃKhūb ge ǀkhae dusa ǁnāǀî ǃgû-ūs ǃaroma, o sao rase dī: 25 Sadu hōǂgās disiǁîǃâs disa ǁamaxū, î marisa ǁnā ǀō-aisa ǃkhaib ǀgoreǀîs dib tawa sī-ū; 26 î ǁnā marisa ǂgao du ra xū-i hoa-e ǁama-ū: Gomaǁgan-i, ǀgoaǁgan-i tamas ka io ǂauxûi-i ai sîsenū. ǁNās khaoǃgâ du ge ǃKhūb sadu Elob di mûǁae, sadu ǀaokhoen ǀkha ǁîna ǂû tsî nî ǃgâiaǂgao. 27 Tā sadu ǃādi ǃnâ ǁan hâ Leviǁîna ǀuru. ǁÎn ǃhūǃâ-i xare-e ūhâxūse ǀumi tama xuige. 28 Mâ ǃnonaǁî kurib hoab di ǀunis ai disiǁîǃâs sadu hoaraga ǃhanaǂûn hōǂgās disa ǀkhī-ū, î sadu ǃādi ǃnâ hā sâu. 29 On ge Leviǁîn, ǃhūǃâ-i tsîna ǀumi taman, ǃhaokhoen, ǃguniǀgôan tsî ǃoataradi, sadu ǃādi ǃnâ ǁan hân tsîna ǂâusa ǂûna nî ūhâ. ǁÎn ge ǁnāpa ǂhân hâ xūn hoana nî sī hōbasen. Nēsa du ga dī, ob ge ǃKhūb sadu Eloba dī du ra xū-i hoa-i ǃnâ nî ǀkhae du.
© Khoekhoegowab Elobmîs © Bible Society in Namibia, 2020.
