Esrab ǀgores, ǁaes di ǁoren ǃaroma
1 Nē xūn hoan ge dītoahes khaoǃgâ gu ge ǀnî ǂgaeǂgui-aogu Israelǁîn diga hā ge mîba te, Israeli khoen, pristergu tsî Leviǁîgu tsîn ǀgūse ǁgoe ǃhūgu khoen, Kanaanǁîn, Hetǁîn, Perisǁîn, Jebusǁîn, Amonǁîn, Moabǁîn, Egipteǁîn tsî Amorǁîn tsîna xu ge ūdabasen tama, tsî ǁnā khoen ra dī ui-uisa xūn ǁkhāna ra dī ǃkhaisa. 2 Jodeǁîgu ge ǃhao tarade ra ǃgame tsîs ge ǁnās ǀkha Elob di ǃanu ǁaesa ra ǀuriǀurihe. ǂGaeǂgui-aogu tsî ǂamkhoegu tsîgu ge nē ǃûǂams ǃnâ ǂgurose mâ. 3 Nē ǃkhaisa ta ge ǁnâu, o ta ge ti sarana ǀkhau, ti ǀûn tsî ǀhō-ammi tsîna tsuruǂui tsî tsûaǂgaob xa ǂkhabu hâse ge ǂnû. 4 Tsî ta ge ǁnāpa ǃoab xa ǃuiǁguibas ǁaeb kōse ge ǂnôa i. O gu ge Israeli di Elob ge ǃkhōsisa xu ge oaǀkhī khoen di ǁoreb ǂama mî mîdi xa ǃaoǃaohe hâgu hoaga ti ǂnamipe ge ǀhao.
5 ǃUiǁguibas ǁaeb ai ta ge ǃoab ǃnâ ta ge ǂnôa ipa xu khâimâ tsî ti ǀkhausa sarana ta noxopa ana hâse, ǃhonǁgoa tsî ti ǃomkha ǃKhūb, ti Elob ǃoa ūkhâi 6 tsî ge ǀgore: “Ti Elotse, taob xa ta ge sa ǃoas tsîna kōkhâi ǁoa. Sida ǁoren ge sida danade ra īǂam; ǁîn ge ǀhommi kōse a ǀgapi. 7 Sida aboxan di tsēde xu nēsis kōseb ge sa khoeda di ǁoreba kaise a kai. Sida ǁoreba xus ge sida, sida gao-aogu tsî sida pristergu tsîn ge ǀkhara gao-aogu ǃomǁae ǁnāsa, tsî da ge ǃgamhe, sida xūna ǁkhâuǁnâ-aihe tsî ǃkhōsabese gere ǃgû-ūhe. Tsî da ge nētsēs ǁga hoaragase ge taotaohe. 8 Nēsi da ge ǃnubu ǁaero-e, ǃKhū sida Elotse sats xa go ǀkhomxahe, tsî da ge ǀnî khoeda ǃkhōsisa xu ûiǂoa tsî ǃnorasase nē ǃanu ǃkhais ǃnâ go ǁan. Sats ge sida khobosisa xu ǃnoraǃnora tsî ǀasa ûiba go mā. 9 Sida ge ge khobo i, xawets ge khobosis ǃnâ ǁnāxū da tama ge i. Sats ge Persiab gao-aoba sida ǃoa ge ǃgâi kai, tsîb ge ǁîba ge mā-am da, ûi tsî da sa Tempeli, khôaǂkhūhe ge hâ iba omkhâi tsî ǃnorasasiba Judab tsî Jerusalems ǃnâ nî ūhâsa.
10 “Xawe sida Elotse, tare-e da nēsi nēn khaoǃgâ a mî ǁkhā? Sida ge sa mîmādi, 11 sa ǃgāgu, kēbo-aogu ǃnâ-uts ge mā dade ge ǃûǂam. ǁÎgu ge ge mîba da, ǁnā ǃhūb hîa da nî ūbasenni a ǀurixa ǃhūsa, ǁîb ǃnâ ge ǁan hâ i khoen ge ǁîn di ui-uisa dīgu ǀkha, ǁîba ǀgui ǀkhāba xu nau ǀkhāb kōse ǀuriǀuri xui-ao. 12 ǁÎgu ge ge mîba da ǁîn ǀkha da ǃgameǃnâgu tide tsî da ǁîna, ǃgâiǃgâxa ûiban nî ūhâs ǃoa hui tidesa, nē ǃhūb di ǃgâiba da ga ǀama ǂgao tsî ǁîba sida ôana mā ǂgao-o, ǀamoseb ǁîn dise nî hâse. 13 Sida ǀkha ge sida tsūdīgu tsî ǃûǂamdi ǃaroma ī xūn hoan khaoǃgâ da ge a ǂan, sats sida Elots ge ǃoaǂui da hâs xa ǀorose ǁkhara da, tsîts ge ǀnîda ûiǃgau kai ǃkhaisa. 14 Mâti da kha ǁnâi ǁkhawa sa mîmāde ǃûǂam tsî nē ui-uisa xūna ra dī ǃhaodi ǀkha nî ǃgameǃnâgu? ǁNāti da ga dī, ots ge sida ǀkha ǁaixa tsî hoaragase nî hîkākā da tsî i ge ǀgui khoe-i tsîna ûiǃgau tide. 15 ǃKhū, Israeli Elotse, sats ge a ǂhanu-ai tsîts ge ge ûiǃgau kai da. Sida ǃûǂamde da ge sats ai ra ǁguiǁnâ; sa aiǃâ mâs tsîna da ge anu tama hâ.”
© Khoekhoegowab Elobmîs © Bible Society in Namibia, 2020.
