ǀAsa Tempeli di ǂkhaisib
1 ǁNā kurib ǁkhāb di ǀgamdisiǀguiǀaǁî tsēs, hûǁî ǁkhâb dis aib ge ǃKhūba ǁkhawa kēbo-aob Hagaib ǃnâ-u ge ǃhoa. 2 ǁÎb ge Hagaiba ge mîba, îb Sealtieli ôab Serubabeli Judab di gowoniab tsî Josadaki ôab ǀgapipristeri Josuab tsî ǁaes tsîn ǀkha ǃhoa. 3 “Tari-i sadu di-e Tempeli ge ǂguro mâtikōse îxa i ǀgausa ge mû? Tsî nēba mâtib ra mûsenba du? ǁÎb ge xū tamase ra mûsen. 4 Xawe tā nēs xa ǂkhabuǂâi Serubabeltse. Josadaki ôats ǀgapiprister Josuatse ǁkhoaǂgaoxase sîsenna dī re, tsî sadu ǃhūb di ǁanǂgāsabedu tsîna ǁkhoaǂgaoxa re, tita sadu ǀkha hâ xuige, tib ge ǃKhūb Hoaǀgaixaba ra mî. 5 Egipteba xu du ge doeǂoa, o ta ge hoaǁae ta ge sadu ǀkha nî hâ ti ge mîmâiba du. Noxopa ta ge sadu ǀkha hâ, xuige tā ǃao re.”
6 Nētib ge ǃKhūb Hoaǀgaixaba ra mî: “ǀGū ǁaeb ǃnâ ta ge ǀhommi tsî ǃhūbaib, hurib tsî ǃhūb tsîga nî ǀgabi. 7 Tita ge ǃhaodi hoade nî ǁnobeǁnobeǃnâ tsîb ge ǁîdi di ǁuiba nēpa nî hā-ūhe, tsîb ge Tempela ǂkhaisib ǀkha nî ǀoaǀoahe.
8 “Hoaraga ǀhaiǀurib tsî ǃhuniǀurib tsîkha ge a ti. 9 ǀAsa Tempeli di ǂkhaisib ge ǀorob dib ǃgâ-ai nî kai, tsî ta ge ti ǁaesa ǁnāpa ǂkhîba nî mā,”
tib ge ǃKhūb Hoaǀgaixaba ra mî.Kēbo-aob ge pristergu tawa ra ǀape-ôa
10 ǀGamǁî kurib Persiab gao-aob Dariusi ǂgaeǂguis dib di ǀgamdisihakaǀaǁî tsēs khoeseǁî ǁkhâb dis aib ge ǃKhūba kēbo-aob Hagaib ǀkha ge ǃhoa. 11 ǁÎb ge ge mî: “Pristergu ai ǂhanub ǂama sī ǀape-ôa re. 12 Khoe-i ga khaihe hâ ǁgan-e ǁî-i saran ǁgarub ǃnâ tani, tsî i ga ǁî-i ǁhōs ǀkha pere-i kas, sâisa ǃhanaǂû-i kas, ǂauxûi-i kas, ǀkhera-oli-i kas, ǀnî ǂû-i kas hoasa tsâǀkhāo, ǁnā xū-e ǃanu i ra?”
O gu ge pristerga “Hî-î” ti ge ǃeream.
13 Ob ge Hagaiba ge dî: “ǁŌ hâ soro-e tsâǀkhās xa ǃanuoǃnâ kaihe hâ khoe-i ga nē xūn di ǀgui-e tsâǀkhāo, ǁnā xū-e ǃanuoǃnâ i nî?”
O gu ge pristerga “Î, ǃanuoǃnâ nî” ti ge ǃeream.
14 ǁNās khaoǃgâb ge Hagaiba ge mî: “ǃKhūb ge ra mî, nē ǁaes di khoen tsî ǁîn ra dī xūn tsîn hoan ge ti mûǁae ǁnāti ī. ǁÎn ra hā-ū ǁguibadi hoadi ge a ǃanuoǃnâ.”
ǃKhūb ge ǁaesa ǀkhaeba ra mîmâiba
15 ǃKhūb ge ra mî: “Mû tama du hâ tare-i ge sadu ǀkha ra īsa? Tempela du ǁkhawa nî ǂnubikhâis aiǃâ 16 du ga ǀgamkaidisi kiloxramgu di ǀhaoǀhaosa ǃhoro-e du nî hō ǃâubasens ǀkha sī, xawe i ge ǀguikaidisigu di-i ǀgui-e gere hâ. ǀGuikaidisi litergu ǂauxûi-e nî hōse du ga ǀāǃnâǃkhaib tawa sī, xawe du ge hakadisigu ǀguiga gere hō. 17 Tita ge ǀgamsa ǂoab tsî ǃnareb tsîkha ǀkha sadu ra ǃhana ǂgao xū-i hoa-e gere hîkākā, xawe du ge ǃhobasen tama ge i. 18 Nēs ge ǀgamdisihakaǀaǁî tsēs khoeseǁî ǁkhâb dis, ǁîs aib ge Tempeli di ǃgaoǃgaoba ǁguihesa. ǃGaoǃgâ re, tare-i nēsi nî īsa. 19 ǃHoro-i xare-i ǃgau tama, draibehaidi, ǀnomahaidi, xranathaidi tsî ǀkherahaidi tsîn noxopa ǂûtani tama, xawe ta ge nētsēsa xu nî ǀkhae du tsoatsoa.”
ǃKhūb ge Serubabela ra mîmâiba
20 ǁNā tsēs ǁkhās, ǀgamdisihakaǀas khoeseǁî ǁkhâb dis aib ge ǃKhūba ǀgamǁî ǃnāsa Hagaiba ge ǂhôa, 21 îb Judab di gowoniab Serubabela mîba: “ǀAse ta ge ǀhommi tsî ǃhūbaib tsîkha nî ǀgabi. 22 Tsî ta ge gaoside hîkākā tsî ǁîdi ǀgaiga nî ǀamǀam. Torokunide ta ge ǁîdi ǃnari-aogu hoagu ǀkha nî ǃkhupusen kai. Hān ge nî ǁō tsî ǁîn di ǃgapi-aogu ge ǁîǃnābe nî ǃgamgu. 23 ǁNā tsēs ai ta ge sats ti ǃgāts, Serubabeltsa nî ū tsî ta ge ti ǀons ǃnâts nî ǂgaeǂguise nî ǁgaumâi tsi. Tita ge satsa go ǁhûiǂui,”
tib ge ǃKhūb Hoaǀgaixaba ra mî.© Khoekhoegowab Elobmîs © Bible Society in Namibia, 2020.
